Read new_tumbuka_bible Ŵeruzgi 15 Bible Online

Ŵeruzgi 15 - new_tumbuka_bible bible

Ŵeruzgi 15

¹Pakati pajumpha kanyengo, pa nyengo ya kuvunira tirigu, Samusoni wakatora kana ka mbuzi na kuruta kuya kachezgera muwoli wakhe. Iyo wakaŵaphalira ŵawiskevyara kuti, “Nkhukhumba kukanjira mu chipinda cha muwoli wane.” Kweni wiske wa mwanakazi wakamukanizga kunjiramo.

²Wiskevyara wakati, “Ine nkhaghanaghananga kuti ukumutinkha chomene mwanakazi uyu. Ntheura nkhamupereka kwa mubwezi wako. Kasi munung'una wakhe ngwa kutowa kuruska iyo chara? Ipo umutore waka mweneuyo kuŵa muwoli wako mu malo ghakhe.”

³Samusoni wakaŵaphalira wakati, “Sono nditi ndiŵenge wambula mrandu para ŵaFilisiti, ndaŵachitira chinthu chiheni.”

⁴Penepapo Samusoni wakaruta kuya kakora ŵakambwe 300 na kuŵakakilira michira ŵaŵiriŵaŵiri. Pa findo lirilose la michira wakakakirirapo chenje.

⁵Wakakozga moto ku vyenje vira na kuŵarekezga waka ŵakambwe ŵara mu minda ya tirigu ya ŵaFilisiti. Pakwendamo ŵakambwe ŵakocha zimphundwe za tirigu na tirigu wambula kuvuna pamozaso na minda ya makuni gha maolive.

⁶Sono ŵaFilisiti ŵakamba kufumbana ŵakati, “Ndi njani uyo wachita chinthu ichi?” Ŵanji ŵakazgora wakati, “Ndi Samusoni mukweni wa muTimuna chifukwa muTimuna yura watora muwoli wa Samusoni na kumutengweska ku mubwezi wakhe.” Sono ŵaFilisiti ŵakiza na kumocha na moto mwanakazi yura pamoza na wiske.

⁷Pakuwona icho ŵakachita, Samusoni wakati kwa iwo, “Pakuti ntheura ndimo mukuchitira, ipo nkhurapa nadi kuti ndirekengepo chara mpaka ndiwezgere nduzga pa imwe.”

⁸Sono wakaŵatimba chomene na kukoma ŵanandi. Pamanyuma wakaya kanjira mu mphanji ya jarawe la Etamu na kukhara mwenemura.

⁹ŴaFilisiti ŵakiza na kuzenga misasa mu charu cha Yuda ndipo ŵakarotokera na nkhondo pa msumba wa Lehi.

¹⁰Penepapo ŵaYuda ŵakafumba ŵakati, “Chifukwa uli mwiza kuti murwe nkhondo na ise?” Iwo ŵakazgora ŵakati, “Ise tiza kuti timukake Samusoni mwakuti timuchitire nga ndi umo wakachitira na ise.”

¹¹Penepapo ŵanthu 300 ŵa mu charu cha Yuda ŵakaruta ku mphanji ya jarawe la Etamu ndipo ŵakamufumba Samusoni ŵakati, “Kasi ukumanya chara kuti ŵaFilisiti ndiwo ŵakutiwusa? Kasi sono icho wachita kwa ise nchinthu uli?” Iyo wakaŵazgora wakati, “Ndachita kwa iwo kwakuyana na umo iwo ŵakachitira kwa ine.”

¹²Penepapo iwo ŵakati kwa iyo, “Ise tiza kuti tikukake na kukupereka ku ŵaFilisiti.” Pa ichi Samusoni wakaŵaphalira wakati, “Murape kwa ine kuti mundikomenge chara.”

¹³Iwo ŵakati kwa iyo, “Chara nadi. Ise tikukakenge waka na kukupereka kwa iwo. Tikukomenge chara.” Ntheura ŵakamukaka na vingwe viphya viŵiri na kumufumiska mu mphanji ya jarawe lira.

¹⁴Samusoni wakati wafika ku msumba wa Lehi, ŵaFilisiti ŵakiza kamupokerera na mphomo yikuru nkhanira. Penepapo Mzimu wa FUMU ukiza pa iyo mwa nkhongono ndipo vingwe ivyo ŵakamukaka navyo vikaŵa nga ndi thonje ilo lakora moto ndipo vikondo vikusongonoka na kuwukako ku mawoko ghakhe.

¹⁵Samusoni wakasanga chiwangwa chiphya cha njegheyeghe ya mbunda ndipo wakachitora na kukomera nacho ŵaFilisiti 1,000.

¹⁶Penepapo Samusoni wakati, “Na chiwangwa cha njegheyeghe cha mbunda ndawunjika miwulu na miwulu ya ŵanthu, na chiwangwa cha njegheyeghe cha mbunda ndakoma ŵanthu 1,000.”

¹⁷Wakati wamara kuyowoya wakataya pasi chiwangwa chira. Malo ghara ghakachemeka kuti Ramatilehi.[5]

¹⁸Samusoni wakomirwa chomene ndipo wakachemerezga kwa FUMU mwa kuromba wakati, “Ndimwe mwapereka kuthaska kukuru uku na woko la muteŵeti winu. Kasi sono ndifwenge na nyota na kukoreka na ŵanthu ŵambula kukotoreka aŵa?”

¹⁹Sono Chiuta wakajula khururu kwenekura ku Lehi ndipo maji ghakafuma mwenemumo. Samusoni wakati wamwa nkhongono zikawereramo ndipo wakasisipuka. Ndicho chifukwa chisimi chira chikachemeka kuti Eni Hakore.[6] Malo agha ghachali ku Lehi mpaka sono.

²⁰Samusoni wakaŵa murongozgi wa ŵaIsraele virimika 20 apo ŵaFilisiti ŵakawusiranga charu chira.