Read new_tumbuka_bible ŴaHebere 2 Bible Online

ŴaHebere 2 - new_tumbuka_bible bible

ŴaHebere 2

¹Ntheura tikwenera kutegherezga chomene ku ivyo tili kupulika, mzire tisezgekeko.

²Pakuti usange uthenga uwo ukayowoyeka na ŵangelo, ukaŵa wa unenesko ndipo kwananga kose na kureka kupulikira, kukapokera chilango mwakwenerera,

³kasi ise tamkuphokwa uli usange tikuzerezga waka chiponosko chikuru chakuŵa ntheura? Chiponosko ichi pakudanga chikapharazgika na Fumu, ndipo awo ŵakatipanikizgira ndi awo ŵakapulika kwa iyo.

⁴Pa nyengo yiraso Chiuta nayo wakakhozgera na vimanyikwiro na vyakuzizwiska vya minthondwe vinandi, ndiposo na vyawanangwa vya Mzimu Mutuŵa vyeneivyo wakavigaŵa kwakuyana na khumbo la iyomwene.

⁵Pakuti nkhu ŵangelo chara uko Chiuta wakapereka charu icho tikuchiyowoya kuti ŵachiwuse.

⁶Mu malo ghanji gha Malembo chili kupanikizgika na mazgu ghakuti, “Kasi munthu nkhanthu uli kuti mumukumbuke, nanga ndi mwana wa munthu, kuti mumupwererere.

⁷Pa kanyengo kachoko, mukamulenga wakucheperako ku ŵangelo. Mwamuvwarika mphumphu ya uchindami na nchindi.

⁸Ndipo mwaŵika vinthu vyose pasi pa muwuso wakhe.” Sono Chiuta pakuŵika vinthu vyose pasi pa muwuso wakhe, kuti wakarekako kanthu chara kuwaro kwa muwuso wakhe. Kweni umo kuliri tichali tindawone kuti kanthu kose kali pasi pa mazaza ghakhe.

⁹Kweni tikuwona Yesu mweneuyo pa kanyengo kachoko waka wakaŵikika pasi pa ŵangelo, wavwarikika mphumphu ya uchindami na nchindi chifukwa wakasuzgika mu nyifwa, mwakuti na uchizi wa Chiuta wafwire munthu waliyose.

¹⁰Pakuti chikaŵa chakwenerera kuti Chiuta uyo wali kulenga ndipo wakusunga vinthu vyose, waŵatorere uchindami ŵanthu ŵanandi, ndipo wamuzgore Yesu murongozgi wa chiponosko chawo kuŵa wakufikapo kwizira mu visuzgo.

¹¹Pakuti iyo uyo wakutuŵiska na awo ŵakutuŵiskika mba fuko limoza. Ndicho chifukwa Yesu kuti wali na soni chara kuŵachema ŵabali ŵakhe

¹²kuti, “Nditi ndithuwuske zina linu ku ŵabali ŵane, nditi ndimurumbani imwe mukati mu mpingo wa ŵanthu.”

¹³Ndiposo wakuti, “Nditi ndiŵike chigomezgo chane mwa iyo.” Ndiposo wakuti, “Ine ndili pano pamoza na ŵana awo Chiuta wandipa.”

¹⁴Ntheura pakuti ŵana aŵa mbanthu, ŵali mu nyama na ndopa. Yesu nayo wakatora kaŵiro ka munthu nga ndiwo, mwakuti na nyifwa yakhe wasakaze Satana uyo wali na mazaza pa nyifwa,

¹⁵na kuthaska wose awo ŵakaŵa ŵazga pa umoyo wawo wose chifukwa chakopa nyifwa.

¹⁶Pakuti nadi kuti ŵakwenjerwa na ŵangelo chara, kweni na ŵa mu mphapu ya Abrahamu.

¹⁷Ntheura ŵakwenera kuti ŵaŵe nga ndi ŵana ŵanyakhe mu vinthu vyose, mwakuti waŵe Musofi Mukuru wa lusungu na wakugomezgeka mu uteŵeti wa Chiuta, kuti walipire mrandu wa zakwananga za ŵanthu.

¹⁸Pakuti iyomwene wakakomwa na kuyezgeka, wakumanya kovwira awo ŵakuyezgeka.