Read new_tumbuka_bible 2 Timote 2 Bible Online

2 Timote 2 - new_tumbuka_bible bible

2 Timote 2

¹Ntheura iwe wa mwana wane, uŵe wankhongono mu uchizi uwo uli mwa Khristu Yesu,

²ndipo icho ukapulika kwa ine panthazi pa ŵakaboni ŵanandi, ndipo uchikorezge ku ŵanthu ŵakugomezgeka awo nawo ŵangamanya kusambizga ŵanyawo.

³Usangane nane mu visuzgo, nga ndi musilikari muweme wa Khristu Yesu.

⁴Musilikari uyo wali pa mlimo wakujitangwaniska na ivyo ŵakuchita ŵanthu waka chara, chifukwa wakukhumba kukondweska uyo wakamulemba.

⁵Munthu uyo wakuchita masoŵero gha chipharizgano cha kuchimbira, kuti wakumanya kupoka mphumphu chara usange wakureka kusungilira marango gha chipharizgano.

⁶Ndipo mulimi uyo wakutokatoka chomene pa mlimo wakhe ndiyo wakudanga kupoka chigaŵa cha vipambi.

⁷Ughanaghanenge na ivyo nkhuyowoya pakuti Fumu yiti yikovwire kuti vyose uvipulikiske.

⁸Ukumbukenge Yesu Khristu wa mu mphapu ya Davide, mweneuyo wakawuka ku ŵakufwa, umo wakupharazgikira mu Uthenga wane Uweme.

⁹Chifukwa cha Uthenga Uweme uwu nkhuvwara maunyoro nga nchigeŵenga. Kweni mazgu gha Chiuta kuti ngakukakika chara.

¹⁰Ntheura nkhuzizipizga vyose chifukwa cha ŵakusoreka kuti nawo ŵapokere chiponosko icho chili mwa Khristu Yesu pamoza na uchindami wa muyirayira.

¹¹Kayowoyero aka nkhakuneneska ako kakuti, “Usange tafwa pamoza nayo, tiŵengeso ŵamoyo pamoza nayo.

¹²Usange tikuzizipizga, tiwusengeso pamoza nayo. Usange tikumukana, iyo nayo wizamkutikana.

¹³Usange tikugomezgeka chara, iyo wakukhalirira mu kugomezgeka, pakuti wakujikana yekha chara.”

¹⁴Uŵakumbuskenge ŵanthu pa ivi ndipo uŵachenjezge panthazi pa Fumu kuti ŵareke kupindana pa vya mazgu, ivyo vikovwira chara, kweni vikuŵananga ŵakupulikizga.

¹⁵Uyezge chomene kujirongora kwa Chiuta nga wakuzomerezgeka, wanchito wambula kukhozgeka soni, na wakukhora makora mu Mazgu gha unenesko gha Chiuta.

¹⁶Kweni upatukeko ku mphindano zawakawaka, pakuti chitolerenge ŵanthu mukurutilira mu uchikana Chiuta.

¹⁷Ndipo mazgu ghawo ghati ghanyeke nga chilonda cha zoza. Ŵanji mwa ŵanthu aŵa ndi Himenaya na Fileto.

¹⁸Iwo ŵali kupuruka kufuma ku nthowa ya unenesko, ndipo ŵakuti kuwuka ku ŵakufwa kuli kujumpha kale. Ŵakutimbanizga chipulikano cha ŵanji.

¹⁹Kweni lufura lwakukhora lwa Chiuta lukukhalirira, ndipo luri na chidindo chakulembeka kuti, “Fumu yikuŵamanya awo mbakhe” ndipo “Yose uyo wakuzunura zina la Fumu, wapatukeko ku ubendezi.”

²⁰Mu nyumba yikuru kuti mukukhara viŵiya vya golide na vya siliva pera chara, kweniso muli viŵiya vya makuni na vya dongo. Vinyakhe vya nchito yakuzirwa ndipo vinyakhe vya nchito ya kuyuyuka.

²¹Usange munthu wakujiphotora ku mauheni ghose agha, wati waŵenge nga ndi chiŵiya cha nchito yakuzirwa. Sono wati waŵenge wakupatulika na wakukhumbikwa chomene kwa mwenecho wa nyumba na wakunozgeka kuteŵeta mlimo uliwose uweme.

²²Ntheura wukako ku makhumbiro gha uwukirano wako ndipo urato wako uŵe pa urunji, chipulikano, kutemwa na mutende pamoza na awo ŵakuchema Fumu na mtima wakutowa.

²³Ureke kuŵapo pa mphindano za kupusa na zambula kupulikikwa, pakuti ukumanya kuti zikuwuska zawe.

²⁴Ndipo muteŵeti wa Fumu wareke kuŵa wa mbembe kweni waŵenge na lusungu ku waliyose, kuŵa musambizgi wakufikapo na wakuzizipizga,

²⁵mweneuyo na mtima wakuzika wakuŵarongozga awo ŵakususkana nayo, panji Chiuta wangaŵapa mwaŵi kuti ŵang'anamuke na kumanya unenesko,

²⁶ndipo ŵangafwanthamuka ku chipingo cha Satana uyo wakaŵakora, mwakuti ŵachitenge ivyo wakukhumba.