Read new_tumbuka_bible 1 Timote 5 Bible Online

1 Timote 5 - new_tumbuka_bible bible

1 Timote 5

¹Ungachenyanga munthu murara, kweni umuchiskenge nga ndi wuso. Ŵawukirano ŵanyako ukharenge nawo makora nga mbanung'una wako,

²ŵakaziŵakuru nga mba nyoko, nga mbadumbu wako mu utuŵa wose.

³Uvichindikenge vyokoro ivyo ndi vyokoro nadi.

⁴Kweni usange chokoro chili na ŵana panji ŵazukuru, ŵana awo ŵayambe kusambira kufiska nchito zakuyana na usopisopi wawo ku mbumba yawo pakuwezgerapo ivyo ŵakatora ku ŵapapi ŵawo. Pakuti ichi ndicho nchakuzomerezgeka panthazi pa Chiuta.

⁵Chokoro icho ndi chokoro nadi ndipo chilije munthu wakuchovwira, chikuŵika chigomezgo chakhe chose mwa Chiuta, na kurutilira na maŵeyerero na malurombo muhanya na usiku.

⁶Kweni chokoro icho chikujikondweska na vya charu chili kufwa kale nanga chingaŵa chamoyo.

⁷Uŵandulire vinthu ivi mwakuti ŵaŵenge ŵambula kalema.

⁸Usange munthu yunji wareka kuŵawovwira ŵabali ŵakhe, chomenechomene ŵa mu mbumba yakhe, ndiko kuti wakana chipulikano chakhe, ntheura ndi muheni kwakuruska wambula kupulikana.

⁹Kuŵavye mwanakazi wakulembeka kuti ndi chokoro pambere wandakwaniske virimika 60, ndipo waŵe uyo wali kutengwapo kwa mwanarume yumoza pera.

¹⁰Waŵe wa lumbiri luweme pa milimo yakhe yiweme, nga ndi uyo wakapwerereranga makora ŵana ŵakhe panji wakapokereranga ŵalendo, wakageziskanga malundi gha ŵakhristu, wakovwiranga ŵanthu awo ŵakaŵa mu visuzgo, ndipo uyo walera makora ŵana ŵakhe kuchita mlimo wose uweme.

¹¹Ureke kulemba vyokoro ivyo vichali viwukirano, pakuti para mathupi ghawo ghayamba kulamphalampha, ŵakupatukako kwa Khristu na kukhumba kutengwa.

¹²Ntheura vikususkika chifukwa chakuswa phangano lawo lakudanga.

¹³Ndiposo ŵakusambira ukata pakwendendeka ku nyumba iyi na iyi ndiposo mbakata pera chara, kweniso ŵakusesa, na kuŵa ŵamwendanato, ndipo ŵakwamba kuyowoya vinthu ivyo ŵalije kwenera kuyowoya.

¹⁴Ntheura nkhukhumba kuti vyokoro ivyo vichali viwukirano vitengweso na kubaba ŵana, ndiposo visungilire nyumba zawo, mwakuti vireke kumupa mwaŵi murwani kuti watitukenge.

¹⁵Pakuti viliko vyokoro vinji ivyo vili kupatukako kale ndipo vikurondezga nthowa ya Satana.

¹⁶Usange walipo mukhristu yunji wali na ŵabali awo ndi vyokoro rekani wovwire vyokoro ivyo, mwakuti mpingo wa Chiuta upepuskike ku uzitu uwu kuti wovwirenge vyokoro ivyo ndi vyokoro nadi.

¹⁷Rekani ŵarara ŵa mpingo awo ŵakuchita makora mlimo wawo, ŵapimike kuti mbakwenerera nchindi zikuru, chomenechomene awo ŵakupharazga mazgu gha Chiuta na kusambizga.

¹⁸Pakuti malembo ghakuti, “Mureke kukaka mlomo wa nkhaŵi iyo yikubula tirigu,” ghakutiso, “Wanchito wakwenerera kupokera njombe yakhe.”

¹⁹Ureke kupulikira ku ivyo ŵakumupacha navyo murara wa mpingo kwambula kuti vyakhozgeka na ŵakaboni ŵaŵiri panji ŵatatu.

²⁰Awo ŵakurutilira mu kwananga, ŵachenye pa maso pa wose, mwakuti ŵanyawo wopenge.

²¹Pa maso pa Chiuta, na pa Khristu Yesu, ndiposo pa ŵangelo ŵakusoreka, nkhukulayizga kuti usunge malangulo agha kwambula kweruzgira lwande, na kuchita kwambula kutemwera.

²²Ureke kuchitira mu luŵiro pakuŵika mawoko pa munthu nesi kusangana na zakwananga za ŵanthu ŵanji, kweni ujisunge mu utuŵa wako.

²³Ungamwanga maji pera, kweni umwengepo na vinyo lichoko waka kuti wovwirike ku suzgo lako la mu nthumbo na maurwari agho ukuŵa nagho kaŵirikaŵiri.

²⁴Zakwananga za ŵanthu ŵanji zili pakweru, ndipo zikurazga ku weruzgi. Kweniso ŵaliko ŵanji awo zakwananga zawo zikwiza kawoneka pamanyuma.

²⁵Ntheura pera milimo yiweme nayo yikuwoneka waka pakweru, nanga ndi iyo yilije kuwoneka pakweru, kuti yingabisika chara.