Read new_tumbuka_bible 2 Timote 3 Bible Online

2 Timote 3 - new_tumbuka_bible bible

2 Timote 3

¹Kweni umanye ichi kuti mazuŵa gha umaliro, nyengo zinonono ziti zizenge.

²Pakuti ŵanthu ŵati ŵaŵenge ŵakujitemwa, ŵakutemwa ndarama, ŵakujikuzga, ŵakujiŵikamo, ŵakutuka Chiuta, ŵambula kupulikira ŵapapi, ŵambula kuwonga, ŵabendezi,

³ŵambula kutemwa ŵanyawo, ŵanonono, ŵa kusesa, ŵambula kujikora, ŵakari, ŵakutinkha uweme,

⁴ŵakwendera mphiska ŵanyawo, ŵakajilange, ŵakuzura na kujikuzga, ŵakutemwa kujikondweska kuruska kutemwa Chiuta,

⁵ŵakukora luso lwa chisopo, kweni ŵakukana nkhongono yakhe. Upatukeko ku ŵanthu ŵa ntheura.

⁶Pakuti ŵanji mukati mwawo ŵakunjira mu nyumba za ŵanthu na kupusika ŵanakazi ŵatechitechi awo mbakunyekezgeka na zakwananga, ndipo ŵakuguzika na makhumbiro ghakupambanapambana.

⁷Ŵanakazi awo ŵakupulikizga ku waliyose ndipo kuti ŵangafika pakuwumanya unenesko chara.

⁸Nga ndi umo Yane na Yambure ŵakasuskira Mozesi, ntheura ndimo ŵanthu aŵa nawo ŵakususkira unenesko, ŵanthu ŵa maghanoghano ghakwanangika ndipo ŵali na chipulikano cha utesi.

⁹Kweni ŵati ŵarutilire chara, pakuti waliyose wati wawonenge pakweru kupusa kwawo nga ndi umo ŵakachitira Yane na Yambure.

¹⁰Sono iwe warondezga kusambizga kwane, nkharo yane, urato wane wa umoyo, chipulikano chane, kuzizipizga kwane, kutemwa kwane, kukhwima kwane,

¹¹kuzikizgika kwane, visuzgo vyane. Ukumanya ivyo vikandiwira mu Antiyoke, ku Ikoniya ndipo na ku Lisitira uko nkhazikizgika chomene. Ndipouli Fumu yikandithaska ku vyose vyeneivi.

¹²Nadi wose awo ŵakukhumba kuŵa ŵasopisopi mwa Khristu Yesu, ŵati ŵazikizgikenge.

¹³Kweni ŵanthu ŵaheni na ŵakupusika, ŵati ŵarutilire mu uheni wawo, kupusika ŵanyawo na kujipusika iwo ŵenecho.

¹⁴Kweni kwakuyana na iwe, rutilira mu ivyo uli kusambira na kuvigomezga nkhanirankhanira mbunenesko pakuti ukuŵamanya awo ŵakakusambizga,

¹⁵ndipo kuti kwamba ku wanichi wako, uli kumanya Malembo Ghatuŵa agho ghakumanya kukufiska ku mahara agho ghangakusambizga vya chiponosko kwizira mu chipulikano mwa Khristu Yesu.

¹⁶Malembo ghatuŵa ghose ghali kukhuŵirizgika na Chiuta ndipo nga chandulo pakusambizga, ghakuchenya uyo wasovya, kunozga na kusambizga mu unenesko,

¹⁷Mwakuti munthu wa Chiuta, waŵenge wakufikapo wakunozgekera nkhanira mlimo wose uweme.