Read new_tumbuka_bible 1 Yohane 3 Bible Online

1 Yohane 3 - new_tumbuka_bible bible

1 Yohane 3

¹Wonani kutemwa uko Chiuta wali nako pa ise. Iyo wakatitemwa chomene mwakuti tikuchemeka ŵana ŵa Chiuta. Ndipo nadi ndise ŵana ŵakhe. Chifukwa icho charu chikureka kutimanyira, nchakuti chikamumanya Chiuta chara.

²Mwa ŵakutemweka ŵane, sono tili ŵana ŵa Chiuta, nangauli sono chichali chindavumbukwe umo tamkuŵira. Kweni tikumanya kuti para Khristu wakwiza, tamkuŵa nga ndi iyo, pakuti tizamkumuwona nga ndi umo iyo waliri.

³Ndipo yose uyo wali na chigomezgo cha ntheura mwa Khristu wakujizgora kuŵa wakujiphotora nga ndi umo Khristu waliri wakutozgeka.

⁴Yose uyo wakwananga wali na maŵyeŵye gha kuswa marango, pakuti kwananga mbuchikanamarango.

⁵Mukumanya kuti Khristu wakiza kuti wawuskepo zakwananga, ndipo mwa iyo mulije kwananga.

⁶Munthu yose uyo wali mwa Khristu kuti wakukhalirira mu kwananga chara. Kweni yose uyo wakukhalirira mu kwananga, walije kumuwonapo iyo nanga nkhumumanya.

⁷Mwa twana twane, paŵavye munthu wamupusikani. Yose uyo wakuchita urunji, ndi murunji nga ndi umo Khristu waliri murunji.

⁸Yose uyo wakwananga ngwa Satana. Pakuti Satana ngwakwananga kufuma ku mutendeko. Ndicho chifukwa Mwana wa Chiuta wakizira kuti wabwangandule milimo ya Satana.

⁹Yose uyo ndi Mwana wa Chiuta kuti wakukhalirira mu kwananga chara, pakuti mbuto ya Chiuta yili mwa iyo. Ndipo walije kumanya kuchita kwananga, chifukwa ngwa kubabika na Chiuta.

¹⁰Penepapo ndipo tingamanyira awo ndi ŵana ŵa Chiuta na ŵana ŵa Satana. Yose uyo wakureka kuchita urunji panji wakureka kutemwa munyakhe ndi mwana wa Chiuta chara.

¹¹Pakuti agha ndi mazgu agho mukaghapulika kufuma ku mutendeko ghakuti titemwanenge.

¹²Tireke kuŵa nga ndi Kayini uyo wakaŵa wa Muheni Yura, ndipo wakakoma munung'una wakhe. Chifukwa uli Kayini wakakoma munung'una wakhe Abelu? Asi ndi chifukwa chakuti milimo yakhe yikaŵa yiheni apo milimo ya munung'una wakhe yikaŵa ya urunji?

¹³Ntheura mwa ŵabali ŵane, mureke kuzizwa usange charu chikumutinkhani.

¹⁴Ise tikumanya kuti tafumamo mu nyifwa, tanjira mu umoyo, pakuti tikuŵatemwa ŵabali ŵithu. Munthu yose uyo wakureka kutemwa wakukhara mu nyifwa.

¹⁵Yose uyo wakutinkha mubali wakhe wakukoma. Namwe mukumanya makora ghene kuti palije chigeŵenga icho chili nawo umoyo wa muyirayira.

¹⁶Umu ndimo tikumanyira uko nkhutemwa, kuti Khristu wakaŵika pasi umoyo wakhe chifukwa cha ise. Ntheura ise nase tikwenera kuŵika pasi umoyo withu chifukwa cha ŵabali.

¹⁷Usange munthu wali na vyuma vinandi, ndipo wakuwona munyakhe wakukavuka, kweni wakuwura kumuchitira lusungu, kasi kutemwa kwa Chiuta kukukhara uli mu munthu uyu?

¹⁸Mwa ŵana ŵane, kutemwa kureke kuŵa kwa pa mlomo pera. Kutemwa kukwenera kuŵa kwa unenesko, ndiposo kwakuwoneka mu machitiro ghithu.

¹⁹Umo ndimo timanyirenge kuti tili ŵa unenesko, ndipo tipanikizgirenge mitima yithu panthazi pa Chiuta,

²⁰pa nyengo iyo mitima yithu yikutisuska. Pakuti Chiuta ndiyo mukuru kuruska mitima yithu, ndipo iyo wakumanya vinthu vyose.

²¹Mwa ŵakutemweka, usange mitima yithu yikutisuska chara, tingamanya kwiza na chikanga panthazi pa Chiuta.

²²Ndipo tikupokera kufuma kwa iyo chose icho tikuromba, chifukwa tikupulikira marango ghakhe na kuchita ivyo vikumukondweska.

²³Icho Chiuta wakutilangula kuchita nchakuti, tikwenera kupulikana mu zina la Mwana wakhe Yesu Khristu, ndiposo na kutemwana yumoza na munyakhe, kwakuyana na umo Khristu wakatilangulira.

²⁴Wose awo wakurondezga marango gha Chiuta, ndiwo wakukhara mwa Chiuta, ndipo Chiuta nayo wakukhara mwa iwo. Tikumanya kuti Chiuta wakukhara mwa ise chifukwa cha Mzimu mweneuyo wali kutipa ise.