Read new_tumbuka_bible 2 Petrosi 3 Bible Online

2 Petrosi 3 - new_tumbuka_bible bible

2 Petrosi 3

¹Mwa ŵakutemweka, sono nkhulemba karata wane uyu wa chiŵiri kwa imwe, ndipo mu makarata ghose ghaŵiri wuwo nkhumukumbuskani kuti muwuske maghanoghano ghinu kuti ghaŵe gha unenesko.

²Kumbukani mazgu agho ghakayowoyeka kale na nchimi zituŵa, na marango agho yikatipa Fumu na Muponoski, para wakayowoyera mu ŵakutumika ŵinu.

³Pakudanga, manyani kuti mu mazuŵa gha umaliro ŵamkwiza ŵanthu ŵakugoska, ŵeneawo ŵakurondezga makhumbiro gha mathupi ghawo,

⁴ndipo ŵamkuti, “Kasi phangano lakwiza kwakhe liri nkhu? Ŵasekuru ŵithu ŵali kufwa kale ndipo vinthu vyose vili nga ndi umo vikaŵira kufuma pa kwamba kwa kulenga.”

⁵Ŵakuzerezgera dala unenesko uwu, kuti na mazgu gha Chiuta mlengalenga ukaŵako kale chomene ndipo charu chikapangika kufuma ku maji ndipo chikapangika na maji.

⁶Ndipo na maji gheneghara, charu icho chikaŵako nyengo yeneyira chikati chazura na maji gha chigumura chikamara.

⁷Kweni na mazgu gheneghara, Chiuta wali kusungilira charu cha kuchanya na cha pasi na ivyo viliko sono mwakuti wizakavimare na moto. Wali kuvisungilira kufika pa zuŵa ilo wamkweruzgira ŵakwananga na kuŵamara petu.

⁸Kweni mwa ŵakutemweka, mureke kuzerezga fundo yimoza pera iyi, kuti kwa Fumu, zuŵa limoza liri nga virimika 1,000 ndipo virimika 1,000 vili nga zuŵa limoza.

⁹Fumu kuti yikuziwurika chara kufiska icho yapangana, nga ndi umo ŵanji ŵakughanaghanira. Kweni yikumuzizipizgirani chifukwa yilije kukhumba kuti yumoza wa imwe wamare petu, kweni kuti wose ŵang'anamuke mtima.

¹⁰Kweni zuŵa la Fumu lizenge nga ndi munkhungu. Ndipo pa zuŵa ilo, mlengalenga wizamkumara na mphomo yikuru. Mawumba[1] gha kuchanya ghizamkuphya na kwengetuka, ndiposo charu cha pasi na vyose ivyo vilimo vizamkocheka na moto.

¹¹Pakuti vinthu vyose vizamkumara mu nthowa yeneiyi pera, asi imwe mukwenera kuŵa na makhaliro ghatuŵa nkhanira na ghakusopa Chiuta?

¹²Apo mukulindizga na kunwekera zuŵa ilo Chiuta wamkwizira. Pakuti pa nyengo iyo mlengalenga wizamkusongonoka kuŵa dimi la moto, ndipo vya mlengalenga vizamkwengetuka chifukwa cha chithukivu.

¹³Kweni kwakuyana na phangano la Chiuta, tikulindirira kuchanya kuphya na charu cha pasi chiphya mwenemumo mukukhara urunji.

¹⁴Ntheura ŵakutemweka, apo mukulindirira vyeneivi, muyezge chomene kuŵa ŵambula kafukwa panji kalema panthazi pa Chiuta, ndiposo na kuŵa mu mutende.

¹⁵Mukumbukenge kuti kuziwurika kwa Fumu ndiwo mwaŵi winu wakuponoskekera. Ndicho Paulosi nayo mubali withu wakutemweka wakamulemberani, apo wakuyowoyera mu vinjeru ivyo vikapika kwa iyo.

¹⁶Ndimo wakuyowoyera ichi na mu makarata ghakhe ghose agho wakulemba, mwenemumo muli vinyakhe ivyo nvinonono kuvipulikiska, ndipo ŵanthu ŵalemwa na ŵambula kukhora mu chipulikano ŵakuving'anamulira mu nthowa izo zikuŵapweteka ŵekha nga ndi umo ŵakuchitira na malembo ghanyakhe.

¹⁷Kweni imwe ŵakutemweka, muli kuvimanya kale vyeneivi. Muŵe maso, mwakuti mureke kupuruskika na masovyo gha ŵanthu ŵambula kwenda mu marango, na kuwukapo apo muli kujintha chipulikano chinu.

¹⁸Kweni murutilire kukura mu uchizi na mu kumanya Fumu na Muponoski withu Yesu Khristu. Kwa iyo kuŵe uchindami sono na muyirayira swii. Ameni.