Read new_tumbuka_bible Yakhobe 1 Bible Online

Yakhobe 1 - new_tumbuka_bible bible

Yakhobe 1

¹Kufuma kwa ine Yakhobe, muteŵeti wa Chiuta na wa Fumu Yesu Khristu. Kwa imwe mwa mafuko 12 mwaŵeneimwe muli kuparanyikira ku vyaru vyakupambanapambana. Nkhumutauzgani.

²Mwa ŵabali ŵane, muchipime kuti nchimwemwe para mukukumana na viyezgo vyakupambanapambana.

³Pakuti mukumanya kuti kuyezgeka kwa chipulikano chinu kukubaba chizizipizgo.

⁴Ndipo rekani kuzizipizga kwinu kurutilire kwambula kutondeka, mwakuti muŵe ŵakufikapo nkhanirankhanira na ŵambula kusoŵerwa kanthu.

⁵Usange yumoza wa imwe wakusoŵerwa mahara, wakwenera kuromba kwa Chiuta, uyo wakupereka ku ŵanthu wose mu wanangwa kwambula kukonthora ndipo wati wamupenge nadi.

⁶Kweni warombe na chipulikano kwambula kukayika. Chifukwa yose uyo wakukayika, wali nga ndi jigha la nyanja ilo likwendendeka waka, ndipo likuyeghekera uku na uko para laputwa na mphepo.

⁷Pakuti munthu wa ntheura wareke kughanaghana kuti wati wapokenge kanthu kufuma kwa Fumu.

⁸Iyo ndi munthu wa mitima yiŵiri ndipo ngwambula chikhazi mu nthowa zakhe zose.

⁹Mukhristu uyo nchichwapi wathumbwenge para wakukwezgeka.

¹⁰Ndipo mukhristu musambazi nayo wathumbwenge para wakukhizgika pakuti wamarenge nga maluŵa gha mu thondo.

¹¹Pakuti dazi likukwera na chithukivu chakhe chikuru, ndipo na kufoteska utheka. Maluŵa ghakhe nagho ghakurakata ndipo kutowa kwakhe kose kukumara nkhanira. Ntheura ndimo musambazi wakufotera apo wachali kujitangwaniska na milimo ya usambazi wakhe.

¹²Ngwakutumbikika munthu uyo wakuzizipizga viyezgo. Pakuti para watonda viyezgo vira, wati wapoke mphumphu ya umoyo iyo Chiuta wali kupangana kuŵapa wose awo ŵakumutemwa.

¹³Para munthu wakuyezgeka, wareke kuyowoya kuti, “Nkhuyezgeka na Chiuta.” Pakuti Chiuta kuti wangapuruskika na uheni chara, ndipo iyomwene kuti wakuyezga munthu chara.

¹⁴Kweni munthu yose wakuyezgeka para wasongeka na maulamphalampha ghakhe.

¹⁵Para makhumbiro ghakhe ghaheni ghamera mu mtima, ghakubaba kwananga. Ndipo kwananga para kwakura, kukubaba nyifwa.

¹⁶Mungapusikikanga mwa ŵabali ŵane ŵakutemweka.

¹⁷Vyawanangwa vyose viweme na chakuperekeka chakufikapo vikufumira kuchanya, vikukhilira pasi kufuma kwa Dada wa ungweru, mweneuyo kuti ŵakusinthasintha chara, panji kuŵa na muzgezge pakuzgoka.

¹⁸Nakhumbo lakhe, wakatibaba ise na mazgu gha unenesko, mwakuti, ise tiŵe nga vipambi vyakhe vyakudanga mu vilengiwa vyakhe.

¹⁹Mwa ŵabali ŵane ŵakutemweka, manyani ichi: munthu yose waŵenge mupusu kupulika, kweni wazikirenge pakuyowoya na pakukaripa.

²⁰Pakuti ukari wa munthu, kuti ukuchita urunji wa Chiuta chara.

²¹Ntheura wuskanimo ukazuzi wose na uheni uwo wazura mwa imwe, ndipo na mtima wakujiyuyura, pokererani mazgu agho ghakapandika mu mitima yinu, gheneagho ghakumanya kumuponoskani.

²²Mungajipusikanga, muŵe ŵakuchita icho mazgu ghakuyowoya, kughapulika waka chara.

²³Pakuti usange munthu wakupulika mazgu ndipo wakuchita chara kwakuyana na mazgu ghara, wali nga ndi munthu uyo wakulaŵiska chisko chakhe chakawiro pa galasi.

²⁴Para wajilaŵiska, wakuwukapo, ndipo maluŵiro wakuruwa umo chisko chakhe changuwonekera.

²⁵Kweni munthu uyo wakulaŵiska mu dango lakufikapo la wanangwa, na kukhalirira mwenemumo ndipo kuti wakuruwa chara, kweni wakuchita kwakuyana na ilo, wati watumbikikenge pa vyose ivyo wakuchita.

²⁶Usange munthu wakujipima kuti ngwa kusopa Chiuta, kweni walije kumanya kujikora mu kayowoyero, wakujipusika waka, ndipo kusopa kwakhe nkhwa waka.

²⁷Kusopa kwenecho na kwambula kukazuzgika panthazi pa Chiuta Dada ndi uku: kupwererera ŵalanda na vyokoro mu visuzgo vyawo ndiposo na kujisungilira kwambula kukazuzgika na charu.