Read new_tumbuka_bible 2 Petrosi 1 Bible Online

2 Petrosi 1 - new_tumbuka_bible bible

2 Petrosi 1

¹Kufuma kwa ine Simoni Petrosi muteŵeti na wakutumika wa Yesu Khristu. Kwa awo ŵali kupokera chipulikano chakuzirwa chakuyana waka na chithu, mu urunji wa Chiuta withu na Muponoski Yesu Khristu.

²Uchizi na mutende vimwandanirani mukumanya Chiuta na Yesu Fumu yithu.

³Nkhongono za uchiuta wakhe zili kutipa vinthu vyose ivyo tikukhumba kuti tiŵe na umoyo wakusopa Chiuta kwizira mu umanyi wa uyo wakatichema ise kuti tisangane nayo uchindami na uweme wakhe.

⁴Mu vyeneivi wali kutipa mapangano ghakuru na ghakuzirwa mwakuti kwizira mwa iyo tikumanya kufyolowokamo mu maulamphalampha agho ghali mu charu ndipo nakusangana mu kaŵiro ka uChiuta.

⁵Pa chifukwa ichi chitani chilichose pakusazgirako uweme ku chipulikano chinu pamoza na unenesko, ku unenesko, musazgeko umanyi,

⁶ku umanyi musazgeko kujikora, kujikora, musazgeko kuzizipizga, ndipo kuzizipizga, musazgeko usopisopi,

⁷ku usopisopi musazgeko chiwuravi ku ubali winu wa chikhristu, ndipo ku chiwuravi ku ubali winu wa chikhristu, musazgeko kutemwa.

⁸Pakuti usange vinthu ivi nvyinu ndipo nvyakuzara, kuti vikumuzgorani ŵakata chara nesi ŵambula vipambi pakumanya Fumu yithu Yesu Khristu.

⁹Munthu uyo walije vyeneivi ngwa chiburumutira ndipo ngwa kuwona pafupi pera. Wali kuruwa kuti zakwananga zakhe za kale zili kusukika.

¹⁰Ntheura mwa ŵabali, yezgani na phamphu chomene kurongora kuti muli kuchemeka na kusoreka, pakuti usange mukuchita ichi, kuti mukhuŵarenge chara.

¹¹Ntheura mwamkuŵa na mwaŵi ukuru wakunjirira mu ufumu wa muyirayira wa Fumu na Muponoski withu Yesu Khristu.

¹²Ntheura ine nkhukhumba kuti ndimukumbuskaninge vyeneivi mazuŵa ghose, nangauli mukuvimanya ndiposo vili kukhazikika mu unenesko uwo muli nawo.

¹³Nkhupima kuti nchakwenerera kumuwuskani na ichi nga nchikumbusko apo ndichali wamoyo,

¹⁴Pakuti nkhumanya kuti kuwukamo mu thupi ili, kuŵenge kwa sonosono nga ndi umo Fumu yithu Yesu Khristu wakandirongorera.

¹⁵Nditi ndiŵikepo mtima chomene kuti para ine ndaruta, mwendakakumbukanga vinthu ivi mazuŵa ghose.

¹⁶Pakuti ise kuti tikarondezga vidokoni vyakwata waka chara para tikamumanyiskani vya nkhongono na vya kwiza kwa Fumu yithu Yesu Khristu, kweni tikaŵa ŵakaboni ŵa uchindami wakhe.

¹⁷Pakuti para wakapokera nchindi na uchindami kufuma kwa Chiuta Dada, mazgu ghakiza kwa iyo kufuma ku uchindami ukuru ghakuti, “Uyu ndi Mwana wane wakutemweka, mweneuyo nkhucha nayo.”

¹⁸Ise tikaghapulika mazgu agha kufuma kuchanya, pakuti tikaŵa nayo pa phiri lakupatulika.

¹⁹Ntheura tili na mazgu gha uchimi agho nga unenesko nadi. Muti muchite makora para mukughapulikizga, pakuti ghali nga ndi nyali iyo yikuŵala mu malo gha mdima kusuke kuche, ndipo nthanda, nyenyezi ya mulenje, yiŵale mu mitima yinu.

²⁰Pakudanga pa vyose mukwenera kumanya ichi kuti, palije uchimi wa malembo uwo munthu wangamanya kutanthaula pa iyo yekha,

²¹Chifukwa palije uchimi uwo ukiza na khumbo la munthu, kweni ŵanthu ŵakayowoya mazgu gha Chiuta para ŵakakhuŵirizgika na Mzimu Mutuŵa.