Read new_tumbuka_bible ŴaHebere 6 Bible Online

ŴaHebere 6 - new_tumbuka_bible bible

ŴaHebere 6

¹Ntheura sono tiyeni tireke visambizgo vyakwambilira vipusu vira vya Khristu ndipo tirutilire munthazi visambizgo vya chikhristu mpaka tiŵe ŵakufikapo. Tireke kujimaso lufura lwa kung'anamuka kufuma ku milimo yakufwa, na chipulikano mwa Chiuta,

²na chisambizgo cha ubapatizo, na chakuŵikapo mawoko pa ŵanthu: cha kuwuka ku ŵakufwa na cha weruzgi wa muyirayira.

³Usange Chiuta wazomerezga, tichitenge ntheura.

⁴Pakuti nchambula machitiko kuwezgeraso ŵanthu ku kung'anamuka kwa mu mtima ŵeneawo kale ŵakangweruskika ndipo ŵakachetapo chawanangwa cha kuchanya na kupokera Mzimu Mutuŵa,

⁵ndipo wali kuchetapo uweme wa mazgu gha Chiuta, na nkhongono za nyengo iyo yikwiza, kweni ŵali kuwa.

⁶Nchambula machitiko kuti ŵanthu aŵa ŵang'anamukeso mu mitima yawo, pakuti iwo ŵekha na ŵekha ŵakumupayikaso Mwana wa Chiuta ndipo ŵakumulengeska panthazi pa ŵanthu.

⁷Pakuti charu icho chamwa maji gha vura iyo yikuwapo kaŵirikaŵiri, ndipo chikuŵa na vyakumera ivyo vikuŵa vya phindu kwa awo ŵakulimapo, chikupokera chitumbiko kufuma kwa Chiuta.

⁸Kweni para chikupambika minga na nthura, nchawakawaka. Maluŵiro chikutembeka ndipo pa umaliro chikocheka.

⁹Nangauli tikuyowoya ntheura ndipouli kwakuyana na imwe ŵakutemweka, tikumanya kuti muli navyo vitumbiko vinandi viweme ivyo nvya chiponosko.

¹⁰Pakuti Chiuta ndi murunji ndipo kuti wangaruwa chara nchito na kutemwa kwinu uko mukarongora chifukwa cha iyo pakuteŵetera ŵakhristu ŵanyakhe nga ndi umo na sono muchali kuchitira.

¹¹Tikukhumba kuti munthu waliyose mwa imwe warutilire kurongora phamphu la ntheura, kuti vinthu ivyo mukugomezga vichitike nadi mpaka ku umaliro.

¹²Mwakuti mureke kuŵa ŵakata kweni ŵakuŵayezga ŵanthu awo, pakupulikana na pakuzizipizga, ŵakukhalira mapangano.

¹³Pakuti para Chiuta wakapereka phangano kwa Abrahamu, wakaŵavye mukuru kwakuruska mweneuyo wakenera kuperekeramo chirapo chakhe, wakajirapizga mwa iyomwene,

¹⁴kuti, “Nadi, kutumbika ndikutumbikenge ndipo kwandaniska nako nditi ndikwandaniskenge.”

¹⁵Ntheura, Abrahamu wakati wazizipizga wakapokera icho Chiuta wakapangana nayo.

¹⁶Nadi ŵanthu ŵakurapira mwa uyo ndi mukuru kuruska iwo ŵekha, ndipo mu mphindano zawo zose ndicho chikudumula.

¹⁷Sono Chiuta pakukhumba kuŵapanikizgira pakweru ŵahariri ŵa phangano lakhe na umo dazgo lakhe likaŵira lambula kusinthika, wakakhozgera na chirapo.

¹⁸Mwakuti mu vinthu viŵiri vyambula kusinthika mu vyeneivyo nchambula machitiko kuti Chiuta wasangike mutesi, ise tikuchimbilira kwa iyo kuti tibisame, kuti tichiskikenge na nkhongono zakupokera chigomezgo panthazi pithu.

¹⁹Chigomezgo icho tili nacho chili nga ndi nyanguru wa umoyo withu. Nchakukhora na cha unenesko ndipo chikunjira mu malo gha mukatikati ghatuŵa kuseri kwa chisalu chakuchinga cha mu Nyumba ya Chiuta.

²⁰Kwenekura ndiko Yesu wali kutidangirira na kunjira mu malo mwa ise. Ndipo wali kuŵa musofi mukuru kwa muyirayira, kwakuyana na ndondomeko ya usofi wa Melekizedeki.