Read new_tumbuka_bible Yakhobe 4 Bible Online

Yakhobe 4 - new_tumbuka_bible bible

Yakhobe 4

¹Kasi zinkhondo na mazawe mukati mwinu vikufuma nkhu? Asi vikufuma mu makhumbiro ghinu ghaheni agho ghakulimbana mu viŵaro?

²Mukukhumba vinthu kweni kuti mukuvisanga chara, ntheura mukwamba kukoma. Mukudokera vinthu, kweni kuti mukuvisanga chara, ntheura mukwambana na kurwa nkhondo. Mukutondeka kuŵa navyo chifukwa mukuromba chara.

³Mukuromba, kweni kuti mukupokera chara, chifukwa kuti mukurombera mu nthowa yiweme chara. Ivyo mukuromba mukukhumba kuti muvisakazirenge mu vyakukondweska vya thupi.

⁴Imwe mwa ŵanthu ŵambula kugomezgeka, kasi mukumanya chara kuti kukorana ubwezi na charu, mburwani na Chiuta? Ntheura munthu uyo wakukorana ubwezi na charu, wakujizgora murwani wa Chiuta.

⁵Panji kasi mukupima kuti Malembo ghakuyowoya pa waka para ghakuti, “Chiuta wakukhumbisiska mwa sanje mzimu uwo iyo wali kuŵika mwa ise.”

⁶Kweni wakutipa uchizi wakuruska. Ndimo Malembo ghakuyowoyera kuti, “Chiuta wakwimikana na ŵanthu ŵakujikuzga, kweni ŵakujiyuyura, wakuŵapa uchizi.”

⁷Ntheura jiperekani kwa Chiuta. Limbanani na Satana ndipo iyo wati wamuchimbiraninge.

⁸Sendererani kwa Chiuta, ndipo iyo wati wasenderere kwa imwe. Jitozgani mu mawoko, imwe ŵanthu ŵakwananga. Jiphotorani mu mitima yinu, imwe ŵa mitima yiŵiri.

⁹Musuzgike, ndipo mutengere na kulira. Kuseka kwinu kuzgoke kutengera, ndipo chimwemwe chinu chizgoke chitima.

¹⁰Jiyuyurani pa maso pa Fumu, ndipo yiti yimukwezganinge.

¹¹Mwa ŵabali, mureke kunenana. Yose uyo wakuyowoyera uheni mukhristu munyakhe, panji kumweruzga, wakuyowoyera uheni panji kweruzga dango. Kweni usange ukweruzga marango gha Chiuta, ndiko kuti ukuchita icho marango ghakuyowoya chara, kweni ukujizgora mweruzgi.

¹²Pali yumoza uyo wakupereka dango na kweruzga mweneuyo wakumanya kuponoska na kukoma. Kasi ndiwe njani iwe kuti umweruzge mzengezgani wako?

¹³Tegherezgani sono imwe mukuti, “Muhanya uno, panji na machero tirutenge ku muzi wakuti na wakuti ndipo tamkumarako chirimika chimoza kuchita malonda na kusanga chandulo cha chuma chithu.”

¹⁴Apo kuti mukumanya chara icho chiti chiŵengeko na machero. Kasi umoyo winu nchichi? Asi ukulingana waka na nyathutwe uyo wakuwoneka mu kanyengo kachoko waka ndipo wakumwalalikira.

¹⁵Mu malo mwakhe mukwenera kuyowoya kuti, “Usange Fumu yikukhumba, tiŵenge ŵamoyo, ndipo tamkuchita chakuti na chakuti.”

¹⁶Kweni imwe mukuthumbwa, mukujikuzga. Kujikuzga kose kwa ntheura, nkhuheni.

¹⁷Usange munthu wakumanya icho nchiweme kuchita, kweni wakureka kuchichita, wakwananga.