Read new_tumbuka_bible 2 ŴaTesalonika 3 Bible Online

2 ŴaTesalonika 3 - new_tumbuka_bible bible

2 ŴaTesalonika 3

¹Pa umaliro mwa ŵabali mutirombere kuti mazgu gha Fumu gharutilire kutandazgika na kuchindikika nga ndi umo vikachitikira kwa imwe.

²Mutirombereso kuti Chiuta watithaske ku ŵanthu ŵaheni na ŵakubendera. Pakuti ndi wose chara awo ŵali na chipulikano.

³Kweni Fumu njakugomezgeka, ndipo yiti yimukhozgani na kumuvikirirani kwa Muheni yura.

⁴Ndipo tili na chigomezgo mwa Fumu na vya imwe kuti ndipo muti murutilirenge kuchita ivyo tikumulangulani.

⁵Fumu yirongozge mitima yinu kuti mumanye kutemwa kwa Chiuta, na kuzizipizga kwa Khristu.

⁶Mwa ŵabali, mu zina la Fumu yithu Yesu Khristu, tikumulangulani kuti, mufumeko ku ŵabali awo mbakata ndipo ŵakureka kukhara kwakuyana na visambizgo ivyo tikaŵasambizga.

⁷Pakuti imwe mwekha mukumanya ivyo mukwenera kuchita nga ndi umo tikachitiranga. Ise kuti tikaŵa ŵakata chara para tikaŵa na imwe.

⁸Kuti tikarya icho chikaŵa cha munthu waliyose kwambula kulipira chara, kweni tikatokatokanga ndipera nanga tivuke. Tikachita mlimo muhanya na usiku, mwakuti tireke kuzotofya munthu waliyose wa imwe.

⁹Tikachita ichi kuti panji tilije mazaza ghakurombera wovwiri chara, kweni tikakhumba kuti timupani bambiro lakuti murondezge.

¹⁰Pakuti apo tikaŵa namwe tikamupani languro ili lakuti, “Usange munthu wakukhumba kuchita mlimo chara, wareke na kurya.”

¹¹Chifukwa tikupulika kuti mukati mwinu ŵalimo ŵanji awo mbakata, ŵamwendanato kwambula kuteŵeta mlimo uliwose.

¹²Mu zina la Fumu Yesu Khristu, tikuŵalangula na kuŵachenjezga ŵanthu ŵa ntheura kuti ŵachitenge mlimo na kufwasa kuti ŵarye chakurya chakujiteŵetera ŵekha.

¹³Kweni imwe mwa ŵabali, mureke kuvuka pakuchita uweme.

¹⁴Usange walimo yumoza mukati mwinu uyo wakukana kupulikira mazgu agha talemba mu karata iyi, manyani munthu uyo ndipo mureke kwendezgana nayo, mwakuti soni zimukore.

¹⁵Kweni mureke kumupima nga ndi murwani, kweni mumuchenjezge nga ndi munyinu.

¹⁶Sono Fumu ya mutende iyoyene, yimupani mutende nyengo yose na mu nthowa yiliyose. Fumu yiŵenge na imwe mose.

¹⁷Ine Paulosi nkhulemba matauzgo agha na woko lane. Ichi ndi chimanyikwiro chane mu karata wane waliyose. Ntheura ndimo ine nkhulembera.

¹⁸Uchizi wa Fumu yithu Yesu Khristu uŵenge na imwe mose.