Read new_tumbuka_bible Ŵeruzgi 11 Bible Online

Ŵeruzgi 11 - new_tumbuka_bible bible

Ŵeruzgi 11

¹Yefuta wa ku Gileyadi wakaŵa chinkhara cha nkhondo. Wiske wakaŵa Gileyadi ndipo nyina wakaŵa mwanakazi muleŵe.

²Muwoli wa Gileyadi nayo wakamubabira ŵana. Iwo ŵakati ŵakura ŵakamuchimbizga Yefuta ndipo ŵakati kwa iyo, “Iwe kuti uŵenge muhaliri wa mu nyumba ya ŵadada chara chifukwa iwe ndiwe mwana wa mwanakazi munyakhe.”

³Ntheura Yefuta wakachimbira ku ŵana ŵanyakhe na kuya kakhara mu charu cha Tobu. Kwenekura Yefuta wakawunganya ŵanthu ŵawakawaka ŵeneawo ŵakarutanga nayo kuya kapoka vinthu vya ŵanthu.

⁴Pakati pajumpha kanyengo ŵaAmoni ŵakiza kuti ŵarwe nkhondo na ŵaIsraele.

⁵Ndipo para ŵaAmoni ŵakarwanga nkhondo na ŵaIsraele, ŵararaŵarara ŵa ku Gileyadi ŵakaruta kuya kamutora Yefuta ku charu cha Tobu.

⁶Iwo ŵakati kwa Yefuta, “Zanga uŵe murongozgi withu pakurwa nkhondo na ŵaAmoni.”

⁷Kweni Yefuta wakaŵafumba ŵararaŵarara ŵa ku Gileyadi ŵara wakati, “Asi imwe mukanditinkha na kundichimbizga mu nyumba ya ŵadada? Chifukwa uli mwiza kwa ine sono apa muli mu suzgo?”

⁸Sono ŵararaŵarara ŵa ku Gileyadi ŵakati kwa Yefuta, “Ntheura nadi. Ndicho chifukwa tizira kwa iwe sono kuti urute nase kuti tikarwe nkhondo na ŵaAmoni ndipo uŵe murongozgi withu wakuwusa wose awo ŵakukhara mu Gileyadi.”

⁹Yefuta wakaŵaphalira ŵararaŵarara ŵa ku Gileyadi wakati, “Usange mukunditoreraso ku chikaya kuya karwa nkhondo na ŵaAmoni, ndipo FUMU yaŵapereka kwa ine kasi ndamkumuwusani nadi.”

¹⁰Ŵararaŵarara ŵa ku Gileyadi ŵakamuphalira Yefuta ŵakati, “Tamkuchita nadi kwakuyana na umo ukuyowoyera. FUMU ndiyo yiti yiŵenge kaboni withu.”

¹¹Ntheura Yefuta wakaruta na ŵararaŵarara ŵa ku Gileyadi, ndipo ŵanthu ŵakamwimika kuŵa mukuru wawo na murongozgi wawo. Yefuta wakayowoyaso mazgu ghakhe ghose panthazi pa FUMU ku Mizipa.

¹²Pamanyuma pakhe Yefuta wakatuma nthumi kwa karonga wa ŵaAmoni kukafumba kuti, “Kasi na chifukwa uli kuti wize karwe nkhondo na charu chane?”

¹³Karonga wa ŵaAmoni wakazgora nthumi za Yefuta zira kuti, “Chifukwa chakhe nchakuti ŵaIsraele ŵakati ŵafumamo mu Eguputo, ŵakiza kapoka charu chane kwamba ku mronga wa Arinoni na kuya kafika ku mronga wa Yaboko na wa Yorodani. Ntheura sono undiwezgere charu ichi mu mutende.”

¹⁴Yefuta wakatumaso nthumi kwa karonga wa ŵaAmoni,

¹⁵kuya kukaphara kuti, “Yefuta wakuti: ŵaIsraele kuti ŵakapoka charu cha ŵaMowabu panji charu cha ŵaAmoni chara.

¹⁶Kweni para ŵakizanga kufuma ku Eguputo, ŵaIsraele ŵakenda kaporota mu mapopa kuya kafika ku Nyanja ya Matete ndipo ŵakiza ku msumba wa Kadeshi.

¹⁷Sono ŵaIsraele ŵakatuma nthumi kwa karonga wa ku Edomu kuya kaphara kuti, ‘Taŵeya, tizomerezgani kuti tiporotemo mu charu chinu?’ Kweni karonga wa ku Edomu wakakhumba chara kupulika ivi. Ŵakatumaso nthumi kwa karonga wa ku Mowabu, kweni nayo kuti wakazomera chara. Ntheura ŵaIsraele ŵakakhara ku Kadeshi.

¹⁸ŴaIsraele ŵakenda mu mapopa na kuzingirira charu cha Edomu na charu cha Mowabu, ndipo ŵakafika ku mafumiro gha dazi kwa charu cha Mowabu na kuzenga misasa sirya lira la mronga wa Arinoni. Kweni kuti ŵakanjira mu charu cha Mowabu chara chifukwa mronga wa Arinoni ndiwo ukaŵa mphaka ya charu cha Mowabu.

¹⁹ŴaIsraele ŵakatuma nthumi kwa Sihoni karonga wa ŵaAmori mweneuyo wakawusanga ku Heshiboni ndipo ŵakati kwa iyo, taŵeya tizomerezgani kuti tiporotemo mu charu chinu.

²⁰Kweni Sihoni wakaŵazomerezga ŵaIsraele chara kuti ŵaporotemo mu charu chakhe chifukwa ŵakaŵagomezga chara. Ntheura Sihoni wakawunganya pamoza ŵasilikari ŵakhe na kuzenga misasa yawo ku Yahazi, na kurwa nkhondo na ŵaIsraele.

