Read new_tumbuka_bible ŴaHebere 10 Bible Online

ŴaHebere 10 - new_tumbuka_bible bible

ŴaHebere 10

¹Ndipo pakuti dango ndi muzgezge waka wa vinthu viweme ivyo vikwiza, kuti nchikozgo chenecho cha ivyo viliko chara. Marango agha kuti ghakumanya kuŵazgora ŵanthu kuŵa ŵakufikapo chara, nangauli chirimika na chirimika ŵakasopanga na kupereka sembe zawo kwa Chiuta.

²Ŵanthu ŵakusopa Chiuta ŵara, ŵatozgekenge nadi ku zakwananga zawo, mphanyi wakuŵaso na njuŵi ya zakwananga chara kuŵenge kuti wakutozgeka nadi asi mphanyi ŵali kureka kupereka sembe zawo?

³Kweni mu sembe izi muli chikumbusko cha zakwananga cha chirimika na chirimika.

⁴Pakuti ndopa za nkhambako na za mbuzi kuti zingamanya kuwuskapo zakwananga chara.

⁵Ndicho chifukwa para Khristu wakiza mu charu, wakati, “Sembe na vyakupereka, kuti mukuvikhumba chara, kweni mukandinozgera thupi.

⁶Sembe zakocha mburuma na sembe za zakwananga, kuti mukakondwa nazo chara.

⁷Penepapo nkhati, ‘Ndine pano! Ndiza kwiza kachita khumbo linu, Mwe Chiuta, nga ndi umo kuli kulembekera na za ine mu Buku la Marango.’ ”

⁸Pakudanga wakati, “Sembe panji vyakupereka, sembe zakocha mburuma, nesi sembe zakupereka chifukwa cha zakwananga, kuti mukazikhumba nesi kukondwa nazo chara.” Ivi ndivyo marango ghakuyowoya kuti viperekekenge.

⁹Penepapo wakayowoyaso kuti, “Ndine pano! Ndiza kwiza kachita khumbo linu, mwe Chiuta.” Ntheura Chiuta wakuwuskapo sembe yakudanga yira mwakuti waŵike sembe ya chiŵiri.

¹⁰Chifukwa cha khumbo lira tili kutozgeka na sembe ya thupi la Yesu Khristu ilo wakapereka kamoza pera.

¹¹Ndipo musofi waliyose wakwimilira na kuteŵeta zuŵa na zuŵa, ndipo wakupereka sembe zeneizo pera nyengo zinandi izo kuti zikumanya kuwuskapo zakwananga chara.

¹²Kweni Khristu wakati waperekerathu kwa nyengo zose sembe yimoza pera ya zakwananga, wakakhara pasi ku woko la maryero la Chiuta kwa muyirayira.

¹³Sono wakulindirira kwenekura wasuke wazgore ŵarwani ŵakhe kuŵa chitambaliro cha malundi ghakhe.

¹⁴Pakuti na sembe yimoza pera, Khristu wali kuŵazgora ŵanthu awo ŵali kutozgeka ku zakwananga zawo kuŵa ŵakufikapo kwa muyirayira.

¹⁵Mzimu Mutuŵa nayo wakutipanikizgira ichi. Pakuti wakati wayowoya kuti,

¹⁶“Ili ndi phangano ilo ndamkuchita nawo, pamanyuma pa mazuŵa gheneghara. Ndamkuŵika marango ghane mu mitima yawo, ndipo ndamkughalemba mu maghanoghano ghawo. Ntheura ndimo yikuyowoyera Fumu.”

¹⁷Wakusazgirako kuti, “Nditi ndikumbukeso zakwananga zawo chara, nanga nkhukumbuka maubendezi ghawo.”

¹⁸Para Chiuta wagowokera zakwananga zawo, kuti pakukhumbikwaso sembe yakupereka chifukwa cha zakwananga chara.

