Read new_tumbuka_bible ŴaHebere 5 Bible Online

ŴaHebere 5 - new_tumbuka_bible bible

ŴaHebere 5

¹Pakuti musofi mukuru waliyose uyo wakusoreka kufuma mu ŵanthu wakwimikika kuti waŵe mu malo ghawo panthazi pa Chiuta, mwakuti wapereke vyawanangwa na sembe za zakwananga.

²Pakuti iyomwene wali kuzingirizgika na utechitechi, wangaŵa na chiwuravi na awo mbalemwa na ŵakupuruka.

³Ndicho chifukwa wakwenera kupereka sembe ya zakwananga za iyomwene ndiposo na sembe ya zakwananga za ŵanthu.

⁴Palije munthu uyo wakujitorera nchindi izi za kuŵa musofi mukuru pa iyo yekha, kweni wakuchemeka na Chiuta nga ndi umo wakachemekera Aroni.

⁵Ntheura pera Khristu kuti wakajitorera yekha nchindi iyi chara kuti waŵe musofi mukuru, kweni Chiuta ndiyo wakamwimika na kumuphalira kuti, “Iwe ndiwe Mwana wane, muhanya uno ndakubaba.”

⁶Nga ndi umo wakuyowoyeraso kunyakhe kuti, “Ndiwe musofi kwa muyirayira, kwakuyana na ndondomeko ya usofi wa Melekizedeki.”

⁷Mu mazuŵa gha umoyo wakhe mu thupi, Yesu wakachemerezga na kulira masozi para wakarombanga na kuŵeyerera kwa Chiuta mweneuyo wakaŵa na nkhongono zakumuthaskira ku nyifwa.

⁸Nanga iyo wakaŵa Mwana ndipouli, wakasambira kupulikira kwizira mu ivyo wakakomwa navyo.

⁹Pakuŵa wakufikapo, wakazgoka kuŵa chitopoko cha chiponosko cha muyirayira kwa wose awo ŵakumupulikira,

¹⁰wati wimikika na Chiuta kuŵa musofi mukuru kwakuyana na ndondomeko ya usofi wa Melekizedeki.

¹¹Tili na vinandi vyakuyowoya pa ichi ndipo nchinonono kumurongosorerani pakuti muli ŵazitu kupulika.

¹²Pakuti nangauli pa nyengo iyi mukwenera kuŵa ŵasambizgi, kweni kukukhumbikwa kuti munthu yunji wamusambizganiso visambizgo vyakudanga vya mazgu gha Chiuta. Mukwenera danga kumwa mkaka, chakurya chinonono chara.

¹³Pakuti yose uyo wakumwa mkaka pera, walije usiri kuti wamanye kwandula mazgu gha urunji pakuti ndi mwana.

¹⁴Kweni chakurya chinonono ncha awo ŵali kukura, awo mu kamanyiro kawo ŵali kuzgoŵera kupatula uweme na uheni.