Read new_tumbuka_bible 1 Yohane 2 Bible Online

1 Yohane 2 - new_tumbuka_bible bible

1 Yohane 2

¹Imwe mwa twana twane, nkhumulemberani ichi mwakuti mureke kwananga. Kweni usange munthu wananga, tili nayo mwimiliri uyo wakumanya kutiŵeyerera panthazi pa Ŵadada, ndiyo Yesu Khristu murunji.

²Khristu ndiyo sembe yakuphepiskira zakwananga zithu, ndipo kuti ndi mphepiska ya zakwananga zithu pera chara, kweniso na za ŵanthu wose mu charu.

³Ndipo na ichi tingapanikizga fikepo kuti tikumumanya, usange tikusunga marango ghakhe.

⁴Munthu uyo wakuti wakumumanya Chiuta, kweni kuti wakusunga marango ghakhe chara, ndi mutesi, ndipo unenesko kuti ulimo mwa iyo chara.

⁵Kweni uyo wakusunga mazgu gha Chiuta, mweneuyo ndiyo kutemwa kwa Chiuta kwafiskika nadi mwa iyo. Umu ndimo tikumanyira kuti tili mwa iyo.

⁶Munthu uyo wakuti wakukhara mwa Chiuta wakwenera kwenda kwakuyana na umo Khristu wakenderanga.

⁷Mwa ŵakutemweka, kuti nkhumulemberani dango liphya chara, kweni ndi dango la kale ilo mukaŵa nalo kufuma ku mutendeko. Dango la kale ndi mazgu agho muli kupulika.

⁸Ndipouli, leneliro ndi dango liphya ilo nkhumulemberani, unenesko wakhe ukuwoneka mwa Yesu, ndiposo mwa imwe. Pakuti mdima ukumara, ndipo ungweru wenecho wamba kale kuwoneka.

⁹Munthu uyo wakuti wali mu ungweru kweni wakumutinkha munyakhe, wachali mu mdima na sono wuwo.

¹⁰Munthu uyo wakutemwa munyakhe ndiyo wali mu ungweru. Ntheura mwa iyo mulije kanthu ako kangakhuŵazga munthu munyakhe kuti wanange.

¹¹Kweni uyo wakutinkha munyakhe, wali mu mdima ndipo wakwenda mu mdima. Ndipo kuti wakumanya chara uko wakuya, chifukwa mdima wamuburumutizga.

¹²Nkhumulemberani imwe mwa ŵana ŵane, chifukwa Chiuta wamugowokerani zakwananga zinu chifukwa cha zina la Khristu.

¹³Nkhumulemberani imwe, mwa ŵadada, chifukwa mukumanya uyo waliko kufuma ku mutendeko. Nkhumulemberani imwe, mwa ŵawukirano, chifukwa mwamutonda Muheni Yura.

¹⁴Nkhumulemberani imwe, mwa ŵana ŵane, chifukwa mukuŵamanya Ŵadada. Nkhumulemberani imwe mwa ŵadada chifukwa mukumumanya uyo waliko kufuma ku mutendeko. Nkhumulemberani imwe, mwa ŵawukirano, chifukwa muli ŵankhongono, ndiposo mazgu gha Chiuta ghakukhara mwa imwe, ndipo mwamutonda Muheni Yura.

¹⁵Mureke kutemwa charu panji vinthu ivyo vili mu charu. Usange munthu wakutemwa charu, kutemwa kwa Chiuta Dada kuti kuli mwa iyo chara.

¹⁶Pakuti vyose ivyo vili mu charu, makhumbiro gha thupi, ivyo maso ghakudokera na kujitukumura pa ivyo tili navyo kuti vikufuma ku Ŵadada chara, kweni vyose vikufuma mu charu.

¹⁷Ndipo charu na maulamphalampha yakhe vikumara, kweni uyo wakuchita khumbo la Chiuta, ndiyo wakukhalirira kwa muyirayira.

¹⁸Mwa ŵana, ili ndi ora la umaliro. Nga ndi umo mukapulikira kuti Mukana-Khristu wakwiza, ndipo na sono wuwo ŵamukana-Khristu ŵanandi ŵiza kale. Ntheura tikumanya kuti ili ndi ora la umaliro.

¹⁹Ŵanthu aŵa kuti ŵakaŵa ŵamoza na ise chara, ndicho chifukwa ŵakawukamo mwa ise. Chifukwa ŵaŵenge ŵamoza na ise, mphanyi ŵali kukhalirira pamoza nase. Kweni ŵakawukamo mwakuti ŵamanyikwe pakweru kuti ŵakawura kuŵa pamoza nase.

²⁰Kweni imwe muli kuphakazgika na Mutuŵa Yura, ndipo mose mukumanya.

²¹Nkhumulemberani imwe, kuti nchifukwa chakuti mukuwura kumanya unenesko chara, kweni nchifukwa chakuti muli kumanya nadi, ndiposo mukumanya kuti utesi wose ukufumira ku unenesko chara.

²²Kasi mutesi ndi njani? Asi ndi mweneuyo wakukana kuti Yesu ndi Mesiya? Wa ntheura ndi Mukana-Khristu pakuti wakuŵakana wose, Wiske na Mwana.

²³Yose uyo wakukana Mwana, wakukanaso Wiske. Uyo wakupokerera Mwana, wakupokereraso na Wiske.

²⁴Ntheura imwe muwoneseske kuti ivyo mukapulika kufuma ku mutendeko, mukuvisungilira mu mitima yinu. Usange mukusungilira ivyo mukapulika pakudanga, muti muŵenge mu wenenawene na Mwana na Ŵadada.

²⁵Icho Khristu wakapangana kutipa ise, ndi umoyo wa muyirayira.

²⁶Mazgu agha nkhumulemberani chifukwa cha awo ŵakukhumba kumupuruskani.

²⁷Kweni imwe, Khristu wali kumupungulirani kale Mzimu, uyo wakukhara mwa imwe, ndipo kukukhumbikwa chara kuti munthu wamusambizgani. Pakuti Mzimu ndiyo wakumusambizgani vyose, ndipo ivyo wakusambizga nvya kuneneska, kuti nvya utesi chara. Ntheura pulikirani kusambizga kwa Mzimu na kukhalirira mwa Khristu.

²⁸Ntheura sono, mwa twana twane, khalirirani mwa iyo, mwakuti tizakaŵe na chikanga para iyo wizamkuwoneka, ndipo tizakareke kuŵa na soni na kubisama pa kwiza kwakhe.

²⁹Usange mukumanya kuti iyo ndi murunji, mukukayikaso chara kuti yose uyo wakuchita unenesko ndi mwana wakhe.