¹⁹Ntheura mwa ŵabali ŵane, tili na chigomezgo chikuru kuti tamkunjira mu Malo Ghakupatulika Nkhanira na ndopa za Yesu.

²⁰Iyo wakatijulira nthowa yiphya na yamoyo iyo yikuporota mu chisalu chakuchinga, icho ndi thupi lakhe.

²¹Ndiposo pakuti tili na musofi mukuru wa mazaza pa Nyumba ya Chiuta,

²²tiyeni tisenderere kufupi na mtima wa unenesko mu chipanikizgo chose cha chipulikano na mitima yakutozgeka mbee kufuma ku njuŵi ziheni ndipo na mathupi agho ghakusukika na maji ghaweme.

²³Tikoreske chipulikano chithu icho tikuzomera, pakuti Chiuta uyo wakachita phangano ili, ngwa kugomezgeka.

²⁴Tighanaghane na umo tingachiskirana kurongora kutemwana na kuchitirana milimo yiweme.

²⁵Tingakharanga chara ku maungano ghithu nga ndi umo ŵanji ŵakuchitira, kweni tichiskanenge yumoza na munyakhe chomenechomene para tikuwona kuti zuŵa la Fumu likuneng'enera.

²⁶Usange tikwanangira dala apo tikumanya unenesko, kulije sembe yinyakhe iyo yingaperekeka kuti yiwuskeko zakwananga zithu.

²⁷Kweni icho chakharako ndi weruzgi uwo ngwakofya na kugolera kwa moto uwo wizamkocha awo ŵakwimikana na Chiuta.

²⁸Munthu uyo wakakananga kupulikira Dango la Mozesi, wakakomekanga kwambula lusungu panthazi pa ŵakaboni ŵaŵiri panji ŵatatu.

²⁹Sono ghanaghanani na ukuru wa chilango cha munthu uyo wakuyuyura Mwana wa Chiuta, ndopa za phangano la Chiuta kuŵa za waka, zeneizo wakatuŵiskikiramo ndipo wakutuka Mzimu wa uchizi!

³⁰Pakuti tikumumanya uyo wakati, “Nduzga nzane, ine ndine ndizamkuwezgera.” Ndipo wakuyowoyaso kuti, “Fumu yizamkweruzga ŵanthu ŵakhe.”

³¹Ndi chinthu chakofya chomene kuwira mu mawoko gha Chiuta wamoyo.

³²Kweni kumbukani mazuŵa gha kale, apo mukati mwangweruskika, mukazizipizga chomene mu viphyo, kweni kuti mukawa nkhumbi chara.

³³Nyengo zinyakhe ŵakamusunjizgani pa maso pa ŵanthu na kumusuzgani, ndiposo pa nyengo zinyakhe mukasangana na ŵanthu awo ŵakasunjizgikanga.

³⁴Mukaŵalengeranga lusungu ŵanthu awo ŵakaŵa mu gadi. Ndipo na kukondwa, mukazomerezga kuti vinthu vyinu viphangike, pakumanya kuti muli na vinthu viweme vya kuruska na vyakukhalirira.

³⁵Ntheura mureke kutaya chigomezgo chinu pakuti ndicho njombe yikuru.

³⁶Mukwenera kuŵa ŵakuzizipizga kuti muchite khumbo la Chiuta, na kupokera ivyo wakulayizga.

³⁷Pakuti Malembo ghakuti, “Pakhara kanyengo kachoko waka, ndipo uyo wakwiza, wizenge, na kuti wati waziurike chara.

³⁸Kweni murunji wane wati waŵenge wamoyo, kwizira mu chipulikano. Kweni usange wakuwerera nyuma, kuti mtima wane ukondwenge nayo chara.”

³⁹Kweni ise kuti tili nga ndi ŵanthu ŵakuwerera nyuma, ndipo ŵali kutayika chara. Kweni ndise ŵanthu awo ŵali na chipulikano ndipo ŵakusunga mizimu yawo.