Read new_tumbuka_bible ŴaHebere 3 Bible Online

ŴaHebere 3 - new_tumbuka_bible bible

ŴaHebere 3

¹Ntheura mwa ŵabali, imwe muli kuchemekera vya kuchanya, mughanaghanenge na vya Yesu, uyo wakutumika ndiposo ndi Musofi Mukuru mweneuyo ise tikumuzomera mu chipulikano chithu.

²Iyo wakaŵa wakugomezgeka kwa iyo mweneuyo wakamwimika nga ndi umo Mozesi nayo wakaŵira wakugomezgeka mu Nyumba ya Chiuta.

³Ndipouli, Yesu wali kupimika kuŵa wakwenerera uchindami ukuru kuruska wa Mozesi nga ndi umo wakuzenga nyumba wakuchindikikira kuruska nyumba.

⁴Pakuti nyumba yose yikuzengeka na munthu, kweni uyo wakuzenga vinthu vyose ndi Chiuta.

⁵Mozesi wakaŵa wakugomezgeka mu nyumba yose ya Chiuta nga ndi muteŵeti kuti waŵapanikizgire vinthu ivyo Chiuta wakanozgera kwiza kayowoya kunthazi.

⁶Kweni Khristu wakaŵa wakugomezgeka pa Nyumba ya Chiuta nga ndi Mwana. Ndipo ise ndise nyumba yakhe, usange tikurutilira kuŵa na chikanga na kuthumbwira pa icho tikugomezga.

⁷Ntheura sono nga ndi umo Mzimu Mutuŵa wakuyowoyera, “Muhanya uno usange mukupulika lizgu lakhe,

⁸Mureke kunonofya mitima yinu nga ndi mu chigaruka pa zuŵa la chiyezgo mu mapopa,

⁹Kwenekuko, ŵasekuru ŵinu ŵakandiŵika mu chiyezgo, ndipo ŵakawona milimo yane, pa virimika 40.

¹⁰Ntheura nkhakwiyiskika na muwiro ura, ndipo nkhati, ‘Nyengo zose ŵakupuruka mu mitima yawo. Nthowa zane kuti ŵakazimanya chara.’

¹¹Ntheura mu ukari wane, nkharapa nkhati, ‘Na pachoko pose, iwo ŵati ŵanjiremo mu chipumulo chane chara.’ ”

¹²Mwa ŵabali ŵane, chenjerani mzire yumoza wa imwe waŵe na mtima uheni na wambula kupulikana uwo ukupatuska munthu kwa Chiuta wamoyo.

¹³Kweni zuŵa na zuŵa muchiskanenge apo kuchali kuchemeka kuti, “Muhanya uno”, mwakuti paŵavye yumoza wa imwe waŵe wakunonofyeka na uryarya wa kwananga.

¹⁴Pakuti tikusangana mwa Khristu usange tikukoreska chigomezgo chithu chakudanga mpaka ku umaliro.

¹⁵Nga ndi umo kukuyowoyekera kuti, “muhanya uno, usange mukupulika lizgu la Chiuta, mureke kunonofya mitima yinu, nga ndi zuŵa lira la chigaruka.”

¹⁶Kasi mba njani ŵakapulika lizgu la Chiuta ndipo ŵakamugarukira? Asi ŵakaŵa wose awo ŵakafumamo mu Eguputo pasi pa urongozgi wa Mozesi?

¹⁷Kasi mba njani awo ŵakakwiyiska Chiuta virimika 40? Asi ndi ŵanthu awo ŵakananga, ŵeneawo ŵakafwira mu mapopa?

¹⁸Kasi mba njani awo Chiuta wakarapirapo kuti ŵamkunjira mu chipumulo chakhe? Asi ndi ŵeneawo ŵakareka kupulikira?

¹⁹Ntheura tikuwona kuti ŵakatondeka kunjira chifukwa chakuwura kupulikana.