Read new_tumbuka_bible 1 Timote 6 Bible Online

1 Timote 6 - new_tumbuka_bible bible

1 Timote 6

¹Rekani wose awo ŵali mu goliwoli la uzga ŵapereke nchindi ku ŵene-nchito ŵawo, mwakuti zina la Chiuta na visambizgo vyakhe vireke kutukika.

²Awo ŵali na ŵene-nchito ŵakhristu, ŵareke kuyuyurika pakuti mbabali mu chipulikano. Kweni ŵakwenera kuŵateŵetera makora, pakuti awo ŵakusanga chandulo mu kuteŵeta kwawo, mbakupulikana na ŵakutemweka. Ivi ndivyo ukwenera kuŵasambizga na kuŵachiska.

³Usange munthu yunji wakusambizga vinthu vinyakhe ndipo wakuzomerezgana chara na mazgu gha unenesko gha Fumu yithu Yesu Khristu na chisambizgo icho chikuyana na kusopa Chiuta,

⁴wakujitukumura na kumanya kalikose chara. Ngwakutimbanizgika mu kaghanaghaniro ndipo wakukhumba kususkana na kwambana na ŵanthu pa chifukwa cha mazgu. Vya ntheura vikuwuska sanje, kureka kupulikana, kusekana na kughanaghanirana viheni,

⁵na kususkana kwambula kumara mukati mu ŵanthu awo maghanoghano ghawo kuti ghakwenda makora chara, ndipo unenesko kuti ulimoso mwa iwo chara. Iwo ŵakupima kuti chisopo ndi nthowa yakusambazgiramo.

⁶Kusopa Chiuta na kukhorwa na ivyo munthu wali navyo, nkhwa chandulo chikuru.

⁷Pakuti tikizamo na kanthu kalikose chara mu charu, ndipo tifumengemo na kanthu kalikose chara.

⁸Kweni usange tili navyo vyakurya na vyakuvwara, ndi vyakukwanira kwa ise.

⁹Kweni awo ŵakukhumba kuŵa ŵasambazi ŵakuwa mu viyezgo na kuwira mu vipingo vya makhumbiro ghanandi gha uchindere na ghakupweteka, agho ghakuŵanjizga mu pharaniko na kutayika.

¹⁰Pakuti kutemwa ndarama nchisinkho cha mauheni ghose. Pakunweka kuŵa na usambazi, ŵanji ŵali kupuruskika ku chipulikano chawo ndipo ŵali kujipweteka mu mitima na vyakuŵinya vinandi.

¹¹Kweni iwe, wa munthu wa Chiuta, vichimbire vyose vyeneivi. Mtima wako uŵe wakupenja urunji, kusopa Chiuta, chipulikano, kutemwa, kukhwima na kuzika.

¹²Urwenge nkhondo yiweme ya chipulikano, koreska umoyo wa muyirayira, weneuwo ukachemekerapo para ukazomera na kuphara chipulikano chako panthazi pa ŵakaboni ŵanandi.

¹³Panthazi pa Chiuta uyo wakupereka umoyo ku vinthu vyose, na pa Khristu Yesu uyo mu ukaboni wakhe panthazi pa Pontiyo Pilato wakapereka chizomerezgo chiweme.

¹⁴Nkhukulangula kuti usungilire vyeneivi kwambula banga panji kalema, mpaka Fumu yithu Yesu Khristu yizeso.

¹⁵Ivi vizamkuwoneka pa nyengo yiweme na Chiuta wa uchindami uyo yekha ndi Muwusi wa vyose, Karonga wa ŵakaronga na Fumu ya mafumu.

¹⁶Iyo yekha ngwa kukhalirira ndipo wakukhara mu ungweru uko munthu kuti wangasenderako chara. Palije munthu uyo wali kumuwonapo, panji nesi wangamanya kumuwona. Kwa iyo kuŵenge nchindi na muwuso wa muyirayira! Ameni.

¹⁷Uŵalangure awo mbasambazi mu charu, kuti ŵareke kujikuzga nanga nkhugomezga mu usambazi wambula kukhora, kweni ŵagomezge mwa Chiuta uyo wakupereka kwa wanangwa vyose ivyo tikukondwa navyo.

¹⁸Uŵalangure kuti ŵachitenge uweme, kuti ŵaŵenge ŵasambazi mu milimo yiweme, kuti ŵaŵenge ŵanangwa ku ŵanthu wose na kusangana na ŵanyawo ivyo ŵali navyo.

¹⁹Pakuchita ntheura ŵamkujiwunjikira usambazi uwo uli nga ndi lufura luweme lwa umoyo wa kunthazi, mwakuti ŵakapokerere umoyo uwo ngwenecho nadi.

²⁰Iwe Timote, sungilira makora icho chili kukorezgeka kwa iwe. Upatukeko ku mphindano zawakawaka za mu charu na kususkana kwa uchindere, uko ŵanji ŵakuti ndi mahara kweni kuti ndi mahara chara.

²¹Pakuti ŵanji awo ŵakujiphara kuti ŵali na mahara, ŵali kutaya chipulikano chawo. Uchizi uŵenge nawe.