Read new_tumbuka_bible Yakhobe 3 Bible Online

Yakhobe 3 - new_tumbuka_bible bible

Yakhobe 3

¹Mwa ŵabali ŵane, ŵanandi ŵa imwe ŵareke kuŵa ŵasambizgi, chifukwa nga ndi umo mukumanyira, ise tikusambizga tamukweruzgika chomene kwakuruska ŵanthu ŵanyakhe.

²Pakuti tose tikunanga pa vinthu vinandi. Uyo wakureka kunanga mu mayowoyero, ngwa kufikapo nkhanira, ndipo wakumanyaso kujikora thupi lose.

³Usange taŵikamo tuvisulo twakukorera mu milomo ya mahachi kuti ghatipulikire, tikumanya kurongozga mathupi ghawo ghose.

⁴Wonaniso ngaraŵa, nanga nzikuru chomene ndipo zikukanchizgika na mphepo za nkhongono, kweni zikurongozgeka na kasigiro kachoko waka na kuruta kose uko mwendeski wakukhumba.

⁵Ntheuraso lulimi nalo nchiŵaro chichoko waka, kweni likujikuzga pa vinthu vikuru. Ghanaghanani na umo thengere likuru likuphyira chifukwa cha kamoto kachoko waka.

⁶Lulimi ndi moto. Lulimi ndi charu cha ubendezi mukati mu viŵaro vyithu. Lukukazuzga thupi lose ndipo lukugolezga mu moto kaŵiro kose ndipo ulo lwene lukugolezgeka na Gehena

⁷Pakuti vikoko vya mitundu yose, viyuni, vyakukhwaŵa, na ivyo vikusangika mu nyanja, vingazoŵezgeka.

⁸Kweni palije munthu uyo wakumanya kuzgoŵezga lulimi. Ndi kanthu kaheni na kambula kupumula ndipo nkhakuzura na ulembe wakukoma.

⁹Na lulimi lweneulu tikumanya kurumbira Fumu, iyoso ndi Ŵadada, kweniso na lulimi lweneulu tingamanya kutemba ŵanyithu awo ŵali kulengeka mu chikozgo cha Chiuta.

¹⁰Kufuma mu mlomo umoza pera mukufuma mazgu ghakurumba na ghakutemba. Mwa ŵabali ŵane, vya ntheura kuti vikwenera kuchitika chara.

¹¹Kasi mbwiwi yimoza yingamanya kufumya maji ghaweme na ghakuŵaŵa pa khururu limoza?

¹²Mwa ŵabali ŵane, kasi chikuyu chingamanya kupambika vipambi vya maolive? Panji khuni la mpheska, kasi lingamanya kupambika vikuyu? Ntheura pera mbwiwi za maji gha muchere kuti zingafumiska maji ghaweme chara.

¹³Ndi njani mukati mwinu uyo ngwa mahara na wakupulikiska tunthu? Rekani na umoyo wakhe uweme warongore milimo yakhe mu kuzika kwa mahara.

¹⁴Kweni usange muli na sanje yikari, na makhumbiro gha uzukusi mu mitima yinu, mureke kuthumbwa ndipo mungateteranga pa unenesko.

¹⁵Mahara gha ntheura kuti ghakufuma kuchanya chara, kweni nga mu charu, nga uzimu chara ndiposo nga Satana.

¹⁶Pakuti apo pali sanje na makhumbiro gha uzukusi, pali vitimbaheti na uheni wa mtundumtundu.

¹⁷Kweni mahara agho ghakufuma kuchanya, pakudanga ngambula kukazuzgika, ndiposo nga mutende, ngakuzika, ngakupulikikwa, ngakuzura lusungu, ndiposo ghali na milimo yiweme, yambula sankho na upusikizgi.

¹⁸Ndipo vuna ya urunji yikupandika mu mutende na awo ŵakuŵika mutende.