Read new_tumbuka_bible Ŵeruzgi 12 Bible Online

Ŵeruzgi 12 - new_tumbuka_bible bible

Ŵeruzgi 12

¹Ŵanthu ŵa fuko la Efurayimu ŵakachema ku nkhondo ndipo ŵakambuka mronga wa Yorodani kuya ku Zafoni. Iwo wakati kwa Yefuta, “Kasi chifukwa uli ukaruta kuya karwa nkhondo na ŵaAmoni, kwambula kutichema kuti tirute nawe? Ise sono tochenge na moto nyumba yako pamoza iwe!”

²Yefuta wakaŵazgora wakati, “Ine na ŵanthu ŵane ŵa mu Gileyadi tikatangwanika chomene pakurwa nkhondo na ŵaAmoni. Ndipouli nkhamuchemani, kweni kuti mukiza kandithaska kwa iwo chara.

³Nkhati ndawona kuti mungandithaska chara, nkhajikhwimiska ndekha ndipo nkhambuka Yorodani kuya karwa nkhondo na ŵaAmoni ndipo FUMU yikaŵapereka mu mawoko ghane. Kasi imwe sono mwizirachi muhanya uno kuti murwe nkhondo na ine?”

⁴Sono Yefuta wakawunganya ŵanthu ku Gileyadi kuti ŵakarwe nkhondo na ŵaEfurayimu. Ntheura ŵaGileyadi ŵakaŵathereska ŵaEfurayimu chifukwa chakuti ŵaEfurayimu ŵakayowoyanga kuti, “Imwe ŵaGileyadi mukachimbira kufuma ku Efurayimu ndipo mukukhara mu charu cha ŵaEfurayimu na ŵaManase.”

⁵Sono ŵaGileyadi ŵakatora majambuko gha mronga wa Yorodani kuti ŵaEfurayimu ŵareke kwambukapo. Sono ŵaEfurayimu awo ŵakakharapo ŵakakhumbanga kwambuka pakuyowoya kuti, “Ndizomerezgani ndambukepo.” ŴaGileyadi ŵakamufumbanga kuti, “Kasi ndiwe muEfurayimu?” Usange iyo wakazgoranga kuti, “Chara”,

⁶iwo ŵakatenge kwa iyo, “Ipo sono yowoya kuti Siboleti.” Munthu yura wakayowoya kuti “Siboleti” pakuti wakaŵavye kumanya kuzunura makora. Ntheura ŵakamukoranga na kumukomera pa jambuko la mronga wa Yorodani. Ndipo pa nyengo yira ŵaEfurayimu 42,000 ŵakakomeka.

⁷Yefuta wakaŵa mweruzgi wa ŵaIsraele virimika vinkhonde na chimoza. Pamanyuma pakhe Yefuta uyo wakaŵa muGileyadi, wakafwa ndipo wakasungika mu msumba wakhe wa Mizipa ku Gileyadi.

⁸Yefuta wakati wafwa, Ibizani wa ku Betelehemu ndiyo wakaŵa mweruzgi wa ŵaIsraele.

⁹Iyo wakaŵa na ŵana ŵanarume 30 na ŵana ŵanakazi 30. Ŵana ŵakhe wose ŵanakazi wakaŵatengweska ku ŵanthu ŵa fuko linyakhe ndipo na ŵanarume ŵakhe wose wakaŵatorera ŵana ŵanakazi kufuma ku fuko linyakhe. Ibizani wakaŵa mweruzgi wa Israele pa virimika vinkhonde na viŵiri.

¹⁰Ibizani wakafwa ndipo wakasungika ku Betelehemu.

¹¹Pamanyuma pakhe, Eloni wa fuko la Zebuloni ndiyo wakaŵa mweruzgi wa ŵaIsraele pa virimika khumi.

¹²Pamanyuma Eloni wakafwa ndipo wakasungika ku msumba wa Ayaloni mu charu cha Zebuloni.

¹³Pamanyuma pakhe, Abidoni mwana wa Hilele, wa ku Piratoni, ndiyo wakaŵa mweruzgi wa ŵaIsraele.

¹⁴Iyo wakaŵa na ŵana ŵanarume 40 na ŵazukuru ŵanarume 30 ŵeneawo wakaŵapa mbunda 70 kuti ŵagarenge. Ndipo wakaŵa mweruzgi wa ŵaIsraele virimika 80.

¹⁵Pamanyuma pakhe, Abidoni, mwana wa Hilele wakafwa ndipo wakasungika ku Piratoni mu charu cha Efurayimu, charu cha mapiri cha ŵaAmaleki.