Read new_tumbuka_bible Ŵeruzgi 13 Bible Online

Ŵeruzgi 13 - new_tumbuka_bible bible

Ŵeruzgi 13

¹ŴaIsraele ŵakachitaso uheni panthazi pa FUMU. Ndipo FUMU yikaŵapereka mu mawoko gha ŵaFilisiti pa virimika 40.

²Kukaŵako munthu yunji ku msumba wa Zora wa fuko la Dani zina lakhe wakaŵa Manowa. Muwoli wakhe wakaŵa chumba ndipo wambula kubabako ŵana.

³Mungelo wa FUMU wakamuwonekera mwanakazi yura ndipo wakamuphalira kuti, “Wona ndiwe chumba ndipo ulije ŵana. Kweni uti uŵenge na nthumbo na kubaba mwana mwanarume.

⁴Ntheura ureke kumwa vinyo panji moŵa ndipo ureke kurya icho nchakurya chambula kuphotoka.

⁵Chifukwa nadi uti uŵenge na nthumbo ndipo uti ubabenge mwana mwanarume. Mwana uyu wareke kumeta sisi ku mutu wakhe pakuti wati waŵenge muNaziri, wakupatulika wa Chiuta kwamba pa zuŵa la kubabika kwakhe. Ndipo wati wambe mlimo wakuthaska ŵaIsraele ku ŵaFilisiti.”

⁶Penepapo mwanakazi yura wakaruta kwa mufumu wakhe na kumuphalira kuti, “Munthu wa Chiuta wangwiza kwa ine ndipo chisko chakhe changuŵa nga ndi chisko cha mungelo wa Chiuta ndipo wanguŵa wakofya chomene. Ine kuti ndangumufumba uko wakufumira chara ndipo iyo nayo kuti wangundiphalira zina lakhe chara.

⁷Kweni wangundiphalira kuti, ‘Uti uŵenge na nthumbo ndipo uti ubabenge mwana mwanarume. Ntheura ureke kumwa vinyo panji moŵa ndipo ureke kurya icho nchakukazuzgika, pakuti wati waŵenge muNaziri, wakupatulika wa Chiuta kwamba pa zuŵa la kubabika kwakhe mpaka pa zuŵa la nyifwa yakhe.’ ”

⁸Penepapo Manowa wakaromba kwa FUMU wakati, “Mwe FUMU, ndaŵeya muzomere kuti munthu wa Chiuta uyo mukatuma wizeso, wizakatisambizge umo tingalerera mwana uyo wati wababike kwa ise.”

⁹Chiuta wakapulika pempho la Manowa, ndipo mungelo wa Chiuta wakizaso kwa mwanakazi apo iyo wakakhara pasi mu munda. Kweni Manowa mufumu wakhe kuti wakaŵa nayo chara.

¹⁰Mwanakazi yura wakachimbira luŵiro na kuya kamuphalira mufumu wakhe kuti, “Munthu yura wakiza kwa ine zuŵa lira wizaso.”

¹¹Manowa wakawuka na kumurondezga muwoli wakhe ndipo wakafika kwa munthu yura na kumufumba kuti, “Kasi iwe ndiwe ukayowoya kwa muwoli wane?” Ndipo iyo wakati, “Inya ndine.”

¹²Manowa wakati, “Sono usange mazgu ghinu ghafiskika, kasi umoyo wa mwana wamkuŵa uli? Kasi wamkuchita mlimo uli?”

¹³Ndipo mungelo wa FUMU wakamuphalira Manowa kuti, “Vyose ivyo nkhayowoya kwa muwoli wako wakwenera kuchita.

¹⁴Wareke kurya kanthu kalikose kakufumira ku mpheska, nanga nkhumwa vinyo panji moŵa, nesi kurya kanthu kalikose kakukazuzgika. Wakwenera kuchita vyose ivyo nkhamulangula.”

¹⁵Manowa wakati kwa mungelo wa FUMU, “Phepani, tatenge timusuŵizgani timunozgerani danga kana ka mbuzi.”

¹⁶Mungelo wa FUMU wakati kwa Manowa, “Nanga ungandisuŵizga, kuti nditi ndirye chakurya chako chara. Kweni usange unozgenge sembe yakocha uyipereke kwa FUMU.” (Pakuti Manowa wakamanya chara kuti wakaŵa mungelo wa FUMU.)

¹⁷Sono Manowa wakamufumba mungelo wa FUMU wakati, “Kasi zina linu ndimwe ŵanjani mwakuti usange ivyo mwayowoya vyafiskika tizakamuchindikani?”

¹⁸Mungelo wa FUMU wakati kwa iyo, “Kasi ukukhumbirachi kumanya zina lane? Ndi zina ilo ungalipulikiska chara.”

¹⁹Ntheura Manowa wakatora kana ka mbuzi na sembe ya ufu ndipo wakiza navyo pa jarawe na kuvipereka kwa FUMU kuŵa sembe. Penepapo FUMU yikachita vinthu vyakuzizwiska panthazi pa Manowa na muwoli wakhe.

²⁰Apo dimi la moto likakweranga kuchanya kufuma pa jochero, mungelo wa FUMU wakakweranga kuchanya mu dimi la moto kufuma pa jochero lira. Manowa na muwoli wakhe wakati ŵawona, ŵakawa pasi kavunama.

²¹Mungelo wa FUMU kuti wakawonekaso kwa Manowa na muwoli wakhe chara. Penepapo Manowa wakamanya kuti wakaŵa mungelo wa FUMU.

²²Sono Manowa wakati kwa muwoli wakhe, “Titi tifwenge nadi chifukwa tawona Chiuta.”

²³Kweni muwoli wakhe wakati kwa iyo, “Usange FUMU yikhumbenge kutikoma, mphanyi yangupokerera chara sembe yakocha na sembe ya ufu kufuma kwa ise. Ndiposo mphanyi yilije kutirongora vinthu vyose ivi nanga nkhutiphalira vinthu vya ntheura ivi.”

²⁴Ntheura mwanakazi wakababa mwana mwanarume ndipo wakamuthya zina lakhe Samusoni. Mwana wakakura ndipo FUMU yikamutumbika.

²⁵Ndipo Mzimu wa FUMU wakamba kuwuska mtima wakhe apo wakaŵa ku Mahane Dani pakati pa Zora na Eshitawolo.