Read new_tumbuka_bible ŴaHebere 12 Bible Online

ŴaHebere 12 - new_tumbuka_bible bible

ŴaHebere 12

¹Pakuti tili kuzingirizgika na wumba wa ŵanthu nga ndi bingu likuru awo mbakaboni ŵa chipulikano, tikwenera kuwuskako uzitu wose na kwananga uko kwademerera kwa ise. Na mtima wose tichimbire kwambula kugongowa chipharizgano icho chaŵikika panthazi zithu,

²uku tikudodoliska Yesu, chata na mufiski wa chipulikano chithu. Mweneuyo chifukwa cha chimwemwe icho chikaŵikika panthazi zakhe, wakazizipizga mphinjika, na kuyuyura kulengeskeka na nyifwa, ndipo wakukhara ku maryero kwa chizumbe cha Chiuta.

³Ntheura ghanaghanani na iyo uyo wakazizipizga para ŵakwananga ŵakalimbananga nayo, mwakuti mureke kuwa nkhumbi na kutaya mtima.

⁴Chifukwa pakulimbana na zakwananga, mulije kuchintha kuya kafika ku kuthiska ndopa zinu.

⁵Kasi muli kuruwa malembo gha chisangurusko agho ghakuyowoya na imwe nga mbana? Agho ghakuti, “Wa mwana wane, ungayuyuranga kulanga kwa Fumu, nanga nkhutaya chigomezgo para ukuchenyeka na iyo.

⁶Pakuti Fumu yikulanga yose uyo yikumutemwa, ndipo yikuthyapula mwana yose uyo yikumupokerera.”

⁷Usange mukuzizipizga kulangika, Chiuta wakumukorani nga mbana ŵakhe. Kasi waliko mwana uyo wiske wakureka kumulangapo?

⁸Usange imwe Chiuta wakumulangani chara nga ndi umo wakuchitira na ŵana ŵakhe wose, ipo muli ŵa mu uleŵe, ŵana ŵenecho chara.

⁹Pa dera pa ichi ŵadada ŵithu ŵa pano pasi ŵakatilanganga ndipo tikaŵachindikanga. Asi chomene kwakuruska timulambire Dada wa vya uzimu yithu na kuŵa na umoyo?

¹⁰Pakuti iwo ŵakatilanga ise kwa kanyengo kachoko nga ndi umo ŵakakhumbira. Kweni Chiuta wakutilanga kuti ise tandule mwakuti tisangane nayo mu utuŵa wakhe.

¹¹Pakuti pa nyengo yichoko waka chilango chilichose chikuwoneka chakuŵaŵa ndipo kuti chikuŵa chakukondweska chara. Kweni pamanyuma pakhe chikupambika chipambi cha mutende cha umoyo wa urunji kwa awo ŵali kusambizgika na ichi.

¹²Ntheura kwezgani mawoko ghinu ghakulepweteka ndipo khozgani makongono ghinu ghambula nkhongono.

¹³Ndipo nyoroskani nthowa za malundi ghinu, mwakuti ilo ndakupendera lireke kugweduka kweni lichizgike.

¹⁴Yezgani kukhara na mutende na ŵanthu wose, na kuŵa ŵatuŵa. Pakuti kwambula ichi kulije na yumoza uyo wamkuyiwona Fumu.

¹⁵Woneseskani kuti paŵavye munthu uyo wakutondeka kupokera uchizi wa Chiuta. Woneseskani kuti “musisi wakuŵaŵa” ureke kumera mukati mwinu na kumusuzgani ndipo chifukwa cha musisi uwu, ŵanandi ŵangakazuzgika.

¹⁶Woneseskani kuti paŵavye munthu uyo ndi muleŵe, panji wambula kusopa nga ndi Esau uyo wakaguliska mazaza gha urara wakhe na chakurya cha kamoza pera.

¹⁷Pakuti mukumanya kuti pamanyuma apo wakakhumbanga kuhara vitumbiko wakakanika, chifukwa wakaŵavye mwaŵi wakurapira nangauli wakakhumbiska na masozi.

¹⁸Pakuti imwe mundize ku Phiri la Sinayi ilo lingakhwaskika, la moto wakugolera, chisi, mdima, na chimphupuru,

¹⁹na kulira kwa mbata na mphomo ya mazgu ndiposo na lizgu ilo mazgu ghakhe ghakachitiska kuti awo ŵakapulika ŵarombe kuti ma uthenga ghanyakhe ghareke kuyowoyekaso kwa iwo.

²⁰Pakuti ŵakatondeka kuzizipizga languro ilo likaperekeka lakuti, “Nanga chingaŵa chinyama nacho, usange chikukhwaska phiri, chizamudinika na mawe.”

²¹Ndipo icho chikawoneka chikaŵa chakofya chomene mwakuti Mozesi wakati, “Ine nkhumbwambwantha na wofi.”

²²Kweni muli kwiza ku Phiri la Ziyoni ndiposo ku msumba wa Chiuta wamoyo uwo ndi Yerusalemu wa kuchanya na ku ŵangelo ŵambula mapendeko awo ŵawungana pa chiphikiro.

²³Muli kwiza ku ungano wa ŵana ŵa uŵere awo mazina ghawo ghali kulembeka kuchanya. Muli kwiza kwa mweruzgi uyo ndi Chiuta wa wose na ku mizimu ya ŵanthu ŵarunji awo ŵali kuzgoka ŵakufikapo.

²⁴Muli kwiza kwa Yesu uyo ndi Mphemaniski wa phangano liphya mweneuyo ndopa zakhe izo zikathika zikuphara vinthu viweme kuruska ndopa za Abelu.

²⁵Woneseskani kuti mureke kukana iyo mweneuyo wakuyowoya. Pakuti usange ŵakareka kupona para ŵakamukana iyo mweneuyo wakaŵachenjezga pano pasi, kasi ise tamkupona uli usange tikukana uyo wakutichenjezga kufuma kuchanya?

²⁶Pa nyengo yira mazgu gha Chiuta ghakasunkhunya charu, kweni sono wali kupangana, “Kamoza pera ndamkusunkhunya charu cha pasi pera chara, kweniso na cha kuchanya.”

²⁷Mazgu ghakuti, “Kamozaso pera,” ghakurongora pakweru kuti vyamkuwuskikako vinthu ivyo vikusunkhunyika, nga ndi umo vili kulengekera mwakuti vinthu ivyo nvyambula kusunkhunyika, ndivyo vikhalirire.

²⁸Ntheura tiyeni tiwonge pakuti tili kupokera ufumu uwo kuti ungasunkhunyika chara, ndipo tiyeni tipereke kwa Chiuta chisopo chakuzomerezgeka mwa nchindi na pakumopa.

²⁹Pakuti Chiuta withu, ndi moto wakumyangura.