Read new_tumbuka_bible 1 Timote 3 Bible Online

1 Timote 3 - new_tumbuka_bible bible

1 Timote 3

¹Kayowoyero aka nkhakuneneska ako kakuti, usange munthu yose wakunwekera mlimo wa ulaŵiriri, wakhumba mlimo wakuzirwa.

²Ntheura mulaŵiliri wakwenera kuŵa wambula kalema, munthu wa mwanakazi yumoza, wakujikora, wa mtima uweme, wa nchindi, wakupokerera ŵalendo, musambizgi wakufikapo,

³mloŵevu chara, wambula zawe, kweni wakuzika, wambula mphindano, wambula kutemwa ndarama.

⁴Wakwenera kurongozga na kukhazika makora ŵa mu nyumba yakhe, na kusambizga ŵana ŵakhe kumupulikira na kumuchindika mu nthowa yose.

⁵Pakuti usange munthu wakutondeka kurongozga makora ŵa mu nyumba yakhe, kasi wangapwererera uli mpingo wa Chiuta?

⁶Wareke kuŵa munthu uyo wazgoka sonosono, mzire wajitukumule na kujikuzga ndipo wasuskike nga ndi umo Satana wakasuskikira.

⁷Waŵenge munthu uyo wose ŵakumurumba na ŵakuwaro kwa mpingo wuwo, mzire walengeskeke na kuwira mu chipingo cha Satana.

⁸Ŵateŵeti ŵa mpingo nawo ŵakwenera kuŵa ŵa nkharo yiweme, ŵeneawo mazgu ghawo ghakugomezgeka, ŵakutandara mu kumwa vyakuloŵezga chara, nanga nkhutemwa ndarama za marikho.

⁹Ŵakwenera kukoreska cha muchindindi cha chipulikano na njuŵi yiweme.

¹⁰Nawoso muŵayezge danga, ndipo usange ŵalije kafukwa kalikose, rekani ŵateŵete nga mbateŵeti.

¹¹Ŵanakazi nawo ŵakwenera kuŵa ŵa nkharo yiweme, ŵakusesa chara, ŵakujikora na ŵakugomezgeka mu vyose.

¹²Ŵateŵeti ŵakwenera kuŵa ŵafumu ŵa mwanakazi yumoza, ndipo waŵe ŵakumanya kurongozga makora ŵana ŵawo ŵa mu nyumba yawo.

¹³Pakuti awo ŵakuchita makora mlimo wawo wa uteŵeti ŵakujitorera zina liweme ndipo ŵakumanya kuyowoya na chikanga pa vya chipulikano chawo mwa Khristu Yesu.

¹⁴Nkhugomezga kwiza kwa iwe sonosono, kweni nkhulemba visambizgo ivi kwa iwe mwakuti,

¹⁵usange ndaziurika ungamanya umo munthu wakwenera kukhalira mu Nyumba ya Chiuta iyo ndi mpingo wa Chiuta wamoyo, mzati na wakukhozga unenesko.

¹⁶Nadi, cha muchindindi cha chisopo chithu nchikuru icho chikuti, Iyo wakawoneka mu thupi, wakarongoreka kuti ndi murunji na Mzimu, wakawoneka na ŵangelo. Wakapharazgika mu vyaru vyose, ŵa mu charu ŵakapulikana, ndipo wakatorekera kuchanya mu uchindami.