Read new_tumbuka_bible Ŵeruzgi 1 Bible Online

Ŵeruzgi 1 - new_tumbuka_bible bible

Ŵeruzgi 1

¹Yoshuwa wakati wafwa, ŵaIsraele wakafumba FUMU kuti, “Kasi ndi mtundu ngu mukati mwithu uwo uti udangenge kuruta kuya karwa nkhondo na ŵaKanani?”

²FUMU yikazgora yikati, “ŴaYuda ndiwo ŵati ŵadange kuruta. Ndapereka charu ichi mu mawoko ghawo.”

³Sono ŵaYuda ŵakayowoya kwa ŵaSimiyoni, ŵana ŵanyawo kuti, “Tiyeni tirute tose ku charu icho chili kugaŵikira ise, mwakuti tikarwe nkhondo na ŵaKanani. Ise naseso tizamkuruta namwe ku charu icho chili kugaŵikira imwe.” Ntheura ŵaSimiyoni ŵakaruta nawo.

⁴Sono ŵaYuda na ŵanyawo ŵakaruta ndipo FUMU yikapereka ŵaKanani na ŵaPerezi mu mawoko ghawo na kuŵathereska. Ndipo ŵakakomapo ŵanthu 10,000 pa Bezeki.

⁵Kwenekura ŵaYuda na ŵaSimiyoni ŵakasanga Karonga Adoni Bezeki ndipo ŵakarwa nayo nkhondo na kuŵathereska ŵaKanani na ŵaPerezi.

⁶Adoni Bezeki wakachimbira, kweni ŵakamuchimbilira na kumukora. Ndipo wakati wamusanga ŵakamudumula vigunwe vya ku mawoko na vya ku malundi.

⁷Penepapo Adoni Bezeki wakati, “Ŵakaronga 70 ŵeneawo nkhaŵadumula vigunwe vya ku mawoko na ku malundi, ŵakasoranga tuvimenyu twa vyakurya kusi ku thebulu lane. Chiuta wakuchita pa ine ivyo ine nkhachita kwa iwo.” Ntheura ŵakamutorera ku Yerusalemu kweneuko wakafwira.

⁸ŴaYuda ŵakarwa nkhondo na ŵanthu ŵa msumba wa Yerusalemu ndipo ŵakati ŵaŵathereska ŵakawupoka msumba. Ŵakakoma ŵanthu ŵanandi ndipo msumba ŵakocha na moto.

⁹Pamanyuma pakhe ŵaYuda ŵakaruta kuya karwa nkhondo na ŵaKanani awo ŵakakharanga mu charu cha mapiri gha ku mwera, ndiposo na mu charu cha chidika.

¹⁰ŴaYuda ŵakaruta kuya karwaso na ŵaKanani awo ŵakakharanga mu msumba wa Heburoni (msumba wa Heburoni, pakudanga ukachemekanga kuti Kiriyati Ariba) ndipo ŵakathereska ŵaSheshayi, Ahimani na Talimayi.

¹¹Ŵakati ŵafuma ku Heburoni, ŵaYuda ŵakaruta kuya karwa nkhondo na ŵanthu awo ŵakakharanga mu msumba wa Debiri. Pakudanga msumba uwu ukachemekanga kuti Kiriyati Sefere.

¹²Sono Kalebu wakati, “Uyo wati warwe nkhondo na ŵanthu ŵa msumba wa Kiriyati Sefere waŵathereske na kuwupoka msumba, nditi ndimupe Akisa mwana wane kuŵa muwoli wakhe.”

¹³Otiniyele mwana wa Kenazi, munung'una wa Kalebu, wakawupoka msumba ura. Ntheura Kalebu wakamupa Akisa mwana wakhe kuŵa muwoli wakhe.

¹⁴Zuŵa limoza wakati watorana na Otiniyele wakamupemberezga muwoli wakhe kuti wakarombe munda kwa Kalebu ŵawiske. Sono Akisa wakaruta ku ŵawiske ŵakhe ndipo apo wakakhiranga pa mbunda yakhe, Kalebu wakamufumba wakati, “Kasi icho chasuzga nchivichi?”

¹⁵Iyo wakazgora wakati, “Ine ndatenge mundipe chawanangwa. Pakuti mwandiŵika mu charu cha chinkhamwa, mundipeso mbwiwi za maji.” Penepapo Kalebu wakamupa mbwiwi za kunena na za kusika.

¹⁶Sono ŵa mphapu ya Keni, wiskevyara wa Mozesi, ŵakafumako ku Yeriko, msumba wa mikama, uko ŵakakharanga, ŵakaruta pamoza na ŵaYuda kuya kakhara mu charu cha mapopa ku mwera kwa msumba wa Aradi mu charu cha Yuda pamoza na ŵaAmaleki, ŵanthu ŵa kwenekura.

¹⁷ŴaYuda pamoza na ŵaSimiyoni, ŵana ŵanyawo ŵakaruta kuya karwa nkhondo na ŵaKanani awo ŵakakharanga mu msumba wa Zefati. Ŵakati ŵawuthereska ŵakawupasulirathu msumba. Ntheura msumba ura ukachemeka kuti Horima.

¹⁸ŴaYuda ŵakapokaso msumba wa Gaza pamoza na charu chakhe chose chakuzingirizga, msumba wa Ashikeloni pamoza na charu chakhe chose chakuzingirizga ndipo na msumba wa Ekuroni pamoza na charu chakhe chose chakuzingirizga.

