Read new_tumbuka_bible 1 Petrosi 5 Bible Online

1 Petrosi 5 - new_tumbuka_bible bible

1 Petrosi 5

¹Sono nkhuchiska ŵarara ŵa mpingo awo ŵali mukati mwinu nga ndi murara munyawo wa mpingo, ndiposo kaboni wa viphyo vya Khristu, na wakusangana nayo mu uchindami uwo uti uvumbukwenge.

²Nkhumuchiskani kuti muliske mskambo wa Chiuta, uwo uli mukati mwinu. Muwupwererere na mtima wose kwambula kuchichizgika na munthu, kweni mu khumbiro linu nga ndi umo wakukhumbira Chiuta. Mureke kuteŵeta chifukwa cha njombe, kweni chifukwa cha mtima wa kutemwa kuteŵeta.

³Mureke kuyuzga mskambo uwo mukuwuliska, kweni muŵenge bambiro liweme ku mskambo winu.

⁴Ntheura para Muliska Mukuru wiza, mwizamkupokera mphumphu ya uchindami iyo kuti yikuvukupara chara.

⁵Ntheura pera imwe mwa ŵawukirano, mupulikirenge ŵarara ŵinu. Mose muŵenge na mtima wakujiyuyura pakuteŵeterana yumoza na munyakhe. Chifukwa Malembo ghakuti, “Chiuta wakwimikana na ŵakujikuzga, kweni wakuŵapa wezi wakhe awo ŵakujiyuyura.”

⁶Ntheura jiyuyurani panthazi pa nkhongono ya Chiuta, mwakuti iyo ndiyo wamukwezgani pa nyengo yakwenerera.

⁷Kwenjerwa kwinu kose mumuthulire iyo, chifukwa ndiyo wakumupwerererani.

⁸Jikorani, ndiposo muŵe maso, chifukwa murwani winu Satana wakuyingayinga nga ndi nkharamu iyo yikuwuruma kupenja uyo yingamurya.

⁹Mwimikane nayo uku mwimilira nganganga mu chipulikano chinu apo mukumanya kuti ŵakhristu ŵanyinu ŵa mu charu chose cha pasi, nawo ŵakukomwa ntheura pera.

¹⁰Kweni para mwakomwa kanyengo kachoko waka, Chiuta wa uchizi wose mweneuyo wakamuchemani kusangana nayo uchindami wakhe wa muyirayira mwa Yesu Khristu, ndiyo wizamkumuzgorani kuŵa ŵakufikapo. Wizamkumukhozgani na kumupani nkhongono ndiposo kumujinthani pa lufura lwakukhora.

¹¹Kwa iyo kuŵenge nkhongono muyirayira swii. Ameni.

¹²Silivano, mukhristu wakugomezgeka wandovwira kulemba karata mufupi uyu. Mu karata uyu ndakhumba kumukhwimiskani na kumupanikizgirani kuti, uwu ndiwo uchizi wenecho wa Chiuta. Mu uchizi weneuwu ndimo mwimilire nganganga.

¹³Ŵa mpingo wa Chiuta awo ŵali mu msumba wa Babuloni awo ŵali kusoreka na Chiuta, ndiposo na Mariko mwana wane, ŵakumutauzgani.

¹⁴Tauzganani na kutemwa kwenecho pakuyofyonthana kwa chikhristu. Mutende uŵe namwe mose imwe muli mwa Khristu.