Read new_tumbuka_bible ŴaHebere 4 Bible Online

ŴaHebere 4 - new_tumbuka_bible bible

ŴaHebere 4

¹Ntheura apo phangano la Chiuta lakuti tinjirire mu chipumulo lichali waka, tiyeni tichenjere mzire yumoza wa imwe ŵeruzgike chifukwa chakutondeka kunjiramo.

²Pakuti tili kupulika Uthenga Uweme nga ndi umo iwo ŵakapulikira. Kweni mazgu agho ŵakapulika kuti ghakaŵa na chandulo kwa iwo chara, chifukwa ŵakaghapokerera na chipulikano chara.

³Pakuti ise tili kupulikana, tikunjira mu chipumulo chira nga ndi umo iyo wakuyowoyera kuti, “Ntheura mu ukari wane nkharapa nkhati, ‘Na pachoko pose kuti ŵamkunjiramo mu chipumulo chane chara.’ ” Nangauli mlimo wakhe ukamarizgika apo wakalengera charu.

⁴Pakuti wali kuyowoya pa malo ghanji vya zuŵa la chinkhonde na chiŵiri kuti, “Chiuta wakapumula ku mlimo wose pa zuŵa la chinkhonde na chiŵiri.”

⁵Ndiposo pa malo gheneagha, wakatiso, “Na pachoko pose kuti ŵamkunjiramo mu chipumulo chane chara.”

⁶Pakuti chakharako sono nchakuti, ŵanji ŵanjiremo na wose awo kale ŵakapokera Uthenga Uweme ŵakatondeka kunjiramo chifukwa chakuwura kupulikira.

⁷Kweni sono wimikaso zuŵa linyakhe ilo ndi “muhanya uno,” pakuyowoyera mwa Davide, pamanyuma pa nyengo yitali vya zuŵa ili mu mazgu agho tayowoya kale ghakuti, “muhanya uno, usange mukupulika lizgu lakhe, mureke kunonofya mitima yinu.”

⁸Pakuti usange Yoshuwa waŵapenge ŵanthu chipumulo, mphanyi pamanyuma Chiuta wakayowoya chara na za zuŵa linyakhe.

⁹Ntheura sono kupumula kwakuŵa nga ndi Sabata kwaŵakhalira ŵanthu ŵa Chiuta.

¹⁰Pakuti yose uyo wakunjira mu chipumulo cha Chiuta, nayoso wakupumula ku milimo yakhe nga ndi umo Chiuta wakapumulira ku milimo yakhe.

¹¹Ntheura tiyeni tilimbelimbenge kunjira mu chipumulo icho, mwakuti paŵavye munthu waŵe na chifukwa chakuwura kupulikira nga ndiwo.

¹²Pakuti mazgu gha Chiuta ngamoyo ndipo ngakuchitachita na nkhongono. Ngakuthwa kuruska lupanga lwa wuyi kosekose. Ghakuporota na kuya kagaŵa pakati pa umoyo wa munthu na mzimu, na pakati pa marunga na wongo wuwo. Ghakumanya kweruzga maghanoghano na dazgo la mu mtima.

¹³Pa maso pa Chiuta palije chilengiwa icho nchakubisika. Vinthu vyose vili pakweru ndipo vikuwoneka waka pa maso pa mweneuyo tikwenera kumupataulira vyose.

¹⁴Pakuti sono tili nayo Musofi Mukuru nkhanira uyo wali kuporota mu mtambo, ndiyo Yesu Mwana wa Chiuta, tiyeni tikoreske chipulikano chithu icho tikazomera.

¹⁵Pakuti Musofi Mukuru uyo tili nayo kuti ndi uyo ngwambula chiwuravi pa mautechitechi ghithu chara, kweni ndi uyo wakayezgeka mu nthowa zose nga ndise, ndipouli, kuti wakanjira mu kwananga chara.

¹⁶Tiyeni sono na chikanga tisenderere ku chizumbe cha uchizi mwakuti tipokere lusungu na kusanga uchizi kuti utovwire pa nyengo ya kusoŵerwa.