Read new_tumbuka_bible 1 Yohane 4 Bible Online

1 Yohane 4 - new_tumbuka_bible bible

1 Yohane 4

¹Mwa ŵakutemweka ŵane, mureke kugomezga mzimu uliwose kweni muyezge na kuwona mizimu iyo njakufuma kwa Chiuta. Pakuti nchimi zitesi zinandi zaparanyika kosekose mu charu.

²Nthowa yakuŵamanyiramo awo ŵali na Mzimu wa Chiuta ndi iyi: mzimu uliwose uwo ukuzomera kuti Yesu Khristu walikwiza mu thupi, ngwa Chiuta.

³Ndipo mzimu wose uwo ukureka kuzomera Yesu, kuti ngwa Chiuta chara. Uwu ndi mzimu wa Mukana-Khristu weneuwo mukapulika kuti ukwiza ndipo sono uli kale mu charu.

⁴Kweni imwe ŵana ŵane, ndimwe ŵakhe ŵa Chiuta ndipo mwazitonda nchimi zitesi izi. Chifukwa mweneuyo wali mwa imwe, ndi mukuru kuruska mweneuyo wali mu charu.

⁵Nchimi izo ndi za mu charu. Ntheura zikuyowoya nvya mu charu, ndipo ŵanthu ŵa mu charu ŵakuzipulika.

⁶Kweni ise tili ŵana ŵa Chiuta. Yose uyo wakumanya Chiuta wakutipulika, kweni yose uyo ngwa Chiuta chara, kuti wakutipulika chara. Umo ndimo tikuwumanyira mzimu wa unenesko na mzimu wakupusika.

⁷Mwa ŵakutemweka ŵane, tiyeni titemwanenge, pakuti kutemwa kukufuma kwa Chiuta. Yose uyo wakutemwa ndi mwana wa Chiuta, ndiposo wakumumanya Chiuta.

⁸Yose uyo wakuwura kutemwa walije kumumanya Chiuta, chifukwa Chiuta nkhutemwa.

⁹Chiuta wakarongora kutemwa kwakhe mukati mwa ise, pakutuma Mwana wakhe yekha na yekha mu charu, mwakuti tiŵenge na umoyo mwa iyo.

¹⁰Mu ichi ndimo muli kutemwa, kuti ndise tili kumutemwa Chiuta chara, kweni iyo ndiyo wali kutitemwa ise, ndipo wakatuma Mwana wakhe kuŵa sembe yakuphepiskira zakwananga zithu.

¹¹Mwa ŵakutemweka, usange Chiuta wakatitemwa ntheura, ipo nase tikwenera kutemwana.

¹²Palije munthu uyo wali kumuwona Chiuta. Usange tikutemwana, ndiko kuti Chiuta wakukhara mwa ise, ndipo kutemwa kwakhe nkhwakufikapo mwa ise.

¹³Na ichi tikumanya kuti tikukhara mwa Chiuta, ndiposo iyo wakukhara mwa ise chifukwa wali kutipa Mzimu wakhe na wakhe.

¹⁴Ise tili kuwona ndipo tikuchita ukaboni kuti Wiske wali kutuma Mwana wakhe kuŵa Muponoski wa charu.

¹⁵Yose uyo wakuzomera kuti Yesu ndi Mwana wa Chiuta, Chiuta wakukhara mwa iyo, ndipo iyo nayo wakukhara mwa Chiuta.

¹⁶Sono tikumanya ndipo tikugomezga mu kutemwa uko Chiuta wali nako pa ise. Chiuta nkhutemwa, ndipo uyo wakukhara mu kutemwa wakukhara mwa Chiuta, ndipo Chiuta wakukhara mwa iyo.

¹⁷Mu cheneichi ndimo kutemwa kukuŵira kwakufikapo na ise: mwakuti tiŵenge na chigomezgo cha zuŵa la weruzgi chifukwa nga ndi umo iyo waliri ndimo nase tiliri mu charu ichi.

¹⁸Mu kutemwa, mulije wofi. Pakuti kutemwa kwakufikapo kukuchimbizga wofi. Pakuti wofi ukuŵapo chifukwa cha chilango ndipo uyo wali na wofi ngwa kufikapo mu kutemwa chara.

¹⁹Ntheura tikumutemwa Chiuta chifukwa ndiyo wakadanga kutitemwa.

²⁰Usange munthu wakuti, “Nkhumutemwa Chiuta,” kweni wakutinkha mubali wakhe, ndi mutesi. Chifukwa uyo wakureka kutemwa mubali wakhe mweneuyo wakumuwona, kasi wangamutemwa uli Chiuta mweneuyo wandamuwone?

²¹Dango ilo Khristu wali kutipa ndakuti, uyo wakutemwa Chiuta wakwenera kutemwaso mubali wakhe.