Read new_tumbuka_bible 1 Petrosi 1 Bible Online

1 Petrosi 1 - new_tumbuka_bible bible

1 Petrosi 1

¹Kufuma kwa ine Petrosi wakutumika wa Yesu Khristu. Nkhumulemberani imwe ŵakusoreka ŵa Chiuta, mwaŵeneimwe muli kuparanyikira mu vigaŵa ivi: Pontu, Galatiya, Kapadokiya, Asiya na Bitiniya,

²mwaŵeneimwe mukasoreka na kwimikika na Chiuta Dada ndipo mukapatuliskika na Mzimu kuti mupulikire Yesu Khristu na kutozgeka na ndopa zakhe. Uchizi na mutende viŵenge vyakwandaniskika kwa imwe.

³Viwongo kwa Chiuta, Wiske wa Fumu yithu Yesu Khristu. Chifukwa cha lusungu lwakhe lukuru, tababikaso ku umoyo wa chigomezgo chiphya mu kuwuka kwa Yesu Khristu ku ŵakufwa,

⁴ndiposo ku chiharo icho nchambula kuvunda, kukazuzgika na kuvukupara icho chili kusungikira imwe kuchanya.

⁵Mwa imwe na nkhongono za Chiuta mukuvikiririka mu chipulikano kuti mwizakapokere chiponosko icho iyo wanozgera kuchivumbula mu nyengo ya umaliro.

⁶Mu cheneichi sekererani nangauli sono pa kanyengo kachoko waka mungaŵa na viyezgo vyakupambanapambana,

⁷mwakuti kuyezgeka kwa chipulikano chinu icho nchakuzirwa kuruska golide leneilo likumara, nangauli likuyezgeka na moto, kuŵe kwenecho. Penepapo imwe muti mupokerenge marumbo, uchindami na nchindi pakuvumbukwa kwa Yesu Khristu.

⁸Nangauli iyo mundamuwone, kweni mukumutemwa. Nangauli sono mukumuwona chara, mukupulikana mwa iyo ndipo mukusekerera na chimwemwe chikuru chambula mayowoyeko.

⁹Pa chakurata cha chipulikano chinu mukupokera chiponosko cha mizimu yinu.

¹⁰Nchimi izo zikachima na uchizi weneuwo ukwenera kuŵa winu, zikapenjeska na kusanda nadi za chiponosko ichi.

¹¹Zikayezga kuti zimanye munthu panyakhe nyengo iyo yikarongoreka na Mzimu wa Khristu uwo ukaŵa mwa iwo pakuchima nkhanira visuzgo vya Khristu na uchindami uwo ukarondezgapo.

¹²Chiuta wakazivumbulira nchimi zira kuti zikajiteŵeteranga izo zene chara, kweni imwe, vinthu ivyo vyayowoyeka kwa imwe na awo ŵakamupharazgirani Uthenga Uweme mwa Mzimu Mutuŵa uyo wakatumika kuchanya. Ŵakamupharazgirani vinthu ivyo nanga mbangelo ŵakudoka kuviwona.

¹³Ntheura vwarani zikhore mu maghanoghano ghinu, ndipo muŵe ŵakujikora. Muŵike chigomezgo chinu chose pa uchizi uwo mwizamupokera apo wavumbukwirenge Yesu Khristu.

¹⁴Muŵe nga mbana ŵakupulikira. Mureke kurongozgeka na makhumbiro ghinu gha kale apo mukaŵa ŵalemwa.

¹⁵Kweni pakuti uyo wakamuchemani ndi mutuŵa, ntheura namwe muŵenge ŵatuŵa mu kaŵiro kinu kose.

¹⁶Pakuti kuli kulembeka kuti, “Muŵenge ŵatuŵa, pakuti ine ndili mutuŵa.”

¹⁷Ndipo usange mukumuchema iyo “Dada,” mweneuyo wakweruzga munthu yose kwambula sankho kweni kwakuyana na milimo yakhe ipo wakwenera kuŵa na wofi mu umoyo winu wose wa pano pasi nga mba ŵamikori.

¹⁸Imwe mukumanya kuti mukawomboleka ku makhaliro ghinu ghawakawaka agho mukatora ku ŵawiskemwekuru, na vinthu vyakumara nga ndi siliva na golide chara.

¹⁹Kweni mukawomboleka na ndopa zakuzirwa za Khristu, zakukozgana na za mwana-mberere wambula kalema nesi kadontho.

²⁰Wakamikika pambere malufura gha charu ghandaŵikike ndipo wakarongoreka pa umaliro wa zinyengo chifukwa cha imwe.

²¹Mwa Yesu, muli na chigomezgo mwa Chiuta mweneuyo wakamuwuska iyo ku ŵakufwa na kumupa uchindami. Ndicho chifukwa muli kuŵika chipulikano na chigomezgo mwa Chiuta.

²²Pakuti muli kutozga mitima yinu pakupulikira unenesko kuti mutemwenge ŵakhristu ŵanyinu kwambula kupusikizga, mutemwane kwakuruska kufumira pasi pa mtima.

²³Mulikubabikaso na mbuto iyo yingavunda chara, kweni iyo yingareka kuvunda, chifukwa cha mazgu gha Chiuta agho ngamoyo na ghakukhalirira.

²⁴Chifukwa, “Ŵanthu wose ŵali nga ndi utheka, ndipo uchindami wawo wose uli nga luŵa la utheka. Utheka ukufota, ndipo luŵa likuwa pasi,

²⁵kweni mazgu gha Fumu, ghakukhalirira kwa muyirayira.” Mazgu ghara ndi Uthenga Uweme uwo ukapharazgika kwa imwe.