Read new_tumbuka_bible Ŵeruzgi 10 Bible Online

Ŵeruzgi 10 - new_tumbuka_bible bible

Ŵeruzgi 10

¹Abimeleki wakati wafwa pakiza munyakhe wakuti wathaske Israele. Iyo wakaŵa Tola mwana wa Puva, muzukuru wa Dodo, wa fuko la Isakara. Iyo wakakharanga mu msumba wa Shamiri mu charu cha mapiri cha Efurayimu.

²Wakaŵa mweruzgi wa ŵaIsraele virimika 23. Pamanyuma wakafwa ndipo wakasungika ku Shamiri.

³Pamanyuma pa Tola pakiza Yayiri, uyo wakakharanga ku Gileyadi. Iyo wakaŵa mweruzgi wa Israele virimika 22.

⁴Ndipo wakaŵa na ŵana 30 ŵeneawo ŵakaŵapa mbunda 30 kuti ŵagarenge. Ŵana ŵara ŵakarongozgaso misumba 30 mu charu cha Gileyadi yeneiyo yikuchemeka Havoti Yayiri ndipo yichali kuchemeka ntheura mpaka sono.

⁵Yayiri wakafwa ndipo wakasungika ku Kamoni.

⁶ŴaIsraele ŵakachitaso uheni panthazi pa FUMU. Iwo ŵakateŵeteranga ŵa Baala na ŵaAshitaroti, ŵachiuta ŵa ku Siriya, ŵachiuta ŵa ku Sidoni, ŵachiuta ŵa ku Mowabu, ŵachiuta ŵa ŵaAmoni ndiposo ŵachiuta ŵa ŵaFilisiti. ŴaIsraele ŵakayireka FUMU ndipo kuti ŵakayiteŵetera chara.

⁷FUMU yikaŵakwiyira chomene ŵaIsraele ndipo yikaŵapereka mu mawoko gha ŵaFilisiti na ŵaAmoni,

⁸ŵeneawo ŵakaŵathereska na kuŵasuzga ŵaIsraele chirimika chira. Kwa virimika 18 ŵakaŵasuzga ŵaIsraele wose awo ŵakaŵa sirya linyakhe la mronga wa Yorodani mu charu cha ŵaAmori, ku Gileyadi.

⁹Ndipo ŵaAmoni ŵakambuka Yorodani kuya karwaso na ŵaYuda, ŵaBenjamini ndiposo na ŵaEfurayimu. Ntheura ŵaIsraele ŵakasuzgika chomene.

¹⁰ŴaIsraele ŵakalira kwa FUMU wakati, “Tamunangirani chifukwa tareka imwe Chiuta withu ndipo tateŵetera ŵachiuta Baala.”

¹¹Sono FUMU yikazgora ŵaIsraele yikati, “Para ŵaEguputo, ŵaAmori, ŵaAmoni na ku ŵaFilisiti?

¹²ŴaSidoni, ŵaAmaleki, na ŵaMaoni ŵakamusuzgani ndipo mukalira kwa ine kuti ndimovwirani, asi nkhamuthaskani ku ŵanthu ŵara.

¹³Ndipouli mwandisida na kuteŵetera ŵachiuta ŵanyakhe. Ntheura nditi ndimuthaskaningiso chara.

¹⁴Rutani mukalire ku ŵachiuta awo mwaŵasora. Iwo ndiwo ŵamuthaskani mu nyengo ya visuzgo vyinu.”

¹⁵Kweni ŵaIsraele ŵakati kwa FUMU, “Ise tamunangirani. Tichitirani chose icho chikuwoneka kuti nchiweme kwa imwe kweni taŵeya mutithaske muhanya uno.”

¹⁶Penepapo ŵaIsraele wakawuskamo ŵachiuta ŵachilendo mukati mwawo na kwamba kuteŵetera FUMU. Ntheura FUMU yikaŵa na chitima chifukwa cha kusuzgika kwa ŵaIsraele.

¹⁷Penepapo ŵarongozgi ŵaAmoni ŵakachema ŵasilikari ŵawo kuti ŵarwe nkhondo. Ŵakiza na kuzenga misasa yawo ku Gileyadi. ŴaIsraele nawo ŵakawungana na kuzenga misasa ku Mizipa.

¹⁸Sono ŵanthu ŵa ku Gileyadi pamoza na ŵarongozgi ŵawo, ŵakayowoyeskana ŵakati, “Kasi ndi njani uyo wati wambe kukomana na ŵaAmoni? Iyo ndiyo wamkuŵa mukuru wa wose awo ŵakukhara ku Gileyadi.”