Read new_tumbuka_bible 2 ŴaTesalonika 2 Bible Online

2 ŴaTesalonika 2 - new_tumbuka_bible bible

2 ŴaTesalonika 2

¹Mwa ŵabali za kwiza kwa Fumu yithu Yesu Khristu, ndiposo pa za kuwungana kwithu kuti tikumane nayo, tikumuŵeyani kuti,

²mureke kutimbanizgika luŵiro mu maghanoghano nesi kuŵa na phyumphyu chifukwa cha mzimu panji mazgu panji karata iyo yikuŵa nga yafuma kwa ise na mazgu ghakuti zuŵa la Fumu sono lafika.

³Mungazomerezganga kuti munthu yunji wamupusikani mu nthowa yiliyose. Pakuti zuŵa lira lamkwiza chara mpaka chigaruka chize danga ndipo munthu muheni chomene yura wavumbukwe, yumoza uyo ngwa ku Gehena,

⁴uyo wakususka na kujikuzga pachanya pa icho ŵanthu ŵakuti ndi chiuta panji icho wakuchisopa. Wakunjira na kukhara mu Nyumba ya Chiuta na kujiphara kuti Chiuta ndiyo.

⁵Kasi mukukumbuka chara kuti para nkhaŵa ndichali namwe, nkhamuphalirani ichi vinthu ivi?

⁶Ndipo sono mukumanya icho chikumukanizga kuti wakavumbukwe pa nyengo yakhe.

⁷Pakuti cha muchindindi cha kwananga chayamba kale kuchitika, kweni icho chamkuchitika kuti chamkufiskika chara mpaka uyo wakukanizga kwananga wafumepo.

⁸Ndipo penepapo Muheni Yura wamkuvumbukwa, mweneuyo Fumu Yesu wizamkumumyangura na muvuchi wa mu mlomo wakhe, na kumumara na kuwoneka kwa kwiza kwakhe.

⁹Kwiza kwa muheni yura na milimo ya Satana kwamkuŵa na nkhongono zose na vya munthondwe vyakupambanapambana na vimanyikwiro vya utesi,

¹⁰ndiposo na kupusika kose kwakubendera kwa awo wamkupusika ŵanthu awo ŵamkulangika chifukwa cha kukana kutemwa na unenesko ndipo ntheura ŵaponoskenge.

¹¹Ntheura Chiuta wati waŵatumirenge nkhongono ya usovyi kuti ŵapulikane vya utesi,

¹²mwakuti wose ŵasuskike awo ŵakapulikana na unenesko chara, kweni ŵakakondweranga mu kuchita uheni.

¹³Kweni ise tikwenera kumuwonga Chiuta nyengo zose chifukwa cha imwe mwa ŵabali ŵakutemweka na Fumu, pakuti Chiuta wakamusorani imwe kufuma ku mutendeko kuti muponoskeke, kwizira mu kusukika na Mzimu na kupulikana na unenesko.

¹⁴Pa ichi mukachemeka kwizira mu Uthenga withu Uweme mwakuti mupokere uchindami wa Fumu yithu Yesu Khristu.

¹⁵Ntheura mwa ŵabali, imilirani nganganga ndipo mukoreske maluso agho tikamusambizgani mu mazgu gha pa mlomo na mu makarata.

¹⁶Fumu yithu Yesu Khristu iyomwene, na Chiuta Ŵadada, uyo wakatitemwa na kutipa chikhwimisko cha muyirayira na chigomezgo chiweme mu uchizi wakhe,

¹⁷wakhwimiske mitima yinu na kujikhozga mu milimo yose yiweme na mu mazgu.