Read new_tumbuka_bible Yoshuwa 9 Bible Online

Yoshuwa 9 - new_tumbuka_bible bible

Yoshuwa 9

¹Sono ŵakaronga wose awo ŵakaŵa ku sirya linyakhe la mronga wa Yorodani ŵakapulika ichi. Iwo ŵakakharanga mu charu cha mapiri mu madambo, na mu mphepete mose mwa Nyanja Yikuru kurazga ku Lebanoni. Ŵeneaŵa ŵakaŵa ŵakaronga ŵa ŵaHiti, ŵa ŵaAmori, ŵa ŵaKanani, ŵa ŵaPerezi, ŵa ŵaHivi, na ŵa ŵaYebusi.

²Wose aŵa ŵakazomerezgana kuti ŵarwe nkhondo na Yoshuwa na ŵaIsraele.

³Kweni ŵaHivi awo ŵakakharanga mu msumba wa Gibeyoni ŵakati ŵakapulika icho Yoshuwa ŵakachita ku msumba wa Yeriko na wa Ayi,

⁴ŵakanozgera fundo ya uryarya. Ŵakaruta kuya kanozgera vyakurya, ndipo ŵakayegha masaka ghakoroŵere ghakukerukakeruka pa mbunda zawo, na mathumba ghakoroŵere gha vinyo gha vikumba vyakuparuka na gha vigambavigamba.

⁵Iwo ŵakavwara skapato zikoroŵere za vigambavigamba na malaya ghakumara. Vyakurya vyawo vyose ivyo ŵakayegha vikaŵa vyakomira na vya chuku.

⁶Penepapo ŵakaruta kwa Yoshuwa ku msasa ku Giligala ndipo ŵakati kwa iyo na ku ŵaIsraele, “Ise tafuma ku charu cha kutali. Sono ise tikukhumba kuti paŵe phangano pakati pa ise na imwe.”

⁷ŴaIsraele ŵakati ku ŵaHivi, “Panyakhe mukukhara pafupi na ise. Kasi ise tingachita uli phangano na imwe?”

⁸Iwo wakati kwa Yoshuwa, “Ise ndise ŵateŵeti ŵinu.” Yoshuwa wakaŵafumba wakati, “Kasi imwe ndimwe ŵanjani ndipo mwafuma nkhu?”

⁹Iwo ŵakazgora ŵakati, “Ŵateŵeti ŵinu ŵafuma ku charu cha kutali chomene, chifukwa cha lumbiri lwa zina la FUMU, Chiuta winu. Pakuti ise tili kupulika vyose ivyo wali kuchita mu charu cha Eguputo.

¹⁰Tili kupulika ivyo wali kuchita ku ŵakaronga ŵaŵiri ŵa ŵaAmori ku sirya linyakhe la mronga wa Yorodani, kwa Sihoni karonga wa ku Heshiboni, na kwa Ogi karonga wa ku Bashani, uyo wakakharanga mu Ashitaroti.

¹¹Ntheura ŵarara ŵithu na wose awo ŵakukhara mu charu chithu ŵakatiphalira kuti, ‘Torani vyakurya vyinu vya pa ulendo, rutani mukakumane nawo, ndipo mukaŵaphalire kuti: Ise tili ŵateŵeti ŵinu. Tiyeni tichite phangano pakati pa ise na imwe.’

¹²Wonani chakurya chithu. Chikaŵa chakuthukira apo tikafumiranga mu zinyumba zithu kuŵa cha pa ulendo withu pa zuŵa ilo tikafumanga kwiza kwa imwe kufuma ku nyumba zithu. Kweni sono wonani, chomira ndipo chili na chuku.

¹³Ndipo mathumba gha vikumba agha ghakaŵa waka ghaphya apo tikathirangamo vinyo, kweni sono wonani umo ghaparukira. Wonani malaya ghithu na skapato zithu vyose vyazgoka vikoroŵere na kumara chifukwa cha ulendo uwu utali chomene.”

¹⁴Sono ŵaIsraele ŵakaryako chakurya chawo chira, kwambula kufumba danga kwa FUMU.

¹⁵Penepapo Yoshuwa wakachita phangano la mutende na iwo kuti ŵareke ŵaŵe ŵamoyo ndipo ŵarongozgi ŵa mpingo wa ŵaIsraele ŵakakhozgera phangano ili na chirapo.

¹⁶Para ghakajumphapo mazuŵa ghatatu kufumira apo ŵakapanganirana na ŵaGibeyoni, ŵaIsraele ŵakapulika kuti ŵakaŵa ŵazengezgani ŵawo ŵa pafupi na iwo.

¹⁷Ntheura ŵaIsraele ŵakawuka na kuya kafika ku misumba yawo pa zuŵa la chitatu. Misumba yawo yikaŵa iyi: Gibeyoni, Kefira, Beyeroti na Kiriyati Yeyarimu.

¹⁸Kweni ŵaIsraele kuti ŵakaŵakoma chara chifukwa ŵarongozgi ŵa mpingo ŵakachita chirapo mu zina la FUMU, Chiuta wa Israele. Penepapo mpingo wose ukadinginyikira ŵarongozgi.

¹⁹Ndipouli ŵarongozgi wose ŵakazgora mpingo ura ŵakati, “Ise tikarapa kwa iwo mu zina la FUMU, Chiuta wa Israele, ntheura sono kuti tingaŵakhwaskanga chara.”

²⁰Icho tiŵachitire ndi ichi: Tiŵareke ŵakhare ŵamoyo, mzire ukari wa FUMU ukhilire pa ise, chifukwa cha chirapo icho tikachita kwa iwo.

²¹Ŵarekani ŵakharenge, kweni ŵaŵenge ŵakuthenya nkhuni, na ŵakuneghera maji mpingo wose! Vyeneivi ndivyo ŵakayowoya ŵarongozgi.

²²Penepapo Yoshuwa ŵakaŵachema ŵanthu ŵa mu msumba wa Gibeyoni ŵara, na kuŵafumba kuti, “Kasi nchifukwa uli mukatipusika pakuyowoya kuti mukafuma kutali apo mukukhara pafupi na ise?

²³Ntheura sono mwatembeka ndipo ŵanji ŵa imwe ŵati ŵaŵenge ŵazga, ŵakuthenya nkhuni, na ŵakunegha maji gha mu Nyumba ya Chiuta wane kwa muyirayira.”

²⁴Ŵakamuzgora Yoshuwa ŵakati, “Ŵateŵeti ŵinu ŵakaphalirika makora chomene umo FUMU, Chiuta winu wakalangulira muteŵeti wakhe Mozesi kumupani charu chose na kumaramo wose petu awo ŵakukhara mu charu. Sono tikopa chomene chifukwa cha imwe. Ndicho chifukwa tikachita chinthu cha ntheura.

²⁵Sono ise tili mu mawoko ghinu, chitani chilichose kwa ise icho mukuchiwona nchakwenerera na chiweme.”

²⁶Ntheura Yoshuwa wakaŵathaska kufuma ku woko la ŵaIsraele. Ŵakaŵakoma chara.

²⁷Mu zuŵa lenelira Yoshuwa wakaŵazgora ŵanthu ŵa ku Gibeyoni kuŵa ŵakuthenya nkhuni na ŵakuneghera maji ŵa mpingo wa ŵaIsraele na jochero la FUMU mu malo ghose agho iyo yiti yisankhe. Ndipo ndimo ŵaliri kufikira mpaka sono.