Read new_tumbuka_bible Yakhobe 5 Bible Online

Yakhobe 5 - new_tumbuka_bible bible

Yakhobe 5

¹Mwa ŵasambazi, tegherezgani. Lirani na kutengera chifukwa cha visuzgo ivyo vyamkumwizirani.

²Usambazi winu wavunda ndipo vyakuvwara vyinu vyaryeka na zinyenje.

³Chuma chinu cha golide na cha siliva nacho charyeka na murosko. Murosko uwu ndiwo uti umupanikizgirani na kumususkani ndipo wizamkurya mathupi ghinu nga ndi moto. Mwajiwunjikira vyuma mu mazuŵa gha umaliro.

⁴Wonani malipiro gha ŵanchito awo ŵakavuna mu minda yinu, agho mukajisungira mu upusikizgi ghakuchemerezga. Ndipo kulira kwa ŵakuvuna kwapulikikwa mu makutu gha Fumu Mwenenkhongono zose.

⁵Mwakoroka pa charu na kujikondweska. Mwatutuŵiska mitima yinu kunozgekera zuŵa lakukomekera.

⁶Mwamususka na kumukoma munthu murunji, ndipo iyo kuti wakulimbana namwe chara.

⁷Ntheura mwa ŵabali, zizipizgani mpaka kwiza kwa Fumu. Wonani umo mulimi wakuchitira. Iyo wakulindirira kuti vipambi vyakuzirwa viwoneke mu munda wakhe. Wakuzizipizga na kuzika mpaka vura yize yakudanga na ya umaliro.

⁸Imwe namwe muzizipizgenge. Khazikiskani mitima yinu, pakuti nyengo ya kwizira Fumu yili pafupi.

⁹Mwa ŵabali, mureke kusinginikirana yumoza na munyakhe, mweruzgike. Mweruzgi wakwimilira pa muryango.

¹⁰Mwa ŵabali, mukumbukenge nchimi izo zikayowoyera mu zina la Fumu. Ndizo ziŵenge bambiro kwa imwe pakuzizipizga kwawo mu visuzgo.

¹¹Tikuzipima nchimi zira kuŵa zakutumbikika chifukwa cha kuzizipizga kwawo. Mulikupulika umo Yobe wakazizipizgira, ndiposo muli kuwona urato wa Fumu, na umo Fumu yiliri na lusungu na chiwuravi.

¹²Mwa ŵabali ŵane, pachanya pa vyose, mureke kurapira kuchanya panji pano pasi, panji mu chinyakhe chilichose. Kweni rekani “Inya” winu waŵe “Inya” ndipo “Chara” winu waŵe “Chara”, mwakuti mureke kususkika.

¹³Kasi walipo yumoza mwa imwe uyo wakusuzgika? Wakwenera kuromba. Kasi walipo yumoza uyo wakukondwa? Wimbe sumu zakurumba Chiuta.

¹⁴Kasi walipo yumoza uyo ndi murwari? Wakwenera kuchema ŵarara ŵa mpingo, kuti wamurombere na kumuphakazga mafuta mu zina la Fumu.

¹⁵Lurombo lwa chipulikano, lukumanya kuponoska murwari, ndipo Fumu yiti yimuwuske. Ndipo usange wali kunangapo, wagowokerekenge.

¹⁶Ntheura zomerani zakwananga zinu ku yumoza na munyakhe, ndipo muromberane mwakuti muchizgike. Lurombo lwa munthu murunji luri na nkhongono zikuru mu kachitiro kakhe.

¹⁷Eliya wakaŵa munthu nga ndise. Na mtima wose wakaromba kuti vura yireke kurokwa, ndipo nadi yikareka kurokwa pa charu virimika vitatu na myezi yinkhonde na umoza.

¹⁸Sono wakati warombaso, mtambo ukapereka vura ndipo charu chikapambika vipambi vyakhe.

¹⁹Mwa ŵabali, usange yumoza wa imwe wapuruka ku unenesko, ndipo munthu yunji wakumuwezgako,

²⁰rekani wamanye kuti yose uyo wati wamuwezgeko wakwananga ku nthowa yakhe yakupuruka, wati waponoske umoyo wakhe ku nyifwa. Ndipo wati wawundirenge zakwananga zakhe zinandinandi.