Read new_tumbuka_bible 2 Timote 4 Bible Online

2 Timote 4 - new_tumbuka_bible bible

2 Timote 4

¹Nkhukulangula pa maso pa Chiuta na Khristu Yesu uyo wizamkweruzga ŵamoyo na ŵakufwa, ndipo chifukwa cha kwiza kwakhe na Ufumu wakhe.

²Pharazga mazgu. Uŵe muhanya kupharazga, pa nyengo yiweme na pa nyengo yiheni. Uŵakhorweske ŵanthu, uŵachenye na kuŵachiska. Uŵe wambula kutondeka mu kuzizipizga na mu kusambizga.

³Pakuti nyengo yikwiza apo ŵanthu ŵamkukana kutegherezga ku chisambizgo chenecho, kweni pakuŵa na makutu ghakunyenyera ŵamkujiwunjikira ŵasambizgi ŵakuyana na makhumbiro ghawo,

⁴ŵamkureka kupulika unenesko na kupulikizga ku vidokoni.

⁵Kweni iwe, khara wakunozgeka nyengo zose, zizipizga visuzgo, chita mlimo wakupharazga, fiska uteŵeti wako.

⁶Kweni ine ndili muchanya kupereka umoyo wane pa jochero nga ndi sembe ndipo nyengo yane yakuwukiramo yafika.

⁷Ndarwa nkhondo yiweme, ndafiska chipharizgano chane ndiposo ndasungilira chipulikano chane.

⁸Kweni sono yili kundiŵikira mphumphu ya urunji, iyo Fumu mweruzgi wa urunji, yamkundipa pa zuŵa la weruzgi. Ndipo yamkundipa ine pera chara, kweni na ŵanthu wose awo ŵakutemwa kwizaso kwakhe.

⁹Yezga chomene kuti wize luŵiro kwa ine.

¹⁰Chifukwa Dema pakutemwa charu ichi cha lero wali kundireka na kuruta ku Tesalonika. Keresene wali kuruta ku Galatiya ndipo Tito wali kuruta ku Dalamatiya.

¹¹Luka pera ndiyo wali nane. Umutore Mariko ndipo wize nayo kuno chifukwa ngwa nchito chomene pakuteŵetera ine.

¹²Tikiko ndamutuma ku Efeso.

¹³Para ukwiza unditorereko chakuvwara chane icho nkhachireka na Karapo pa dowoko la Turowa ndiposo na mabuku ghane, chomenechomene ghara gha vikumba.

¹⁴Alekizandara mufuzi wa mkuŵa, wali kundipweteka chomene. Fumu yamkumuwezgera kwakuyana na ivyo wali kuchita.

¹⁵Iwe nawe uchenjere nayo chifukwa wakasuska chomene Uthenga withu.

¹⁶Pakujivikirira kwane kwa pakudanga, pakaŵavye wakundovwira, wose ŵakandigwentha na kundireka ndekha. Mphanyi Chiuta waŵagowokera.

¹⁷Kweni Fumu yikaŵa pamoza nane, yikandikhomeska kuti ndipharazge mazgu ghose gha Uthenga, kuti ŵamitundu wose ŵawupulike. Chiuta ndiyo wakundithaska ku mlomo wa nkharamu.

¹⁸Fumu yiti yindithaskenge ku uheni uliwose na kundiponoska ndisuke ndifike ku Ufumu wakhe wa kuchanya. Kwa iyo kuŵenge uchindami kwa muyirayira swii. Ameni.

¹⁹Umutauzge Prisira na Akwila na mbumba ya Onesiforo.

²⁰Erasito wakakhalira mu Korinte. Trofimo ndiyo nkhamureka murwari mu Mileto.

²¹Wendeske luŵiro kwiza kuno pambere nyengo ya chiwuvi yindambe. Yubulo, Pude, Lino, Kilaudiya ndiposo ŵakhristu wose ŵakukutauzga.

²²Fumu yiŵenge na mzimu wako. Uchizi uŵenge nawe.