¹⁹FUMU yikaŵa nawo ŵaYuda ndipo ŵakatora charu cha mu mapiri kweni ŵakatondeka kuŵafumyamo ŵanthu awo ŵakakharanga mu chidika chifukwa iwo ŵakaŵa na magareta gha visulo.

²⁰Nga ndi umo Mozesi wakayowoyera, msumba wa Heburoni ukaperekeka kwa Kalebu mweneuyo wakachimbizgamo mafuko ghatatu gha ŵaAnaki.

²¹Kweni ŵaBenjamini kuti ŵakaŵachimbizgamo ŵaYebusi chara awo ŵakakharanga mu Yerusalemu. Ntheura ŵaYebusi ŵakukhara na ŵaBenjamini mu Yerusalemu mpaka sono.

²²Ŵanthu ŵa fuko la Yosefe nawoso ŵakaruta kuya karwa nkhondo na ŵanthu ŵa msumba wa Betele, ndipo FUMU yikawa pamoza nawo.

²³Iwo ŵakatuma ŵanthu kuya kaskora msumba wa Betele. (Msumba uwu kale ukachemekanga kuti Luzi.)

²⁴Ŵakuskora ŵara ŵakati ŵaruta zikawona munthu wakufuma mu msumba ndipo ŵakati kwa iyo, “Tikukuŵeya utirongore umo tinganjirira mu msumba, ndipo ise titi tikuchitire lusungu.”

²⁵Munthu yura wakaŵarongora nthowa yakunjirira mu msumba. Sono ŵa fuko la Yosefe ŵakanjira mu msumba ndipo wakaya kakoma waliyose mu msumba wa Betele kweni munthu yura ŵakamureka wamoyo pamoza na mbumba yakhe yose.

²⁶Munthu yura wakaruta ku charu cha ŵaHiti ndipo wakaya kazenga msumba na kuwuthya zina lakuti Luzi. Msumba uwu ukuchemeka na zina leneili mpaka sono.

²⁷ŴaKanani awo ŵakakharanga mu msumba wa Beti Shani na vikaya vyakhe, awo ŵakakharanga mu msumba wa Taanaki na vikaya vyakhe, awo ŵakakharanga mu msumba wa Doro na vikaya vyakhe, nesi awo ŵakakharanga mu msumba wa Ibileyamu na vikaya vyakhe, awo ŵakakharanga mu msumba wa Megido na vikaya vyakhe ŵaManase kuti ŵakaŵachimbizgamo chara. Ntheura ŵaKanani ŵakarutilira kukhara mu charu chira.

²⁸Para ŵaIsraele ŵakaŵa ŵankhongono, ŵakaŵaŵika ŵaKanani pa mlimo wakuchichizga, kweni kuti ŵakaŵafumiskamo nkhanira chara.

²⁹ŴaEfurayimu kuti ŵakaŵachimbizgamo ŵaKanani awo ŵakakharanga mu msumba wa Gezere chara. Ŵakarutilira kukhara mu Gezere pamoza na ŵaEfurayimu.

³⁰ŴaZebuloni nawo kuti ŵakaŵachimbizgamo ŵaKanani awo ŵakakharanga mu msumba wa Kitironi chara nesi awo ŵakakharanga mu Nahaloli. Ntheura ŵaKanani ŵakarutilira kukhara mukati mwawo, ndipo ŵakaŵazgora kuŵa ŵakuchita mlimo wakuchichizga.

³¹ŴaAshere nawo kuti ŵakaŵachimbizgamo ŵaKanani chara awo ŵakakharanga mu msumba wa Ako, wa Sidoni, wa Ahilabu, wa Akizibu, wa Heliba, wa Afeki na wa Rehobu.

³²Pa chifukwa ichi ŵaAshere ŵakakharanga mukati mu ŵaKanani, ŵeneawo ŵakaŵa ŵenecharu, pakuti ŵakaŵachimbizgamo chara.

³³ŴaNafutali kuti ŵakaŵachimbizgamo ŵaKanani awo ŵakakharanga mu msumba wa Beti Shemeshi, na ŵa mu Beti Anati chara, kweni ŵakakhara mukati mu ŵaKanani, ŵeneawo ŵakaŵa ŵenecharu. Ndipouli ŵenecharu aŵa ŵa mu Beti Shemeshi, na ŵa Beti Anati, ŵaNafutali ŵakaŵazgora kuŵa ŵazga pakuŵagwiriska milimo yinonono.

³⁴ŴaAmori ŵakaŵa ŵankhongono chomene mwakuti ŵakaŵachichizga ŵa fuko la Dani kuti ŵakhare mu charu cha mapiri pakuti ŵakaŵazomerezga chara kuti ŵakhilire ku charu cha chidika.

³⁵ŴaAmori ŵakarutilira kukhara mu Phiri la Heresi, ku Ayaloni, ndiposo na ku Shaalibimu. Kweni ŵa fuko la Yosefe ŵakaŵa ŵankhongono kuruska ŵaAmori. Ntheura ŵakaŵazgora ŵazga pakuŵagwiriska milimo yinonono.

³⁶Mphaka ya charu cha ŵaAmori yikamba pa chikwera cha Akirabimu kuya kanjirira ku msumba wa Sela mpaka kukwera kuruta muchanya mu phiri.