Read new_tumbuka_bible ŴaHebere 8 Bible Online

ŴaHebere 8 - new_tumbuka_bible bible

ŴaHebere 8

¹Sono pa ivyo tikuyowoya fundo ndi iyi yakuti, tili na Musofi Mukuru, mweneuyo wakukhara ku woko la maryero la chizumbe cha Ufumunkhuru kuchanya.

²Iyo ndi muteŵeti nga musofi mukuru mu Malo Ghakupatulika Nkhanira, mu Chihema chenecho icho kuti chili kujinthika na munthu chara, kweni na Fumu.

³Pakuti musofi mukuru waliyose wakwimikika kuti waperekenge kwa Chiuta vyawanangwa, ndiposo sembe. Ntheura nchakwenerera kuti musofi uyu nayo waŵe nacho chakupereka.

⁴Sono waŵenge kuti wali pa charu cha pano pasi, mphanyi ndi musofi chara, chifukwa ŵalipo kale ŵasofi awo ŵakupereka vyawanangwa kwakuyana na dango.

⁵Mlimo uwu wa usofi nchiyerezgero na muzgezge wa Chihema Chakupatulika kuchanya. Pakuti Mozesi para wakatenge wajinthe Chihema, Chiuta wakamuphalira kuti, “Uwoneseske kuti upange vyeneivi kwakuyana na chiyerezgero icho chikarongoreka kwa iwe pa phiri.”

⁶Kweni na umo vinthu viliri Khristu wakapokera mlimo wapachanya kuruska mlimo wa ŵasofi ŵa kale ŵara. Pakuti phangano ilo iyo wakutiphemaniskirapo ndiweme chifukwa liri kupangika pa vilayizgo viweme kuruska pa vya phangano la kale.

⁷Pakuti usange phangano lakudanga lira liŵenge lambula kafukwa, mphanyi kulije malo gha phangano la chiŵiri.

⁸Kweni Chiuta wakusanga kafukwa mu ŵanthu ŵakhe para wakuti, “Fumu yikuti, ‘Mazuŵa ghakwiza apo ndamkuchita phangano liphya na fuko la Israele, ndiposo na fuko la Yuda.

⁹Phangano ili kuti lamkuyana na phangano lira nkhachita na ŵawiskewokuru chara, pa zuŵa apo nkhaŵakora pa woko pakuŵafumiska mu charu cha Eguputo. Chifukwa ŵakaŵavye kusungilira phangano ilo nkhapangana nawo, ntheura ine nkhaŵalegherezga waka, ndimo yikuyowoyera Fumu.

¹⁰Sono ili ndi phangano ilo ndamkupangana na mbumba ya Israele, pamanyuma pa mazuŵa gheneghara, Fumu yikuti, ndamkuŵika marango ghane mu maghanoghano ghawo, na kughalemba mu mitima yawo. Ine ndamkuŵa Chiuta wawo, iwo ŵamkuŵa ŵanthu ŵane.

¹¹Ndipo munthu yose kuti wamkusambizga muzengezgani wakhe chara nanga ndi munthu kuti wasambizge mubali wakhe kuti, “Umanye Fumu.” Pakuti wose ŵamkundimanya, kufuma pa ŵachoko chomene mpaka pa ŵarara chomene.

¹²Pakuti ndamkuŵagowokera maubendezi ghawo, ndipo ndamkukumbukaso zakwananga zawo chara.’ ”

¹³Pakuyowoya vya phangano liphya Chiuta wakuphara kuti phangano la kale lazgoka la waka. Ndipo icho chikuzgoka cha waka na chakuvukupara, chili pafupi kumara.