Read new_tumbuka_bible ŴaHebere 11 Bible Online

ŴaHebere 11 - new_tumbuka_bible bible

ŴaHebere 11

¹Chipulikano chikutipanikizgira vinthu ivyo tikuvigomezga waka ndipo chikutipanikizgira ivyo nvyambula kuwoneka.

²Pakuti ŵanthu ŵamwaka ŵakazomerezgeka na Chiuta chifukwa cha chipulikano.

³Na chipulikano, tikumanya kuti charu chikalengeka na mazgu gha Chiuta, mwakuti icho chikuwoneka chikapangika kufuma mu vinthu vyambula kuwoneka.

⁴Na chipulikano, Abelu wakapereka kwa Chiuta sembe yakuzomerezgeka kuruska ya Kayini. Na sembe iyi wakapokera chipanikizgo kuti ndi murunji. Chiuta wakapanikizgira ichi pakupokerera vyawanangwa vyakhe. Abelu wali kufwa kweni na chipulikano, wachali kuyowoya.

⁵Na chipulikano, Enoki wakatorekera kuchanya mwakuti wareke kufwa. Wakasangika chara chifukwa Chiuta wakamutora. Ntheura pambere wandatorekere kuchanya, wakapanikizgika kuti wakakondweska Chiuta.

⁶Ndipo kwambula chipulikano tingamanya kukondweska Chiuta chara. Pakuti yose uyo wakwiza kwa Chiuta, wakwenera kupulikana kuti Chiuta waliko, na kutiso wakuŵapa njombe awo ŵakumupenja iyo.

⁷Na chipulikano Nowa, wakati wachenjezgeka na Chiuta pa vinthu ivyo vikaŵa vichali vindawoneke, wakapulikira ndipo wakapanga ngaraŵa yakuti waponoskeremo mbumba yakhe. Ntheura wakasuska charu ndipo iyo wakazgoka muhaliri wa urunji uwo ukwiza chifukwa cha chipulikano.

⁸Na chipulikano, Abrahamu wakapulikira para Chiuta wakamuchema kuti warute ku malo gheneagho wakenera kupokera nga chiharo chakhe. Abrahamu wakaruta nangauli wakamanya chara uko wakarutanga.

⁹Na chipulikano, wakakhara nga ndi mulendo mu charu icho Chiuta wakapangana kumupa. Wakakharanga mu mahema pamoza na Yisake na Yakhobe ŵahariri ŵamoza nayo mu phangano lenelira.

¹⁰Pakuti Abrahamu wakalindiriranga msumba uwo uli na lufura lweneulo uyo wakazenga na kupanga ndi Chiuta.

¹¹Na chipulikano, Sara wakapokera nkhongono zakuŵira na nthumbo nanga virimika vyakhe vyakubabira mwana vikajumpha. Pakuti wakamupima wamagomezgeko uyo wakapangana nayo.

¹²Ntheura kufumira ku munthu yumoza mweneuyo wakaŵa nga ngwa kufwa, mukafuma ŵana, unandi nga ndi nyenyezi za mu mlengalenga, na ŵambula kupendeka nga ndi muchenga wa mu mphepete mwa nyanja.

¹³Ŵanthu wose aŵa ŵakafwira mu chipulikano kwambula kupokera vinthu ivyo Chiuta wakapangana. Kweni ŵakaviwonera waka patali na kuvipokera. Ndipo ŵakazomera kuti ŵakaŵa ŵalendo na ŵakupanjwa waka pa charu.

¹⁴Ŵanthu awo ŵakuyowoya ntheura, ŵakurongora pakweru kuti ŵakupenja charu chawo na chawo.

¹⁵Usange ŵaghanaghanenge na charu chira ŵakafumako, mphanyi ŵakaŵa na mwaŵi wakuwererako.

¹⁶Kweni na umo viliri ŵakukhumba charu chiwemiko, ndicho charu cha kuchanya. Ntheura Chiuta kuti wali na soni chara para ŵakumuchema kuti ndi Chiuta wawo, chifukwa iyo wali kuŵanozgera iwo msumba.

¹⁷Na chipulikano, Abrahamu, para wakayezgeka, wakamupereka Yisake kuŵa sembe. Ndipo iyo mweneuyo wakapokera mapangano wakaŵa wakunozgeka kupereka mwana wakhe yekha na yekha,

¹⁸mweneuyo kukayowoyeka kuti, “Ndi mwa Yisake umo mphapu yako yichemekerenge.”

¹⁹Abrahamu wakapulikana kuti Chiuta wangawuska ŵanthu nanga nkhu nyifwa. Ntheura pakuyowoyera mu ntharika, tingayowoya kuti wakamupokerera mwana wakhe kufuma ku ŵakufwa.

