Read new_tumbuka_bible 2 Timote 1 Bible Online

2 Timote 1 - new_tumbuka_bible bible

2 Timote 1

¹Kufuma kwa ine Paulosi, wakutumika wa Khristu Yesu na khumbo la Chiuta kwakuyana na phangano la umoyo uwo uli mwa Khristu Yesu.

²Kwa Timote mwana wane wakutemweka. Uchizi, lusungu na mutende vyakufuma kwa Chiuta Dada na Khristu Yesu Fumu yithu.

³Nkhuwonga Chiuta mweneuyo nkhumuteŵetera na njuŵi yiweme nga ndi umo ŵakachitira ŵasekuru ŵane, para nkhukumbuka iwe kwambula kureka mu malurombo ghane muhanya na usiku.

⁴Para nkhukumbuka masozi ghako, nkhunweka chomene kuti ndikuwone mwakuti ndizure na chimwemwe.

⁵Nkhukumbuskika na vya chipulikano chako chenecho icho nchambula upusikizgi, chipulikano ichi chikadanga kuŵa mwa Loyisi ŵanyokokuru, na mwa Yunike ŵanyoko, ndipo nkhufikapo kuti chipulikano ichi chikukhara na mwa iwe wuwo.

⁶Ntheura nkhukukumbuska kuti, uchikhuŵirizge chawanangwa cha Chiuta icho chili mwa iwe kwizira mukuŵikapo mawoko ghane.

⁷Pakuti Chiuta kuti wakatipa Mzimu wakutipa wofi chara, kweni Mzimu wakutipa nkhongono, kutemwa na kujikora.

⁸Ntheura ureke kuŵa na soni pakuŵa kaboni wa Fumu yithu, panji na ine mukayidi wakhe, kweni usangane nane mu visuzgo chifukwa cha Uthenga Uweme mu nkhongono ya Chiuta,

⁹uyo wakatiponoska na kutichema na nchemo yituŵa, kwakuyana na milimo yithu chara, kweni kwakuyana na dazgo na uchizi wakhe, uwo ukapika kwa ise mwa Khristu Yesu kale chomene.

¹⁰Ndipo sono kwarongoreka pakuwoneka kwa Muponoski withu Khristu Yesu, mweneuyo wakamarizga nyifwa na kwiza na umoyo wambulara kuvunda mu Uthenga Uweme.

¹¹Chifukwa cha Uthenga Uweme weneuwu nkhimikika kuŵa mupharazgi, wakutumika na musambizgi.

¹²Ndipo ntheura nkhukomwa mu vinthu ivi. Kweni kuti ndili na soni chara chifukwa nkhumanya mweneuyo ndili kupulikana nayo ndipo nkhugomezga kuti wali na nkhongono za kusungilira icho wandikorezga kufikira zuŵa lira.

¹³Rondezga chirongorero cha mazgu gha unenesko agho wapulika kwa ine, mu chipulikano na mu kutemwa ivyo vili mwa Khristu Yesu.

¹⁴Sungilira unenesko uwo uli kukorezgeka kwa iwe na Mzimu Mutuŵa uyo wakukhara mwa ise.

¹⁵Ukumanya kuti wose awo ŵali mu Asiya ŵali kundireka. Mukati mwawo muli Fugelo na Heremogene.

¹⁶Fumu yilengere lusungu mbumba ya Onesiforo, pakuti nyengo na nyengo wakawezgerangapo mtima wane ndipo wakaŵa na soni na kukakika kwane chara.

¹⁷Kweni wakati wafika ku Romu, wakandipenjiska na phamphu mpaka wakandisanga.

¹⁸Fumu yimuzomerezge kuti wizakasanga lusungu kufuma kwa Fumu pa zuŵa lira! Ndipo iwe ukumanya makora uteŵeti wose uwo wakapereka ku Efeso.