Read new_tumbuka_bible Yakhobe 2 Bible Online

Yakhobe 2 - new_tumbuka_bible bible

Yakhobe 2

¹Mwa ŵabali ŵane, rekani kutemwera para mukukoreska chipulikano chinu mwa Fumu yithu Yesu Khristu, uyo ndi Fumu ya uchindami.

²Mwa chiyerezgero, usange munthu yunji ŵakunjira mu nyumba yinu yakusoperamo, uku wavwara vyakugabuka na mphete ya golide pa woko, ndipo munyakhe mukavu uyo wavwara vyakuparukaparuka nayo wakunjira,

³ntheura pakukhumba kukondweska uyo wavwara vyakugabuka mukuti, “Iwe, khara pa malo agha.” Ndipo kwa mukavu mukuti, “Iwe wimilire apo, panji ukhare pa chitambaliro cha malundi ghane apa.”

⁴Asi mukujirongora kuti mu mitima yinu muli ŵakupambaniska? Asi mukujimika mwekha kuŵa ŵeruzgi apo muli na maghanoghano ghaheni?

⁵Mwa ŵabali ŵane ŵakutemweka, tegherezgani. Asi Chiuta wali kusora ŵakavu ŵa muno mu charu kuti ŵaŵe ŵasambazi mu chipulikano, na kutiso ŵakanjire mu Ufumu uwo wali kupangana kuŵapa awo ŵakutemwa iyo?

⁶Kweni imwe mukuyuyura ŵakavu. Asi ŵasambazi ndiwo ŵakumuyuzgani na kumuguzirani ku ŵeruzgi?

⁷Asi ŵasambazi ndiwo ŵakutuka zina la kuchindikika ilo imwe mukapika?

⁸Usange mukufiska dango la Ufumu kwakuyana na Malembo agho ghakuti, “Utemwenge muzengezgani wako nga ndi umo ukujitemwera wamwene,” mukuchita makora.

⁹Kweni usange mukutemwera, mukwananga ndipo mukususkika na dango kuti ndimwe ŵakupuvya.

¹⁰Pakuti yose uyo wakusungilira marango ghose, kweni wakuswa limoza, wali na mrandu wakuswa marango ghose.

¹¹Pakuti uyo wakaŵika wakati, “Ungaleŵanga,” ndiyoso wakati, “Ungakomanga.” Sono nanga ungareka kuleŵa, kweni ukukoma, ndiwe wakuswa marango.

¹²Ntheura uyowoyenge na kuchita vinthu nga ndi ŵanthu awo wamkweruzgika na marango gha wanangwa.

¹³Chifukwa weruzgi ngwambula lusungu kwa mweneuyo walije lusungu. Ndipouli lusungu ndilo lukutonda weruzgi.

¹⁴Mwa ŵabali ŵane, kasi kukwandulachi para munthu wakuti wali na chipulikano, apo wakuchita kanthu kakurongora chipulikano chara? Kasi chipulikano cha ntheura chingamuponoska?

¹⁵Mwa chiyerezgero, usange munyinu mwanarume panji mwanakazi walije vyakuvwara nesi chakurya,

¹⁶ntheura yumoza wa imwe wamuphalira kuti, “Rutanga mu mutende, ukathukire na kukhuta, kweni kuti ŵakumupa vinthu vyakwenerera thupi chara,” kasi wakwandulachi?

¹⁷Ntheuraso chipulikano pa icho chekha, usange chilije milimo, nchakufwa.

¹⁸Kweni panji munyakhe wangayowoya kuti, “Iwe uli na chipulikano, ine ndili na milimo, undirongore chipulikano chako kwambula milimo, ndipo ine na milimo yane nditi ndikurongore chipulikano chane.”

¹⁹Imwe mukupulikana kuti Chiuta njumoza pera. Ichi nchiweme nadi, kweni viŵanda navyo vikupulikana na kutenthema.

²⁰Wachindere iwe, kasi ukukhumba kuti ndikurongore kuti chipulikano chambula milimo ncha waka?

²¹Asi Abrahamu sekuru withu wakarunjiskika na Chiuta pa icho wakachita para wakapereka mwana wakhe Yisake pa jochero kuŵa sembe?

²²Ukuwona sono kuti chipulikano chakhe chikakoreranako na milimo, ndipo chipulikano chakhe chikafiskika na milimo yakhe.

²³Penepapo Malembo ghakafiskika agho ghakuti, “Abrahamu wakapulikana na Chiuta, ndipo Chiuta wakamupima kuti ndi murunji.” Ntheura Abrahamu wakachemeka mubwezi wa Chiuta.

²⁴Sono mukuwona kuti munthu wakurunjiskika na Chiuta pa icho wachita, na chipulikano pera chara.

²⁵Ntheura ndimo kukaŵiraso na Rahabu mwanakazi muleŵe yura. Wakarunjiskika pa ivyo wakachita, para wakapokerera nthumi zira izo zikatumika ndipo pakuzifumiska, wakaziyendeska ku nthowa yinyakhe.

²⁶Pakuti nga ndi umo thupi lambula mzimu liriri lakufwa, ntheuraso ndimo chipulikano nacho chambula milimo chikuŵira chakufwa.