Read new_tumbuka_bible ŴaHebere 1 Bible Online

ŴaHebere 1 - new_tumbuka_bible bible

ŴaHebere 1

¹Mu nyengo za kale, Chiuta wakayowoyanga ku ŵasekuru ŵithu kaŵirikaŵiri na mu nthowa zakupambanapambana kwizira mu nchimi.

²Kweni mu mazuŵa gha umaliro agha, wakuyowoya kwa ise kwizira mu Mwana wakhe, mweneuyo Chiuta wakamwimika kuŵa muhaliri wa vinthu vyose. Kwiziraso mwa iyo, wakalenga charu cha kuchanya na charu cha pasi.

³Iyo ndiyo kuŵala kwa uchindami wa Chiuta, ndiposo ndiyo chikozgo chenecho cha kaŵiro ka Chiuta. Iyo ndiyo wali kukolerera vinthu vyose na mazgu ghakhe gha nkhongono. Wakati waphotora zakwananga zithu wakakhara pachanya ku woko la maryero la Ufumunkhuru.

⁴Mwana wakaŵa wakuruska ŵangelo nga ndi umo zina ilo Chiuta wakamupa, likuruskira mazina ghawo.

⁵Pakuti kasi ndi mungelo nju mweneuyo Chiuta wali kumuyowoyerapo kuti, “Iwe ndiwe Mwana wane, muhanya uno ndakubaba?” Nesi kuti, “Ine nditi ndiŵenge Wiske, ndipo iyo wati waŵenge Mwana wane.”

⁶Ndiposo para Chiuta wakutuma Mwana wakhe wa uŵere mu charu wakuti, “Rekani ŵangelo wose ŵa Chiuta ŵamulambire iyo.”

⁷Ndipo vya ŵangelo wakuti, “Iyo wakuzgora ŵangelo ŵakhe kuŵa mphepo, ndipo ŵateŵeti ŵakhe kuŵa dimi la moto.”

⁸Kweni pakuyowoya za Mwana wakhe, Chiuta wakuti, “Chizumbe chinu, Mwe Chiuta, ncha muyirayira Ndodo ya urunji ndi ndodo ya ufumu winu

⁹Mwatemwa urunji na kutinkha uheni. Ntheura Chiuta uyo ndi Chiuta wako, wakukuphakazga na mafuta gha chimwemwe kuruska ŵanyako.”

¹⁰Ndiposo: “Imwe, Mwe Fumu, ndimwe mukaŵika lufura lwa charu, kufuma pa mutendeko, ndipo vya kuchanya vyose ndi mlimo wa mawoko ghinu.

¹¹Ivi vimarenge, kweni imwe mukukhalirira. Ivi visukurukenge nga ndi malaya.

¹²Vyose ivi mwizamkuvipeteka nga ndi chidiko, ndipo vizamkusinthika. Kweni imwe muchali umo muliri, ndipo virimika vyinu kuti vimarenge chara.”

¹³Ndi mungelo nju mweneuyo Chiuta wali kumuyowoyerapo kuti, “Khara ku woko lane la maryero, ndisuke ndiŵazgore ŵarwani ŵako kuŵa chitambaliro cha malundi ghako.”

¹⁴Asi ŵangelo ndi mizimu yakuteŵetera Chiuta, yeneiyo yili kutumika kuteŵetera awo ŵakwenera kupokera chiponosko?