Read new_tumbuka_bible 1 Timote 1 Bible Online

1 Timote 1 - new_tumbuka_bible bible

1 Timote 1

¹Kufuma kwa ine Paulosi, wakutumika wa Khristu Yesu, na languro la Chiuta Muponoski withu na Khristu Yesu chigomezgo chithu.

²Kwa Timote mwana wane mwenemwene mu chipulikano. Uchizi, lusungu na mutende vya kufuma kwa Chiuta Dada na kwa Khristu Yesu, Fumu yithu.

³Nga ndi umo nkhakuchiskira para nkharutanga ku Makedoniya, khara ku Efeso, kuti uŵalangure ŵanthu ŵanji mwakuti ŵareke kusambizga vigomezgo vinyakhe vyakupambana,

⁴panji nesi kutegherezga ku vidokoni na kupenjerezga ndondomeko yambula kumara ya mafuko. Ivi vikuwuska waka mphindano kuruska kusambizga kwa vya uChiuta uko nkhwa mu chipulikano.

⁵Kweni urato wa languro lithu, nkhutemwa kwakufuma mu mtima uweme na njuŵi yiweme ndiposo na mu chipulikano chambula kupusikizga.

⁶Ŵanthu ŵanji ŵali kupatukako ku vinthu ivi ndipo ŵapurukira ku vyakuyowoya vyawaka,

⁷pakukhumba kuŵa ŵamanyi-marango, kwambula na kupulikiska mazgu agho ŵakuyowoya nanga nkhuzimanya fundo izo ŵakukhomekezga.

⁸Sono tikumanya kuti marango ngaweme, usange munthu wakuchita kwakuyana na marango.

⁹Pakupulikiska ichi, kuti marango ghalikuŵikika chifukwa cha ŵanthu ŵarunji chara, kweni chifukwa cha ŵachikana-marango na wambula kupulikira, ŵambula Chiuta, ŵakwananga, ŵabendezi na ŵakazuzi, ŵakukoma ŵawiskewo na ŵanyinawo, vigeŵenga,

¹⁰ŵazaghali, ŵakuchita ukazuzi na ŵanarume ŵanyawo, panji ŵanakazi ŵanyawo, awo ŵakwiba ŵanthu, ŵatesi, ŵakaboni ŵa utesi na ivyo vikupambana na vigomezgo vya unenesko,

¹¹mwakuyana na Uthenga Uweme wa uchindami wa Chiuta wakutumbikika uwo ine ndakorezgeka nawo.

¹²Nkhuwonga uyo wakandipa nkhongono izi, Khristu Yesu Fumu yithu, chifukwa wakandipima wakugomezgeka pakundimika mu uteŵeti wakhe,

¹³nangauli kale nkhamuyowoyera matusi, nkhamuzikizga na kumuchitira msinjiro, kweni wandilengera lusungu chifukwa nkhavichitanga mu ulemwa na mu kuwura kupulikana.

¹⁴Ndipo uchizi wa Fumu yithu ukafuruka pamoza na chipulikano na kutemwa ivyo vili mwa Khristu Yesu.

¹⁵Kayowoyero aka nkha unenesko ndipo nkhakwenerera kupokerereka chomene kakuti Khristu Yesu wakiza mu charu kuti waponoske ŵakwananga. Ndipo ine ndine wakudanga pa ŵakwananga.

¹⁶Kweni pa chifukwa ichi nkharengerekera lusungu kuti mwa ine nga wakwananga kwakuruska, Khristu Yesu warongore kuzizipizga kwakhe kwakufikapo kuŵa chiyerezgero ku awo ŵati ŵapulikane mwa iyo kuti waŵe na umoyo wa muyirayira.

¹⁷Ntheura kwa Karonga wa muyirayira, wakukhalirira swii, wambula kuwoneka, Chiuta uyo ndi yekha na yekha kuŵenge nchindi na uchindami kwa muyirayira swii! Ameni.

¹⁸Languro ili nkhupereka kwa iwe Timote mwana wane kwakuyana na mazgu gha uchimi agho ghakayowoyeka na vya iwe. Usange wakhuŵirizgika nagho, urwe nkhondo yiweme.

¹⁹Rutilira mu chipulikano chako na mu njuŵi yiweme. Ŵanthu ŵanji kuti ŵakupulikira njuŵi zawo chara, ntheura chipulikano chawo chabwanganduka.

²⁰Mukati mwawo muli Himenaya na Alekizandara, awo ndili kuŵapereka kwa Satana mwakuti ŵasambizgike kureka kutuka Chiuta.