Read new_tumbuka_bible 2 Petrosi 2 Bible Online

2 Petrosi 2 - new_tumbuka_bible bible

2 Petrosi 2

¹Kweni zikawuka nchimi zitesi mukati mu ŵanthu nga ndi umo kwamkuŵirakoso ŵasambizgi ŵatesi mukati mwinu. Mwachibisibisi ŵamkunjizga visambizgo vya utesi ivyo vikuparanya na kukana Fumu yawo iyo yikaŵawombola, ndipo ntheura mwaluŵiro ŵamkujitorera pharaniko.

²Ŵanthu ŵanandi wizamkuŵarondezga mu nthowa zawo ziheni, ndipo chifukwa cha ivyo ŵakuchita, ŵamkusunjizga nthowa ya unenesko.

³Ndipo mu uzukusi wawo ŵasangirengepo mwaŵi pa imwe pakumuphalirani mazgu gha upusikizgi. Kweni kufuma papo kuti ŵanguŵa ŵambula chilango chara ndipo pharaniko lawo likuŵalindirira.

⁴Pakuti usange Chiuta wakaŵareka waka chara ŵangelo awo ŵakananga, kweni wakaŵaponya ku Gehena ndipo wakaŵaŵika mu mdima kuti ŵasungike mpaka pa zuŵa la cheruzgo;

⁵usange wakachilekerera charu cha kale chara, para wakiza na chigumura pa charu cha ŵanthu ŵambula kusopa Chiuta, kweni wakaponoska Nowa, mupharazgi wa urunji pamoza na ŵanthu ŵanyakhe ŵankhonde na ŵaŵiri;

⁶usange wakayisuska misumba ya Sodomu na Gomora, ndipo wakayimara na moto, kuti chiŵe chirongorero chakuchenjezga ŵanthu awo ŵakureka kusopa Chiuta;

⁷ndipo usange wakamuponoska Loti munthu murunji, uyo mtima wakhe ukasuzgikanga chomene na makhaliro gha ukazuzi gha ŵanthu ŵaheni

⁸pa icho munthu murunji yura wakawona na kupulika, apo wakakharanga mukati mwawo, wakapwetekekanga mu mtima wakhe wa urunji zuŵa na zuŵa chifukwa cha machitiro gha uchikanamarango,

⁹ntheura Fumu yikumanya umo yingathaskira ŵanthu ŵarunji ku viphyo vyawo, na kuŵaŵika mu chilango ŵaheni kuya kafika pa zuŵa la weruzgi,

¹⁰chomenechomene awo ŵakurondezga maukazuzi gha makhumbiro gha thupi, na kusunjizga ŵamazaza. Ŵasambizgi ŵatesi aŵa mbachikanga na ŵakujikuzga ndipo ŵakopa chara kuyuyura ŵakuchindikika.

¹¹Nanga mbangelo, awo mbankhongono kuruska ŵanthu ŵaheni aŵa mu makhaliro na mu nkhongono, kuti ŵakutuka ŵatuŵa ŵa kuchanya panthazi pa Fumu chara.

¹²Ŵanthu aŵa ŵakuyana waka na vikoko vyambula mahara, ivyo vikukhara kwakuyana na kaŵiro kawo ndipo viliko kuti ŵanthu ŵavikorenge na kuvikoma. Ŵakutuka vinthu vyeneivyo ŵalije na kuvimanya. Ntheura ŵamkukomeka nga ndi vikoko vira,

¹³ndipo ŵamkusuzgika chifukwa chakuchita uheni. Chinthu chakuŵakondweska iwo nkhuchita uheni apo dazi liri nye! Ŵali nga ndi mabanga agho ghakumukhozgani soni na kumulengeskani para ŵakusangana namwe pa kurya, apo iwo ŵakukondwera mu kupusikika kwawo.

¹⁴Mbamasomaso chomene pa uleŵe ndipo mitima yawo yili lyokolyoko pakuchita uheni. Ŵakupusika ŵanthu awo mbatechitechi ndipo ŵali na mtima uwo uli kuzgoŵera kudokera ndipo mbakutembeka na Chiuta.

¹⁵Ŵali kuyireka nthowa ya kunyoroka ndipo ŵali kupuruka, pakurondezga nthowa ya Balaamu mwana wa Beyoro, uyo wakatemwa kuŵa na usambazi wakufuma mu ubendezi.

¹⁶Kweni wakachenyeka chifukwa cha kwananga kwakhe. Pakuti mbunda iyo kuti yikuyowoya chara, yikayowoya nga ndi munthu na kukanizga machitiro ghavifusi gha nchimi yira.

¹⁷Ŵanthu ŵa ntheura aŵa, ŵali nga ndi mbwiwi zambula maji, ndiposo nga ndi nyathutwe mweneuyo wakuputwa na chimphupuru. Chiuta wali kuŵaŵikira mdima wakofya.

¹⁸Pakuti ŵakuyowoya mazgu ghakujikuzga na gha uchindere, ndipo na makhumbiro ghaheni gha mathupi ghawo, ŵakupusika ŵanthu awo ŵathaskika sonosono ku nkharo ya awo ŵakuchita ubendezi.

¹⁹Ŵakupangana kuŵapa wanangwa apo iwo ŵenecho mbazga ŵa kwananga. Pakuti munthu wakuzgoka kuŵa muzga wa chose icho chamutonda.

²⁰Pakuti usange ŵanthu ŵathaskika ku maukazuzi gha mu charu, chifukwa chakumanya Fumu na Muponoski withu Yesu Khristu, ndipo sono usange ŵakorekaso na zakwananga na kuzgoka kuŵa ŵazga ŵa zakwananga zira, ŵakuŵa ŵaheni kuruska umo ŵakaŵira pakudanga.

²¹Pakuti mphanyi kukaŵa kuweme kwa iwo kuti ŵareke na kumanya nthowa ya urunji kuruska kuti ŵayimanye, ndipo pamanyuma ŵareke kurondezga marango ghatuŵa agho Chiuta wakaŵapa.

²²Chachitika ntheura kwa iwo kwakuyana na ntharika ya unenesko, iyo yikuti, “Ncheŵe yikuwerera ku mawukuzi ghakhe.” Ndipo “Nkhumba nanga uyigeziske na maji, yiti yivivirengeso mu mathipa.”