Read new_tumbuka_bible ŴaHebere 9 Bible Online

ŴaHebere 9 - new_tumbuka_bible bible

ŴaHebere 9

¹Phangano lakudanga lira likaŵa na marango gha chisopo, ndiposo na Chihema Chakupatulika gha pano pasi.

²Pakuti Chihema cha kuwaro chikazengeka ndipo mwenemumo mukaŵa chakuŵikapo nyali, thebulu, ndiposo na Chingwa cha Uŵapo wa Chiuta. Malo agho ghakuchemeka kuti, Malo Ghakupatulika.

³Kuseri kwa chisalu cha chiŵiri chakuchinga, kukaŵa hema lakuchemeka “Malo Ghakupatulika Nkhanira.”

⁴Mu hema ili mukaŵa jochero la golide la kocherapo vyakununkhira ndiposo na Bokosi la Phangano lakuphakika zingirizge na golide. Mu Bokosi ili la Phangano mukaŵa ka chiŵiya keneako ŵakaŵikamo mana na ndodo ya Aroni iyo yikasunda mahamba. Mukaŵaso na mawe gha papati gha phangano.

⁵Pachanya pa Bokosi lira pakaŵa vithuzithuzi vya ŵakerubi ŵa uchindami ŵeneawo ŵakasikizga chizumbe cha lusungu. Vinthu ivi kuti tingavikonkhoska pa nyengo yino chara.

⁶Para unozgero uwu wati wachitika ntheura, ŵasofi ŵakunjira mu hema la kuwaro nyengo na nyengo na kuchita milimo yawo.

⁷Kweni musofi mukuru pera ndiyo wakunjira mu chipinda cha chiŵiri, ndipo wakanjiranga kamoza pera mu chirimika uku wayegha ndopa izo ŵakupereka kuŵa sembe ya mphuvya za iyomwene na za ŵanthu.

⁸Pa ichi Mzimu Mutuŵa wakurongora kuti, apo Chihema cha kuwaro chichali kwimilira, nthowa yakunjirira ku Malo Ghakupatulika Nkhanira yichali yindajurike.

⁹Ichi ndi chimanyikwiro cha nyengo ya sono. Kwakuyana na kanozgero aka, vyawanangwa na sembe vikuperekeka vyeneivyo kuti vingazgora mtima wa uyo wakusopa kuŵa wakufikapo chara,

¹⁰Pakuti vikukhwaska vyakurya, vyakumwa, na vya maluso ghakupambanapambana pakutozga tunthu. Agha ndi marango gha thupi agho ghali kupika kufikira pa nyengo ya kunozgeraso makora.

¹¹Kweni Khristu wali kwiza nga ndi Musofi Mukuru wa vinthu viweme ivyo vyafika, ipo kwizira mu Chihema icho nchikuru na chakufikapo nkhanira chambula kupangika na mawoko munthu ndiko kuti nchimoza cha vyakulengeka ivi chara,

¹²wakanjira kamoza pera mu Malo Ghakupatulika Nkhanira kwambula kunjira na ndopa za mbuzi panji za ŵana ŵa ng'ombe. Kweni wakanjira na ndopa zakhe na zakhe na kutitorera chiponosko cha muyirayira.

¹³Pakuti usange ndopa za mbuzi na za nkhambako ndiposo na vyoto vya kang'ombe kanakazi ivyo vikamijikanga pa ŵanthu awo ŵakakazuzgika, vikamanya kuŵatuŵiska mpaka kuŵatozga mathupi ghawo,

¹⁴asi ndopa za Khristu zingaruska chomene? Iyo mwa Mzimu wa muyirayira wakajipereka kwa Chiuta kwambula kalema kuŵa sembe. Ntheura ndopa zakhe ziti zitozge njuŵi zithu ku milimo yakufwa mwakuti timuteŵetere Chiuta wamoyo.

¹⁵Pa chifukwa ichi iyo ndi Mphemaniski wa phangano liphya mwakuti awo ŵali kuchemeka ŵapokere chiharo cha phangano la muyirayira, pakuti nyifwa ya Khristu yikaŵako kuti waponoske ŵanthu ku zakwananga izo ŵakachita apo ŵakaŵa pasi pa phangano lakudanga.

¹⁶Pakuti apo pali layizgo, pakukhumbikwa kupanikizga kuti uyo wakachita layizgo lira wafwa nadi.

¹⁷Sono layizgo likuŵa la nchito para mwenecho wafwa pakuti layizgo likung'anamula kanthu chara para mwenecho wa layizgo lira wandafwe.

¹⁸Ndicho chifukwa nanga ndi phangano lakudanga kuti likakhozgeka chara kwambula ndopa.

¹⁹Pakuti apo Mozesi wakaŵaphalira ŵaIsraele malangulo ghose gha mu Dango, wakatora ndopa za ŵana ŵa ng'ombe na za mbuzi wakasazga na maji, wakatora kakhuni ka hisopo na weya uswesi wa mberere ndipo wakamijira Buku la Marango na ŵanthu wose.

²⁰Wakati, “Izi ndi ndopa za phangano ilo Chiuta wali kumulangulani kuti musunge.”

²¹Ntheura Mozesi wakamijira ndopa pa Chihema na pa viteŵetero vyose vyakugwiriskikira nchito mu chisopo.

²²Nadi, kwakuyana na dango, kanthu kose kakutozgeka na ndopa, ndipo kwambula kuti ndopa zithike kulije chigowokero cha zakwananga.

²³Ntheura kukakhumbikwa kuti viyerezgero vya vinthu vya kuchanya viŵe vya kutozgeka mu kachitiro aka. Kweni vinthu vya kuchanya ivyovyene kuti vitozgeke, pakakhumbikwa sembe zinji izo zikuruska izi.

²⁴Pakuti Khristu kuti wakanjira mu Malo Ghakupatulika agho ghakunozgeka na mawoko gha ŵanthu chara, gheneagho nchikozgo waka cha Malo Ghakupatulika ghenecho. Kweni iyo wakanjira kuchanya kwenecho, kuti wawoneke panthazi pa Chiuta mu malo ghithu.

²⁵Khristu wali kunjira kuchanya kuti waperekenge sembe kaŵirikaŵiri chara nga ndi umo Musofi Mukuru wakunjirira mu Malo Ghakupatulika Nkhanira chirimika na chirimika uku wayegha ndopa izo kuti nzakhe chara.

²⁶Kuŵenge ntheura mphanyi Khristu wakusuzgika kaŵirikaŵiri kufuma ku mutendeko wa charu. Kweni sono wali kuwonekerathu kamoza pera pa umaliro wa mgonezi kuti wawuskepo kwananga chifukwa cha sembe ya iyomwene.

²⁷Nga ndi umo ŵanthu wali kupimikira kuti wafwe kamoza pera ndipo pamanyuma ŵeruzgike,

²⁸ntheuraso ndimo Khristu nayo wakaperekekera kamoza pera kuti wawuskepo zakwananga za ŵanthu ŵanandi ndipo wamkuwonekaso kachiŵiri kuti wizakawuskepo zakwananga chara, kweni kwiza kaŵaponoska awo ŵakumlindirira na mtima wa chigomezgo.