Read new_tumbuka_bible ŴaHebere 7 Bible Online

ŴaHebere 7 - new_tumbuka_bible bible

ŴaHebere 7

¹Pakuti Melekizedeki uyu wakaŵa Karonga wa Salemu, musofi wa Chiuta Chikurukuru. Para Abrahamu wakaweranga kufuma ku nkhondo, wakati watonda ŵakaronga ŵanayi, Melekizedeki wakakumana nayo na kumutumbika.

²Penepapo Abrahamu wakamupa chakhumi kufuma mu vyose ivyo wakaŵa navyo. (Zina la Melekizedeki pakudanga likung'anamula kuti, “Karonga wa urunji” ndiposo ndi “Karonga wa Salemu,” ilo likung'anamulaso kuti “Karonga wa Mutende.”)

³Walije ŵawiske, ŵanyina nanga mbasekuru ŵakhe. Umoyo wakhe ulije jando panyakhe umaliro. Iyo, pakukozgana na Mwana wa Chiuta, wakukhalirira musofi kwa muyirayira.

⁴Wonani ukuru wa munthu uyu. Sekuru withu Abrahamu wakamupa chakhumi cha ivyo wakaskogha!

⁵Marango ghakuti ŵana ŵa Levi awo mbasofi, ŵapokenge chakhumi kufuma ku ŵanthu, ndiko kuti kufuma ku ŵabali ŵawo, nangauli nawo mba mu mphapu ya Abrahamu.

⁶Kweni munthu uyu kuti ngwa mu mphapu yawo chara, kweni wakapokera chakhumi kufuma kwa Abrahamu, ndipo Melekizedeki wakamutumbika Abrahamu mweneuyo wakapokerera mapangano gha Chiuta.

⁷Ndipo ncha pakweru nkhanira kuti muchoko wakutumbikika na mukuru.

⁸Pano chakhumi chikupokeka na ŵanthu awo mbambula kukhalirira. Kweni kura chamkuperekeka na uyo wali na ukaboni kuti ngwamoyo.

⁹Ndipo tingamanya na kuyowoya kuti Levi iyomwene, uyo wakupokera chakhumi, wakupereka chakhumi mwa Abrahamu.

¹⁰Pakuti Levi wakaŵa mu thupi la wiskekuru wakhe apo Melekizedeki wakiza kakumana na Abrahamu.

¹¹Sono usange usofi wa Levi, ukaŵa wakufikapo pakuti ŵanthu ŵakapokera marango pasi pakhe, kukakhumbikwaso uli kuti kuwuke musofi munyakhe kwakuyana na ndondomeko ya usofi wa Melekizedeki, wakupambana na wa Aroni?

¹²Pakuti apo usofi ukusinthika, marango nagho ghakwenera kusinthika.

¹³Pakuti mweneuyo vinthu ivi vikumuyowoyekera ngwa fuko linyakhe, leneilo palije na yumoza uyo wali kufumamo kuya kateŵeta pa jochero la sembe.

¹⁴Pakuti nchakumanyikwa pakweru kuti Fumu yithu nja fuko la Yuda ndipo kwakuyana na fuko lira, Mozesi kuti wakayowoyapo kanthu chara na vya ŵasofi.

¹⁵Makani agha ghakupulikikwa makora chomene, apo tikuwona kuti musofi munyakhe wakusoreka, wakuŵa nga ndi Melekizedeki.

¹⁶Iyo kuti ndi musofi chifukwa cha dango la languro la thupi chara, kweni chifukwa cha nkhongono za umoyo wakhe wa muyirayira.

¹⁷Pakuti malembo ghakumukhalira ukaboni apo ghakuti, “Iwe ndiwe musofi kwa muyirayira, kwakuyana na ndondomeko ya usofi wa Melekizedeki.”

¹⁸Ntheura dango la kale larekeka chifukwa ndambula nkhongono ndiposo ndawakawaka.

¹⁹Pakuti Dango la Mozesi likaŵavye kuzgora chinthu chinji kuŵa chakufikapo. Ndipo sono chigomezgo chiwemiko charongoreka cheneicho tikusenderera kufupi na Chiuta.

²⁰Ndiposo kuti chikachitika chara kwambula chirapo. Ŵasofi ŵa kale ŵara ŵakimikika kuŵa ŵasofi kwambula chirapo.

²¹Kweni apo Yesu wakaŵa musofi, Chiuta wakarapa para wakati kwa iyo, “Fumu yarapa, ndipo kuti yiti yisinthenge mtima wakhe chara: ‘Iwe ndiwe musofi kwa muyirayira.’ ”

²²Pa vyose ivi Yesu ndiyo chipanikizgo cha phangano liphya lakuruska.

²³Ŵasofi wakudanga ŵara ŵakaŵa ŵanandi chomene chifukwa ŵakafwanga ndipo kuti ŵakarutiliranga milimo yawo chara.

²⁴Kweni Yesu usofi wakhe ngwa kukhalirira, pakuti iyo ngwamoyo kwa muyirayira.

²⁵Ntheuraso wakumanya kuŵaponoska nkhanirankhanira awo ŵakusenderera kwa Chiuta kwizira mwa iyo pakuti wali na umoyo kwa muyirayira kuti waŵaŵeyererenge ŵanthu kwa Chiuta.

²⁶Pakuti chikaŵa chakwenerera kuti tiŵe na musofi mukuru wa ntheura, uyo ndi Mutuŵa, wambula uheni, wambula kukazuzgika, wakupatukako ku ŵakwananga, ndipo uyo wali kukwezgeka pachanya pa mtambo.

²⁷Iyo kuti kukukhumbikwa chara kuti wapereka sembe zuŵa na zuŵa, pakudanga za uheni wakhe ndipo pamanyuma za uheni wa ŵanthu, nga ndi umo ŵakachitiranga ŵasofi ŵakuru ŵanyakhe ŵara. Ichi iyo wakachitira wose kamoza pera para wakajipereka yekha kuŵa sembe.

²⁸Pakuti Dango la Mozesi likwimika ŵanthu awo mba kutomboroka kuŵa ŵasofi ŵakuru. Kweni mazgu agho ghali na chirapo, agho ghakiza pamanyuma pa marango, ghakumwimika Mwana mweneuyo wali kunozgeka kuŵa wakufikapo kwa muyirayira.