Read new_tumbuka_bible Tito 2 Bible Online

Tito 2 - new_tumbuka_bible bible

Tito 2

¹Kweni iwe usambizgenge ivyo vikuzomerezgana na chisambizgo chenecho.

²Uŵaphalire ŵanarume ŵakuru kuti ŵakharenge ŵakujikora, ŵakujipereka, ŵakughanaghana makora, ŵakukhoma mu chipulikano, mu kutemwa na mukuzizipizga.

³Ntheura pera uŵaphalire ŵakaziŵakuru nawo kuti ŵaŵenge ŵa nchindi mu makhaliro kwa Chiuta kwakuyana na ŵanakazi ŵakutowa mu mtima. Ŵareke kuŵa ŵakusesa, panji ŵazga ŵa vyakuloŵezga. Ŵakwenera kusambizga icho nchiweme,

⁴mwakuti ŵasambizgenge nchembere kutemwa ŵafumu ŵawo na ŵana ŵawo,

⁵kuti ŵaŵenge ŵakughanaghana makora, ŵakulangwa, ŵakuteŵeta milimo ya mu nyumba zawo, ŵalusungu, ndipo ŵakupulikira ŵafumu ŵawo. Ntheura mazgu gha Chiuta kuti ghangayuyurika chara.

⁶Ntheura pera uŵaphalire ŵanarume ŵawukirano, kuti ŵaŵenge ŵakujikora.

⁷Mu vinthu vyose iwe nawe ukwenera kuŵa bambiro pakuchita nchito ziweme. Mu kusambizga kwako urongore unenesko na phamphu,

⁸ndipo mazgu ghako ghaŵenge ghakupulikikwa kuti ghareke kususkika mwakuti murwani wako wakhozgekenge soni, na kuti waŵavyenge kanthu kaheni kakuyowoya na za ise.

⁹Ŵateŵeti nawo uŵaphalire kuti ŵapulikirenge ŵene-nchito ŵawo na kuŵakhorweska mu vinthu vyose. Ŵareke kuŵa ŵankhwesa,

¹⁰nesi kwiba, kweni ŵarongore uweme wose na kugomezgeka kwenecho, mwakuti mu vyose ŵatozgenge visambizgo vya Chiuta Muponoski withu.

¹¹Pakuti Chiuta warongora uchizi wakhe kuti ŵanthu wose ŵaponoskeke,

¹²pakutisambizga kuti tireke umoyo wa kumukana Chiuta, na wa makhumbiro gha charu. Ndipo mu umoyo withu mu charu ichi tiŵe ŵakujikora, ŵarunji, na ŵa umoyo wakuchindika Chiuta.

¹³Pakuti tikulindizga chigomezgo chithu chakutumbikika chakuwoneka kwa uchindami wa Chiuta withu Chikurukuru na Muponoski Yesu Khristu.

¹⁴Iyo wakajipereka chifukwa cha ise kuti watiwombole ku ubendezi wose na kuti wajiphotorere ŵanthu ŵakhe na ŵakhe awo mbakunweka kuchita milimo yiweme.

¹⁵Vinthu ivi ndivyo ukwenera kusambizga ndipo uchiske na kuchenya na mazaza ghose. Kuŵavye munthu wakuderere iwe.