Read new_tumbuka_bible Ŵeruzgi 14 Bible Online

Ŵeruzgi 14 - new_tumbuka_bible bible

Ŵeruzgi 14

¹Zuŵa limoza Samusoni wakaruta ku Timuna ndipo kwenekura wakawona msungwana yumoza wa chiFilisiti.

²Wakati wawera ku kwakhe wakaŵaphalira ŵawiske na ŵanyina kuti, “Ku Timuna ndawona msungwana yumoza wa chiFilisiti. Sono mukanditorere kuti waŵe muwoli wane.”

³Kweni ŵawiske na ŵanyina ŵakati kwa iyo, “Kasi mulije mwanakazi na yumoza uyo ungamutora kuŵa muwoli wako mukati mu ŵabali ŵako, panji mukati mu ŵanthu ŵa fuko lithu, kuti mpaka urute kuya katora mwanakazi ku ŵaFilisiti ŵeneawo mbambula kukotoreka?” Kweni Samusoni wakati ku ŵawiske, “Ine kanditorerani, mweneuyo pakuti ine ndatemwa chomene mweneuyu.”

⁴Ŵawiske na ŵanyina ŵakamanya chara kuti ichi chikafumira kwa FUMU, pakuti yikapenjanga chifukwa chakuti yilimbane nawo ŵaFilisiti. Pa nyengo yira ŵaFilisiti ndiwo ŵakawusanga ŵaIsraele.

⁵Samusoni wakaruta ku Timuna pamoza na ŵawiske na ŵanyina ŵakhe. Wakati wafika ku minda ya mpheska ya ku Timuna, mwana wa nkharamu wakiza kamubangulira.

⁶Penepapo Mzimu wa FUMU wakiza pa iyo na nkhongono ndipo wakayiparura nkharamu nga ndi umo munthu wakuparulira kana ka mbuzi. Wakaŵavye kanthu muwoko lakhe. Kweni ivyo wakachita kuti wakaŵaphalira ŵawiske na ŵanyina chara.

⁷Sono Samusoni wakaruta wakaya kayowoya na msungwana, ndipo wakamutemwa chomene msungwana yura.

⁸Pakati pajumpha kanyengo, Samusoni wakawererako ku Timuna kuti wakamutore muwoli wakhe. Pa nthowa wakapatuka kuti wawone nkharamu iyo wakakoma. Wakasanga kuti mu nkharamu yira muli mulembwera wa njuchi ndiposo na uchi.

⁹Wakapakulira uchi mu mawoko ghakhe ndipo wakaryanga uku wakwenda. Wakati wafika kwa ŵawiske na ŵanyina wakaŵapako uchi ura ndipo iwo nawo ŵakarya. Kweni kuti wakaŵaphalira chara kuti uchi ura wakapakura mu nkharamu yakufwa.

¹⁰Wiske wa Samusoni ŵakaruta kwawo kwa msungwana yura ndipo Samusoni wakanozga chiphikiro, pakuti ntheura ndimo ŵanyamata ŵakachitiranga.

¹¹Para ŵaFilisiti ŵakamuwona ŵakiza na ŵanyamata 30 kuti ŵakhare nayo.

¹²Samusoni wakati kwa iwo, “Rekani sono ndimutayiranipo chinthanguni. Usange mungamanya kundiphalira ching'anamulo chakhe mu mazuŵa ghankhonde na ghaŵiri gha chiphikiro, ine nditi ndimupani vyakuvwara vinyakhe vya bafuta 30 na vyakuvwara vinyakhe vya pa chiphikiro 30.

¹³Kweni usange mwatondeka kundiphalira ching'anamulo chakhe, imwe mundipe vyakuvwara vya bafuta 30 na vyakuvwara vya pa chiphikiro 30.” Iwo ŵakamuzgora ŵakati, “Taya chinthanguni chako kuti tichipulike.”

¹⁴Iyo wakati, “Mu icho chikurya vinyakhe mukafuma chakurya. Mu chankhongono mukafuma chakunowa.” Ŵanthu ŵara ŵakatondeka kuphara ching'anamulo cha chinthanguni chira mazuŵa ghatatu.

¹⁵Pa zuŵa la chinayi ŵakamufumba muwoli wa Samusoni kuti, “Umupepeke mufumu wako kuti watiphalire ching'anamulo cha chinthanguni mzire tikoche pa moto iwe na mbumba ya ŵawuso. Kasi mwatichemera kuti mutibire?”

¹⁶Ntheura muwoli wa Samusoni wakamba kulira chomene panthazi pa mufumu wakhe na kuti kwa kumuphalira kuti, “Ukunditinkha waka, kuti ukunditemwa chara. Ŵanthu ŵakwithu waŵatayira chinthanguni ndipo undandiphalirepo ching'anamulo chakhe.” Samusoni wakati kwa iyo, “Ine kuti ndili kuŵaphalirapo ŵadada panji amama chara. Kasi sono ndingakuphalira iwe?”

¹⁷Mwanakazi yura wakaliranga waka panthazi pakhe mazuŵa ghankhonde na ghaŵiri gha chiphikiro ghara. Pa zuŵa la chinkhonde na chiŵiri Samusoni wakamuphalira chifukwa wakamukoserezga chomene. Sono mwanakazi yura wakaya kaŵaphalira ŵanthu ŵa ku kwakhe ching'anamulo cha chinthanguni chira.

¹⁸Ntheura ŵanthu ŵa mu msumba ŵakamuphalira Samusoni pa zuŵa la chinkhonde na chiŵiri, dazi lindanjire wakati, “Kasi nchivichi icho nchakunowa kuruska uchi? Kasi nchivichi ichi ncha nkhongono kuruska nkharamu?” Samusoni wakati kwa iwo, “Muŵavyenge kulima na ng'ombe yane yanakazi yambula kubabapo, mphanyi mwang'anamulira chinthanguni chane chara.”

¹⁹Sono Mzimu wa FUMU ukamwizira Samusoni na nkhongono. Wakaruta ku muzi wa Ashikeloni na kukomamo ŵanthu 30 ndipo wakavura vyakuvwara vyawo vya pa zuŵa la pa chiphikiro na kwiza kapereka kwa awo ŵakang'anamulira chinthanguni. Penepapo wakawerera ku nyumba ya ŵawiske wakukaripa chomene.

²⁰Penepapo muwoli wa Samusoni wakaperekeka ku munyakhe mweneuyo wakaŵa kaboni pa nthengwa yakhe.