Read new_tumbuka_bible 1 Petrosi 4 Bible Online

1 Petrosi 4 - new_tumbuka_bible bible

1 Petrosi 4

¹Pakuwona kuti Khristu wakasuzgika mu thupi, namweso mukwenera kujikhozga na maghanoghano gha ntheura. Chifukwa usange munthu wakomwa mu thupi, wali kurekaso kwananga.

²Pakuti kufuma sono, umoyo winu wa muno mu charu ukwenera kurongozgeka na makhumbiro gha thupi chara, kweni na khumbo la Chiuta.

³Pakuti mwanguŵa nayo nyengo ya kukwanira apo mukachitanga vinthu ivyo ŵamitundu ŵakachitanga. Pa nyengo yira mukachitanga vya nthontho, udokezi, uloŵevu, uryezi na kusopa vikozgo.

⁴Kweni sono ŵamitundu ŵakuzizwa waka para mukureka kusangana nawo mu makhaliro ghawo ghawakawaka. Ntheura ŵakumutukani.

⁵Ŵanthu aŵa ŵamkujipataulira ŵekha kwa Chiuta uyo ngwa kunozgeka kweruzga ŵamoyo na ŵakufwa.

⁶Ndicho chifukwa Uthenga Uweme ukaya na ku awo ŵali kufwa wuwo, ŵeneawo ŵakeruzgika kwakuyana na thupi nga ndi umo ŵanthu wose ŵakweruzgikira. Uthenga Uweme ukaŵapharazgikira mwakuti mu mzimu ŵaŵe na umoyo nga ndi umo Chiuta waliri.

⁷Umaliro wa vinthu vyose uli pafupi. Ntheura mukwenera kujikora, muŵe ŵakuziza mwakuti mujipereke kukuromba.

⁸Pachanya pa vyose mutemwanenge nkhanirankhanira, pakuti kutemwa kukubenekerera zakwananga zinandinandi.

⁹Mupokererenge ŵalendo kwambula kusinginika.

¹⁰Chawanangwa chose icho munthu wangaŵa nacho, wachiteŵeterenge ŵanyakhe mwakugomezgeka, kwakuyana na umo Chiuta wali kumupira.

¹¹Yose uyo wakuyowoya, wayowoye mazgu gha Chiuta. Yose uyo wakuteŵetera ŵanyakhe, wakwenera kuteŵeta na nkhongono izo Chiuta wali kumupa. Mwakuti mu vyose muchindikenge Chiuta mwa Yesu Khristu. Kwa iyo ndiko kuŵenge uchindami na nkhongono muyirayira swii. Ameni.

¹²Mwa ŵabali ŵakutemweka, mureke kuzizwa na viyezgo vinonono, ivyo mukukomwa navyo nga ndi para chinthu chilendo chamwizirani.

¹³Kweni sekererani pakuwona kuti mukusangana na Khristu mu visuzgo vyakhe, mwakuti para wiza mu uchindami wakhe, mwize kakondwe nayo chomene.

¹⁴Usange mukutukika chifukwa cha zina la Khristu, muli ŵakutumbikika. Chifukwa ndiko kuti Mzimu wa uchindami uwo ndi Mzimu wa Chiuta, ukukhara mwa imwe.

¹⁵Kuŵavye yumoza wa imwe wakomwe chifukwa ndi chigeŵenga panji munkhungu, panji wakuchita mauheni, panji uyo ndi mwendanato.

¹⁶Kweni usange munthu wakukomwa chifukwa cha ukhristu wakhe, wareke kuŵa na soni na pachoko pose, kweni wakwenera kuchindika Chiuta chifukwa cha zina ili la ukhristu.

¹⁷Pakuti nyengo ya kweruzgikira yafika, ndipo yayamba pa awo mba mu Nyumba ya Chiuta. Ndipo usange kweruzga uku kwamba pa ise, kasi kwamkuŵa uli pa awo ŵakureka kupulikira Uthenga Uweme wa Chiuta?

¹⁸Pakuti malembo ghakuti, “Usange nkhunonono kuti murunji waponoskeke, kasi kwamkuŵa uli ku ŵaheni na ŵakwananga?”

¹⁹Ntheura awo ŵakukomwa kwakuyana na khumbo la Chiuta, ŵakwenera kurutilira kuchita uweme na kujipereka kwa Chiuta Mlengi wawo uyo ngwa kugomezgeka.