²¹Kweni FUMU, Chiuta wa ŵaIsraele, wapereka Sihoni na ŵasilikari ŵakhe wose mu mawoko gha ŵaIsraele, ndipo ŵakaŵatonda. Ntheura ŵaIsraele ŵakatora charu chose cha ŵaAmori awo ŵakakharanga mu charu icho.

²²Ŵakatora charu chose cha ŵaAmori kufuma mu mronga wa Arinoni kuya kafika ku mronga wa Yaboko, ndiposo kufuma ku mapopa kuya kafika ku mronga wa Yorodani.

²³Sono pakuti FUMU, Chiuta wa ŵaIsraele, ndiyo wakaŵachimbizga ŵaAmori panthazi za ŵanthu ŵakhe ŵaIsraele na kupoka charu chawo. Kasi sono iwe ukukhumba kutipokaso kuti chiŵe chako?

²⁴Asi iwe mukwenera kutora charu icho Kemoshi,[4] chiuta winu wakumupani kuŵa chinu? Kweni charu chose icho FUMU yikapoka panthazi zithu titi tichitore.

²⁵Kasi sono iwe ukuruska Balaki mwana wa Zipora, karonga wa charu cha Mowabu? Kasi iyo wali kuyezgapo kupindana na ŵaIsraele, panji kasi wali kurwapo nawo nkhondo?

²⁶ŴaIsraele ŵakhara virimika 300 mu msumba wa Heshiboni na mu vikaya vyakhe, ndiposo na ku msumba wa Aroyere na mu vikaya vyakhe, ndiposo na mu misumba yose iyo yili mu mphepete mwa mronga wa Arinoni. Kasi ukarekerachi kupoka mu nyengo yeneyira?

²⁷Ntheura ine ndilije kukwanangira iwe, kweni iwe ukundinangira pakwiza karwa nkhondo na ine. FUMU yeneiyo yikweruzga ndiyo yidumure muhanya uno pakati pa ŵaIsraele na ŵaAmoni.”

²⁸Kweni karonga wa ŵaAmoni kuti wakapwererako chara mazgu agho Yefuta wakayowoya kwa iyo.

²⁹Sono Mzimu wa FUMU ukiza pa Yefuta ndipo iyo wakaporota mu charu cha Gileyadi na cha Manase na kurutilira mpaka ku msumba wa Mizipe mu charu cha Gileyadi. Kufuma ku Mizipa wakarutilira kuya ku ŵaAmoni.

³⁰Ndipo Yefuta wakachita chirapo kwa FUMU wakati, “Usange muti mundovwire kutonda ŵaAmoni,

³¹chose icho chamkufuma pa muryango wa nyumba yane kwiza kakumana nane, para nkhuwera kuti ndatonda ŵaAmoni, chizamkuŵa cha FUMU, ndipo ndizamkuchipereka kwa iyo kuŵa sembe yakocha.”

³²Ntheura Yefuta wakambukira ku ŵaAmoni na kuya karwa nawo nkhondo. Ndipo FUMU yikaŵapereka mu mawoko gha Yefuta na kuŵathereska.

³³Ŵakabwangandula misumba 20 kufuma ku Aroyere mpaka ku msumba ukuru wa Miniti kuya kafika ku Abelu Keramimu ndipo wakakoma ŵanthu ŵanandi chomene. Ntheura ndimo ŵaAmoni ŵakathereskeka panthazi pa ŵaIsraele.

³⁴Sono Yefuta wakiza ku chikaya chakhe ku Mizipa. Penepapo mwana wakhe mwanakazi wakafuma kuti wakakumane nayo uku wakulizga mityangara na kuvina. Mwana uyu wakaŵa yekha na yekha. Pa dera pa uyu pakaŵavye mwana munyakhe, mwanarume panji mwanakazi.

³⁵Yefuta wakati wamuwona, wakaparura vyakuvwara vyakhe wakati, “Mbaya mwe, wa mwana wane! Wandikomora chomene, ndipo wazgoka chinthu chakundikweŵeska chomene pakuti nkharapa kwa FUMU na mlomo wane ndipo kuti ndingawezgaso chirapo chane chara!”

³⁶Mwana yura wakati kwa iyo, “Ŵadada, usange mukapangana na FUMU na mlomo winu, muchite nane kwakuyana na mazgu ghinu, pakuti sono FUMU yawezgera nduzga pa ŵaAmoni, ŵarwani ŵinu.”

³⁷Iyo wakatiso kwa wiske, “Kweni mundichitire chinthu ichi: Mundireke danga myezi yiŵiri kuti ndirute nkhendendeke ku mapiri pamoza na ŵanyane na kulira kuti ndifwenge uko ndichali mwali wakulangwa.”

³⁸Wiske wakati, “Rutanga.” Wakamuzomerezga kuwukapo kwa myezi yiŵiri. Ntheura wakawukapo pamoza na ŵanyakhe kuruta ku mapiri kukalira kuti wafwenge uko wachali mwali wakulangwa.

³⁹Pa umaliro wa myezi yiŵiri, wakawerera ku ŵawiske ndipo wiske wakachita nayo kwakuyana na chirapo chakhe. Mwali yura kuti wakamanyapo mwanarume chara. Ntheura pakambika kaluso mu Israele,

⁴⁰kakuti ŵana ŵanakazi ŵa ku Israele ŵarutenge chirimika na chirimika kukalira nyifwa ya mwana wa Yefuta wa ku Gileyadi mazuŵa ghanayi mu chirimika.