Read new_tumbuka_bible 1 Timote 2 Bible Online

1 Timote 2 - new_tumbuka_bible bible

1 Timote 2

¹Sono pakudanga pa vyose, nkhukuchiska kuti maŵeyerero, malurombo, kuromberana na viwongo vichitikirenge ŵanthu wose,

²ŵakaronga na wose awo ŵali na nchito zikuruzikuru mwakuti tiŵenge na umoyo wakufwasa na wa mutende, mu kusopa Chiuta na nchindi mu nthowa yiliyose.

³Ichi nchiweme ndipo nchakuzomerezgeka pa maso pa Chiuta Muponoski withu,

⁴uyo wakukhumba kuti ŵanthu wose ŵaponoskeke ndipo ŵize ku umanyi wa unenesko.

⁵Pakuti pali Chiuta yumoza, ndipo Mphemaniski pakati pa Chiuta na munthu nayo njumoza pera, uyo ndi Khristu Yesu,

⁶mweneuyo wakajipereka yekha kuti wawombole ŵanthu wose, icho mbukaboni pa icho chikaŵako pa nyengo yakwenerera.

⁷Pa ichi nkhimikika kuŵa mupharazgi na wakutumika, (nkhuyowoya unenesko kuti nkhuteta chara) kuŵa musambizgi wa ŵamitundu mu chipulikano na mu unenesko.

⁸Nkhukhumba kuti mu malo ghose para ŵanarume ŵakuromba ŵakwezgenge mawoko ghawo kwa Chiuta mwa nchindi kwambula ukari panji zawe.

⁹Nkhukhumbaso kuti ŵanakazi nawo ŵavwarenge makora, ndipo mwamahara, mukuwoneka makora kwambula kuruka sisi na kujitozga na golide, panji na mikanda yakuzirwa ndiposo na vyakuvwara vya mtengo,

¹⁰kweni na milimo yiweme nga ndi umo kukwenerera ŵanakazi awo ŵakuti mbasopisopi.

¹¹Ŵanakazi ŵakwenera kusambira mwachisisi na mwa kujiyuyura.

¹²Nkhuzomerezga chara kuti mwanakazi wasambizge nesi kuwa na mazaza pa ŵanarume. Iyo wakharenge waka chisisi.

¹³Pakuti Adamu ndiyo wakadanga kulengeka, ndipo pamanyuma Eva,

¹⁴Ndiposo kuti ndi Adamu uyo wakapusikika chara, kweni mwanakazi na kuswa dango la Chiuta.

¹⁵Kweni mwanakazi wamkuponoskeka pakubaba ŵana, usange wakukhalirira mu chipulikano, mu kutemwa, mu utuŵa na kuziza.