²⁰Na chipulikano, Yisake wakatumbika Yakhobe na Esau na vinthu ivyo vyamkuŵachitikira kunthazi.

²¹Na chipulikano, Yakhobe wakatumbika ŵana ŵa Yosefe yumozayumoza para wakaŵa pafupi kufwa, apo wakasindamira pa ndodo yakhe uku wakusopa Chiuta.

²²Na chipulikano, Yosefe ku umaliro wa umoyo wakhe wakayowoya na vya kufuma kwa ŵaIsraele mu Eguputo ndipo wakaŵaphalira icho ŵakenera kuchita na viwangwa vyakhe.

²³Na Chipulikano, Mozesi wakati wababika, ŵapapi ŵakhe ŵakamubisa myezi yitatu, chifukwa ŵakawona kuti wakaŵa wakutowa chomene. Iwo kuti ŵakawopanga dango la karonga chara.

²⁴Na chipulikano, Mozesi wakati wakura, wakakana kuchemeka kuti ndi mwana wa mwana mwanakazi wa Faro.

²⁵Wakasankha kusuzgikira pamoza na ŵanthu ŵa Chiuta kuruska kuti wakondwere kwa nyengo yichoko waka na vyakusekereska vya uheni.

²⁶Wakapima kuti kusunjizgika chifukwa cha Mesiya ndi usambazi ukuru kuruska vyuma vya mu charu cha Eguputo, pakuti wakaghanaghananga za njombe ya kunthazi.

²⁷Na chipulikano, Mozesi wakafumako ku Eguputo kwambula kopa ukari wa karonga. Pakuti wakazizipizganga nga ndi munthu uyo wakuwona Chiuta wambula kuwoneka.

²⁸Na chipulikano, Mozesi wakasunga Paska na kumija ndopa uku na uku, mwakuti mungelo wakukoma ŵana ŵa uŵere wareke kuŵakhwaska ŵana ŵa uŵere ŵa ŵaIsraele.

²⁹Na chipulikano, ŵanthu ŵakambuka Nyanja ya Matete nga mpha charu chakomira. Kweni ŵaEguputo para ŵakayezga kwambuka, ŵakamirwa mu maji.

³⁰Na chipulikano, linga la Yeriko likawa likati lazingirizgika mazuŵa ghankhonde na ghaŵiri.

³¹Na chipulikano, Rahabu mwanakazi muleŵe, kuti wakakomekera pamoza na ŵambula kupulikana chara, chifukwa wakaŵapokerera makora ŵanthu awo ŵakatumika kuya kaskora charu.

³²Ndipo kasi sono ndiyowoyengeso vichi? Ndilije nyengo ya kuphara vya Gidiyoni, Baraki, Samusoni, Yefuta, Davide, Samuele ndipo na nchimi zose.

³³Ŵanthu aŵa na chipulikano ŵakathereska ma ufumu, ŵakawoneseska kuti urunji uŵepo ŵakapokera ivyo Chiuta wakapangana, ŵakajara milomo ya nkharamu,

³⁴ŵakazimya moto wakofya, ŵakapona ku lupanga, apo ŵakaŵa ŵakutomboroka ŵakapokera nkhongono, ŵakaŵa vinkhara mu nkhondo na kuchimbizga mawumba gha nkhondo gha chilendo.

³⁵Ŵanakazi ŵakapokereraso ŵabali ŵawo awo ŵakawuka ku ŵakufwa. Ŵanyakhe ŵakasuzgika chomene mpaka kufwa ndipo ŵakakana na kusutulika wuwo, mwakuti ŵizakawukeso ku umoyo uweme.

³⁶Ŵanji ŵakatombozgeka na kuthyapulika, ŵakakakika na maunyoro na kuŵikika mu gadi.

³⁷Ŵakadinika na mawe, ŵakadumurika pakati, ndipo ŵanyakhe ŵakakomeka na lupanga. Ŵakendanga uku ŵavwara vikumba vya mberere na vya mbuzi. Ŵakaŵa ŵakusokwa, ŵakusuzgika na ŵakutombozgeka.

³⁸Charu kuti chikaŵa chiweme kwa iwo chara. Ŵakendendeka mu viparamba na mu mapiri na kukhara mu zimphanji na mu makhururu gha charu.

³⁹Ŵanthu wose aŵa nangauli wakarumbika na Chiuta chifukwa cha chipulikano chawo, kweni kuti ŵakapokera ivyo Chiuta wakapangana nawo chara.

⁴⁰Pakuti Chiuta wakatighanaghanira kutinozgera ise vinthu viweme vyakuruska. Ŵakachita ntheura kuti ŵaŵe ŵakufikapo nadi pamoza na ise.