Read new_tumbuka_bible 1 Yohane 5 Bible Online

1 Yohane 5 - new_tumbuka_bible bible

1 Yohane 5

¹Yose uyo wakupulikana kuti Yesu ndi Mesiya ndi mwana wa Chiuta. Ndiposo yose uyo wakutemwa mupapi, wakutemwaso na mwana wuwo.

²Na cheneichi tikumanya kuti tikutemwa ŵana ŵa Chiuta, para tikutemwa Chiuta na kupulikira marango ghakhe.

³Pakuti kutemwa Chiuta ncheneichi chakuti tisungilire marango ghakhe. Ndipo marango ghakhe kuti nganonono chara.

⁴Pakuti yose uyo ndi mwana wa Chiuta wakutonda charu. Ndipo icho chikutonda charu ndi chipulikano chithu.

⁵Kasi ndi njani uyo wakutonda charu, asi ndi mweneuyo wakupulikana kuti Yesu ndiyo Mwana wa Chiuta.

⁶Yesu Khristu ndiyo wakiza na maji na ndopa. Kuti wakiza na maji pera chara, kweni na maji na ndopa. Ndipo Mzimu nayo ndi kaboni kuti ichi ncha unenesko, pakuti Mzimu ndi unenesko.

⁷Pakuti pali ŵakaboni ŵatatu,

⁸Mzimu, maji na ndopa, ndipo ŵatatu aŵa ŵakuzomerezgana.

⁹Usange tikupokera ukaboni uwo ŵanthu ŵakupereka, ndipo ukaboni uwo Chiuta wakupereka ngwa nkhongono kwakuruska. Pakuti uwu ndiwo ukaboni weneuwo Chiuta wakupanikizgira Mwana wakhe.

¹⁰Ntheura yose uyo wakupulikana na Mwana wa Chiuta, wali nawo ukaboni mu mtima wakhe. Kweni yose uyo wakureka kugomezga Chiuta, wakumuzgora Chiuta kuŵa mutesi, pakuti walije kugomezga ukaboni uwo Chiuta wali kupanikizgira Mwana wakhe.

¹¹Ntheura ukaboni ngwa kuti, Chiuta wali kutipa ise umoyo wa muyirayira, ndipo umoyo uwu uli mu Mwana wakhe.

¹²Yose uyo wali na Mwana, wali nawo umoyo. Uyo walije Mwana wa Chiuta, kuti wali nawo umoyo chara.

¹³Nkhumulemberani vyeneivi imwe mukupulikana mu zina la Mwana wa Chiuta, mwakuti mumanye kuti muli nawo umoyo wa muyirayira.

¹⁴Ichi ndi chigomezgo icho tili nacho mwa Chiuta chakuti usange tikumuromba kanthu kalikose kwakuyana na khumbo lakhe, wakutipulika.

¹⁵Ndipo usange tikumanya kuti wakutipulika para tikumuromba kanthu kalikose, tikumanyaso kuti tapokera ivyo tikumuromba.

¹⁶Usange munthu wakumuwona mubali wakhe wakuchita uheni uwo kuti ukumutorera ku nyifwa chara, wakwenera kumurombera kwa Chiuta, ndipo Chiuta wati wamupenge umoyo wa awo kwananga kwawo kukuŵatorera ku nyifwa chara. Zilipo zakwananga izo zikuŵatorera ŵanthu ku nyifwa, kuti ndizo nkhuti wakwenera kuŵarombera kwa Chiuta chara.

¹⁷Ubendezi wose nkhwananga, kweni kulipo kwananga kunyakhe uko kukumutorera munthu ku nyifwa chara.

¹⁸Tikumanya kuti yose uyo ndi Mwana wa Chiuta kuti wakwananga chara, pakuti Mwana wa Chiuta wakumusungilira. Ntheura Muheni Yura kuti wakumukhwaska chara.

¹⁹Tikumanya kuti ndise ŵana ŵa Chiuta, ndipo charu chose chili pasi pa mazaza gha Muheni Yura.

²⁰Tikumanya kuti Mwana wa Chiuta wali kwiza, ndipo wali kutipa mahara mwakuti timanye Chiuta uyo ngwa unenesko. Ndipo nadi tili mwa Chiuta wa unenesko, chifukwa tili mu Mwana wakhe Yesu Khristu. Iyo ndiyo Chiuta wa unenesko, ndiposo umoyo wa muyirayira.

²¹Mwa ŵana ŵane, patukaniko ku vikozgo.