Read new_tumbuka_bible 1 Timote 4 Bible Online

1 Timote 4 - new_tumbuka_bible bible

1 Timote 4

¹Sono Mzimu wakuyowoya pakweru kuti mu nyengo za umaliro, ŵanji ŵizamkupatukako ku chipulikano pakutegherezga ku mizimu yitesi na vigomezgo vya viŵanda.

²Kwizira mu upusikizgi wa ŵanthu ŵatesi, awo njuŵi zawo zili kukurungara,

³ŵeneawo ŵakukanizga kutora panji kutengwa, na kuŵalangula kuti ŵaziŵizge vyakurya vinyakhe, ivyo Chiuta wakavilenga kuti awo ŵakupulikana na kumanya unenesko, ŵapokere na kuwonga Chiuta.

⁴Pakuti chose icho Chiuta wali kulenga nchiweme, ndipo palije icho chingakanika usange chikupokerereka na kuwonga.

⁵Pakuti ntheura chapatuliskika na mazgu gha Chiuta na lurombo.

⁶Usange ukupereka visambizgo ivi ku ŵabali, uti uŵenge muteŵeti muweme wa Khristu Yesu, wakulereka mu mazgu gha chipulikano na chigomezgo chiweme icho uli kurondezga.

⁷Kweni wukako ku vidokoni ivyo ŵanyokokuru ŵakuyowoya. Ujisambizge kuŵa wakusopa Chiuta.

⁸Pakuti kusambizga thupi pa vya masoŵero kuli na chandulo chichoko waka, kweni kujisambizga kusopa Chiuta, kuli na chandulo chikuru. Chifukwa kuli phangano la vya umoyo uno pera chara, kweniso na vya umoyo uwo ukwiza.

⁹Kayowoyero aka nkhakuneneska ndipo nkhakwenera chizomerezgo chose.

¹⁰Pakuti ku ichi tikutokatoka na kulimbalimba, chifukwa tili na chigomezgo icho chili mwa Chiuta wamoyo uyo ndi Muponoski wa ŵanthu wose, chomenechomene awo ŵakugomezga.

¹¹Uŵalangure na kuŵasambizga vyeneivi.

¹²Paŵavye munthu wayuyure uwukirano wako, kweni ujizgore kuŵa bambiro ku ŵakhristu wose mu kayowoyero, mu kakhaliro, mu kutemwa, mu chipulikano na mu utozi.

¹³Uŵike mtima pakuŵaŵazgira ŵanthu malembo, ndipo uŵapharazgire na kuŵasambizga ndisuke ndize.

¹⁴Ungazerezganga chawanangwa icho uli nacho ndipo chikapika kwa iwe na mazgu gha uchimi apo ŵarara ŵa mpingo ŵakaŵikangapo mawoko pa iwe.

¹⁵Uzgoŵere kuchita milimo iyi ndipo ujipereke ku vyeneivyo, mwakuti ŵanthu wose ŵawone kuti uteŵeti wako ukukura.

¹⁶Ujichenjerere iwe wamwene na ku visambizgo vyako. Koreska kuchita ntheura. Pakuti pakuchita ntheura uti ujiponoskenge wamwene na awo ŵakukupulika.