Read new_tumbuka_bible Tito 3 Bible Online

Tito 3 - new_tumbuka_bible bible

Tito 3

¹Uŵakumbuske kuti ŵalambirenge ŵakuwusa na ŵamazaza kuti ŵaŵapulikirenge na kuŵa ŵakunozgeka kuchita nchito yose yamagomezgeko.

²Ŵareke kumusesa munthu nanga nkhuŵa ŵa mbembe, kweni ŵaŵenge ŵakuzika na ŵa nchindi ku ŵanthu wose.

³Pakuti nase kale tikaŵa ŵakupusa, ŵambula kupulikira, na ŵakupuruka. Tikaŵa ŵazga ŵa makhumbiro ghaheni na vyakukondweska vyakupambanapambana. Tikatandaranga mu kuchita uheni na bina. Tikatinkhika na ŵanthu ndiposo ise nase tikatinkhananga.

⁴Kweni apo uweme na kutemwa kwa Chiuta, Muponoski withu, kukawoneka,

⁵iyo wakatiponoska, kuti mpha chifukwa cha milimo iyo tikachita mu urunji chara, kweni ndi mu chifukwa cha lusungu lwakhe na lwakhe, kwizira mwa Mzimu Mutuŵa uyo wakupereka kubabika kuphya na umoyo uphya pakusuka zakwananga zithu.

⁶Mwa Yesu Khristu Muponoski withu, Chiuta mu uzari wakhe wakapungulira Mzimu pa ise,

⁷mwakuti tiŵe ŵakurunjiskika na uchizi wakhe na kuŵa ŵahariri mu chigomezgo cha kuŵa na umoyo wa muyirayira.

⁸Kayowoyero aka nkha unenesko. Ine nkhukhumba kuti ulimbikire pa vinthu ivi, mwakuti awo ŵakupulikana na Chiuta ŵajipereke pakuchita nchito ziweme. Vyeneivi nviweme ndipo vili na chandulo ku ŵanthu.

⁹Kweni unganjirirangapo chara pa mphindano zakupusa, pakujima mafuko, pa zawe ndiposo na pakususkana na vya marango, pakuti vyeneivi nvyambula chandulo ndipo nvya wakawaka.

¹⁰Kweni za munthu uyo ngwa mphatukano, usange wachenjezgeka kamoza panji kaŵiri, ureke kwenderana nayo.

¹¹Ukumanya kuti munthu wa ntheura, ngwa kupuruka na wakwananga. Iyo wakujisuska yekha.

¹²Para ndatuma Aritema panji Tikiko kwa iwe, upusumphe kwiza kwa ine ku Nikopoli, chifukwa nkhukhumba kuti nkhakhare kwenekura pa nyengo ya chiwuvi.

¹³Yezga chomene kumovwira Zenasi, mumanyi-marango uyo pamoza na Apolo pakuwoneseska kuti kuŵavye kanthu ako ŵangakavuka pa ulendo wawo.

¹⁴Ŵanthu ŵithu nawo ŵakwenera kusambira kujipereka pakuchita milimo yiweme kuti ŵapereke wovwiri apo ukukhumbikwa. Umoyo wawo ureke kuŵa ŵambula kupambika vipambi.

¹⁵Wose awo ŵali na ine ŵakukutauzga. Unditauzgireko awo ŵakutitemwa mu chipulikano. Uchizi wa Chiuta uŵenge na imwe mose.