Read new_tumbuka_bible ŴaHebere 13 Bible Online

ŴaHebere 13 - new_tumbuka_bible bible

ŴaHebere 13

¹Murutilire kutemwana nga mbakhristu.

²Mungarekanga chara kupokerera ŵalendo mu nyumba zinu, chifukwa pakuchita ntheura ŵanthu ŵanji ŵali kupokererapo ŵangelo kwambula kumanya.

³Kumbukani awo ŵali mu gadi nga ndi para namwe muli mu gadi pamoza nawo. Kumbukani awo ŵakuyuzgika pakuti imwe namwe muchali mu thupi.

⁴Rekani nthengwa yiŵe yakuchindikika mu ŵanthu wose, ndipo ŵafumu na ŵawoli ŵaŵe ŵakugomezgeka, pakuti Chiuta wamkuyeruzga ŵazaghali na ŵaleŵe wose.

⁵Mtima winu ureke kutemwa ndarama, kweni mukhorwenge na ivyo muli navyo. Pakuti Chiuta wayowoya kuti, “Nditi ndimurekaninge mwekha chara, nesi kumusidani.”

⁶Ntheura tingayowoya na chikanga kuti kutemwa kwinu nga mbakhristu kurutilire. “Fumu ndiyo Movwiri wane, kuti ndopenge chara. Nchichi icho munthu wangandichitira?”

⁷Kumbukani ŵarongozgi ŵinu ŵeneawo ŵakamuphalirani mazgu gha Chiuta. Ghanaghanani na umo umoyo wawo ukaŵira, ndipo rondezgani chipulikano chawo.

⁸Yesu Khristu ndi mweneuyo pera, mayiro, muhanya uno na muyirayira swii.

⁹Mungapuruskikanga na visambizgo vyakupambanapambana vya chilendo chara. Nchiweme kuti mtima ukhozgeke na uchizi, na chakurya chara icho awo ŵakwenda mwenemumo ŵakwandulapo chara.

¹⁰Ise tili na jochero ndipo awo ŵakuteŵeta mu Chihema Chakupatulika cha ŵaYuda, kuti ŵali na mazaza gha kuryerapo chara.

¹¹Pakuti mathupi gha vinyama vyeneivyo ndopa zawo zikutorekera ku Malo Ghakupatulika Nkhanira na Musofi Mukuru kuŵa sembe ya zakwananga ghakuwochekera kuwaro kwa msasa.

¹²Pa chifukwa ichi, Yesu nayoso wakafwira kuwaro kwa chipata, mwakuti watuŵiske ŵanthu kwizira mu ndopa zakhe na zakhe.

¹³Ntheura tiyeni tirute kwa iyo kuwaro kwa msasa kuti tirengeskeke pamoza nayo.

¹⁴Pakuti pano pasi ise tilije msumba wakukhalirira kweni tikupenja msumba uwo utizenge.

¹⁵Ntheura mwa iyo, tiyeni tiperekenge nyengo zose sembe ya marumbo kwa Chiuta. Marumbo gheneagho nchipambi cha milomo iyo yikuzunura zina lakhe.

¹⁶Mungaruwanga kuchita uweme na kugaŵana ivyo muli navyo, pakuti sembe za ntheura zikukondweska Chiuta.

¹⁷Ŵapulikirani ŵarongozgi ŵinu ndipo muŵe pasi pawo, pakuti mbalinda ŵa mizimu yinu, ndipo ŵakwenera kwiza kapataura kwa Chiuta vya mlimo wawo. Rekani ŵachite mlimo wawo mwakukondwa, kwambula kusinginika, pakuti ichi chingaŵa na chandulo kwa imwe chara.

¹⁸Mutiromberenge ise pakuti tikufikapo kuti tili na njuŵi yiweme, pakukhumba kuchita vinthu vyose mwakugomezgeka.

¹⁹Nkhumuchiskani kwakuruska kuti muchite ichi mwakuti ndiwezgekere kwa imwe luŵiro.

²⁰Sono Chiuta wa mutende mweneuyo wakawuskaso ku ŵakufwa Fumu yithu Yesu uyo ndi Muliska Mukuru wa mberere, chifukwa cha ndopa za phangano la muyirayira,

²¹wamupani chose icho nchiweme kuti muchitenge khumbo lakhe ilo likuteŵeta mwa imwe icho chikumukondweska pa maso ghakhe mwa Yesu Khristu ndipo Yesu Khristu wamovwirani kuti muchite ivyo nvyakukondweska iyo. Ndipo kwa Khristu kuŵenge uchindami kwa muyirayira swii. Ameni.

²²Mwa ŵabali ŵane, nkhumuŵeyani kuti, mupulike mazgu ghakuchiska kwane, pakuti ndamulemberani mazgu ghachoko waka.

²³Nkhukhumba kumumanyiskani kuti munyithu Timote, wafuma mu gadi. Usange wiza luŵiro, ndizenge nayo kwa imwe apo ndizamkumuwonani.

²⁴Mutauzge ŵarongozgi ŵinu wose ndiposo na ŵanthu wose ŵa Chiuta. Ŵabali ŵithu ŵa ku Italiya ŵakumutauzgani.

²⁵Wezi wa Chiuta uŵenge na imwe mose.